ദുർബലമായ നഖമാണോ നിങ്ങളുടേത് ? പരിഹാരമുണ്ട്

ചർമം, മുടി, തുടങ്ങിയവ പോലെത്തന്നെ മനുഷ്യശരീരത്തിലെ സുപ്രധാന ഭാ​ഗമാണ് നഖങ്ങളും. കൈകാൽ വിരലുകളുടെ ആരോ​ഗ്യവും സൗന്ദര്യവും നഖങ്ങൾ നോക്കിയാൽ മനസിലാക്കാൻ കഴിയും. നഖങ്ങൾ ആരോ​ഗ്യത്തോടെയിരിക്കാൻ കൃത്യമായ പരിപാലനവും പോഷകാഹാരങ്ങളും അത്യാവശ്യമാണ്. പോഷകാഹാരങ്ങൾ കൃത്യമായി ശരീരത്തിൽ എത്താതുകൊണ്ടാണ് പലപ്പോഴും കൈകാലുകളിലെ നഖങ്ങൾ ദുർബലമായിരിക്കും. കെരാട്ടിൻ എന്ന പ്രോട്ടീനാണ് നഖങ്ങളിൽ അടങ്ങിയിരിക്കുന്നത്. അതിനാൽ പ്രോട്ടീന്റെ കുറവ് നഖങ്ങളെ കാര്യമായി തന്നെ ബാധിക്കും. മീൻ, മുട്ട, കോഴിയിറച്ചി, പയർവർ​ഗങ്ങൾ എന്നിവ ഭക്ഷണത്തിൽ ഉൾപ്പെടുത്തുന്നത് ആരോ​ഗ്യത്തിനൊപ്പം തന്നെ നഖത്തിന്റെ വളർച്ചയ്ക്കും ​ഗുണം ചെയ്യും. നഖത്തിന്റെ വളർച്ചയിലും ആരോ​ഗ്യത്തിലും പ്രധാന പങ്കുവഹിക്കുന്ന ബയോട്ടിന്റെ അളവ് കുറഞ്ഞാലും നഖങ്ങൾ ദുർബലമാകും. ബദാം, മുട്ട, അവക്കാഡോ, മധുരക്കിഴങ്ങ്, കോളീഫ്ലവർ തുടങ്ങിയ ഭക്ഷണങ്ങൾ കഴിക്കുന്നതിലൂടെ ശരീരത്തിന് ആവശ്യമായ ബയോട്ടിൻ ലഭിക്കും. ബയോട്ടിന്റെ കാര്യമായ കുറവ് ശരീരത്തിലുണ്ടെന്ന സംശയമുണ്ടെങ്കിൽ വിദ​ഗ്ധ അഭിപ്രായം തേടാവുന്നതാണ്. അയേൺ കുറവുണ്ടെങ്കിലും നഖങ്ങൾ പെട്ടെന്ന് പൊട്ടിപ്പോകുന്നതിനും നഖത്തിൽ വെള്ളവരകൾ വരുന്നതിനും കാരണമാകും. ധാരാണം അയേൺ അടങ്ങിയ ചീര, പയറ്, മാംസാഹാരം, ധാന്യങ്ങൾ എന്നിവ ഭക്ഷണത്തിൽ ഉൾപ്പെടുത്തുന്നതിലൂടെ അയേൺ കുറവ് പരിഹരിക്കാം. വിറ്റാമിൻ-സി, സിങ്ക് അടങ്ങിയ പദാർഥങ്ങൾ ഭക്ഷണശീലത്തിന്റെ ഭാ​ഗമാക്കുന്നതും നഖത്തിന്റെ ആരോ​ഗ്യത്തിന് നല്ലതാണ്.