അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.ഷൈൻ ടോം ചാക്കോയെ കേന്ദ്ര കഥാപാത്രമാക്കി എം.എ.നിഷാദ് സംവിധാനം ചെയ്യുന്ന ‘ഒരു അന്വേഷണത്തിന്റെ തുടക്കം’ എന്ന ചിത്രത്തിലെ പുതിയ ഗാനം പ്രേക്ഷകരിലേക്ക്. എം.ജയചന്ദ്രൻ ഈണമൊരുക്കിയ ‘ആളേ പാത്താ’ എന്ന ഗാനം പളനി ഭാരതി വരികൾ കുറിച്ച് അഖില രവീന്ദ്രൻ ആലപിചിരിക്കുന്നു.
നടി വാണി വിശ്വനാഥിന്റെ തകർപ്പൻ ചുവടുകളാണ് ഗാനത്തിൽ ഒരുക്കിയിരിക്കുന്നത്. വാണിക്കൊപ്പം ദിൽഷ പ്രസന്നനും കട്ടയ്ക്കു കൂടെ നിൽക്കുന്നു. ചുരുങ്ങിയ സമയം കൊണ്ടു ശ്രദ്ധേയമായ ഗാനം മികച്ച പ്രതികരണങ്ങളോടെ ട്രെൻഡിങ്ങിലും ഇടം പിടിച്ചിരിക്കുകയാണ്. ഇരുവരുടെയും കോംബോ ഡാൻസ് കണ്ട് കൈയടിച്ചിരിക്കുകയാണ് പ്രേക്ഷകർ.
നീണ്ട ഇടവേളയ്ക്ക് ശേഷം വാണി വിശ്വനാഥിനെ കണ്ട സന്തോഷവും ആരാധകർക്കുണ്ട്. പിതാവും ഉന്നത പൊലീസ് ഉദ്യോഗസ്ഥനുമായിരുന്ന പി.എം.കുഞ്ഞിമൊയ്തീന്റെ പോലീസ് ഡിപ്പാർട്മെന്റിലെ സേവന കാലത്ത്, അദ്ദേഹം സ്വന്തം ഡയറിയിൽ കുറിച്ചിട്ട ഒരു കേസിന്റെ അനുമാനങ്ങൾ വികസിപ്പിച്ചാണ് നിഷാദ് ചിത്രത്തിന് കഥ രൂപീകരിച്ചിരിക്കുന്നത്.
വാണി വിശ്വനാഥ്, സമുദ്രകനി, മുകേഷ്, അശോകൻ, ബൈജു സന്തോഷ്, സുധീഷ്, ശിവദ, ദുർഗ കൃഷ്ണ, മഞ്ജു പിള്ള, സ്വാസിക, അനുമോൾ, ആഭിജ, പ്രശാന്ത് അലക്സാണ്ടർ, ജോണി ആന്റണി, വിജയ് ബാബു, സുധീർ കരമന, ഇർഷാദ്, ജാഫർ ഇടുക്കി, രമേഷ് പിഷാരടി, ഷഹീൻ സിദ്ദിഖ്, കോട്ടയം നസീർ, കൈലാഷ്, ബിജു സോപാനം, കലാഭവൻ ഷാജോൺ, സായികുമാർ, കലാഭവൻ നവാസ്, ജോണി ആന്റണി തുടങ്ങിയവരും ‘ഒരു അന്വേഷണത്തിന്റെ തുടക്കം’ എന്ന ചിത്രത്തിൽ വേഷമിടുന്നു. നവംബർ 8ന് ചിത്രം തിയറ്ററുകളിൽ എത്തും.
STORY HIGHLIGHT: aale paatha song from the movie oru anweshanathinte thudakkam
