കീർത്തി സുരേഷിന്റെ വിവാഹവുമായി ബന്ധപ്പെട്ട വാർത്തകൾ ഇന്നോ ഇന്നലെയോ കേൾക്കാൻ തുടങ്ങിയതല്ല. സിനിമാ ലോകത്തു നിന്നുമാകും കീർത്തിക്ക് വരൻ എന്ന് പല റിപ്പോർട്ടുകളിലും പരാമർശം വന്നു കഴിഞ്ഞു. ഒരിക്കൽ അക്കാര്യത്തിൽ വ്യക്തത വരുത്തി പിതാവും ചലച്ചിത്ര നിർമാതാവും നടനുമായ സുരേഷ് കുമാർ തന്നെ രംഗത്തെത്തിയിരുന്നു. ഇക്കുറി, കീർത്തിയുമായി അടുത്ത മാധ്യമം തന്നെ താരത്തിന്റെ വിവാഹവിവരം റിപ്പോർട്ട് ചെയ്തിരിക്കുകയാണ്. ജെ ഡബ്ല്യു എഫ് എന്ന മാധ്യമാണ് കീർത്തിയുടെ വിവാഹവുമായി ബന്ധപ്പെട്ട പുതിയ വിവരങ്ങൾ പുറത്തുവിട്ടിരിക്കുന്നത്. മലയാളത്തിന് പുറത്തുള്ള ഭാഷകളിലെ തിരക്കുള്ള നടിയാണ് കീർത്തി സുരേഷ്. മേനക- സുരേഷ് കുമാർ ദമ്പതികളുടെ ഇളയമകളാണ് താരം.
അടുത്ത മാസം കീർത്തിയുടെ വിവാഹം ഉണ്ടാവുമെന്ന തരത്തിലാണ് ജെ ഡബ്ല്യു എഫ് നൽകുന്ന വിവരം. മാത്രമല്ല വരനെക്കുറിച്ചുള്ള സൂചനകളും നൽകുന്നുണ്ട്. കീർത്തിയുടെ വിവാഹവുമായി ബന്ധപ്പെട്ട വാർത്തകൾ വരുമ്പോഴൊക്കെ ആരാധകർ അറിയാൻ ആകാംക്ഷ പ്രകടിപ്പിക്കുന്ന മറ്റൊരു കാര്യമാണ് എവിടെ വെച്ചാണ് വിവാഹം നടത്തുക എന്നത്. തിരുവനന്തപുരത്ത് വെച്ചാണോ അതോ ചെന്നൈയിൽ വെച്ചാണോ എന്ന ചോദ്യമാണ് ഉയരാറുള്ളത്. ഇതേക്കുറിച്ചുള്ള സൂചനയും റിപ്പോർട്ടിലുണ്ട്. ഏറെ വൈകാതെ തന്നെ വിവാഹവുമായി ബന്ധപ്പെട്ട പ്രഖ്യാപനം കുടുംബം നടത്താനുള്ള സാധ്യതയെക്കുറിച്ചും പറയുന്നുണ്ട്. സിനിമയിൽ നിന്നുള്ള ആളല്ല വരൻ എന്ന വിവരമാണ് ഇപ്പോൾ ലഭിക്കുന്നത്. കീർത്തിയുടെ കുടുംബത്തിൽ നിന്നുള്ള ആള് തന്നെയാണ് വരൻ എന്നാണ് റിപ്പോർട്ടുകൾ. എന്നാൽ സുരേഷ് കുമാറിന്റെ കുടുംബത്തിൽ നിന്നാണോ അതോ മേനകയുടെ ബന്ധുവാണോ എന്ന കാര്യം വ്യക്തമല്ല. ഗോവയിൽ വെച്ചായിരിക്കും വിവാഹം എന്നാണ് ജെ ഡബ്ല്യു എഫ് പറയുന്നത്.
അതേ സമയം ഇക്കഴിഞ്ഞ ദിവസം മേനക സുരേഷിന്റെയും സുരേഷ് കുമാറിന്റെയും വിവാഹ വാർഷികമായിരുന്നു. കീർത്തി അച്ഛനും അമ്മയ്ക്കും ചേച്ചിക്കും ഒപ്പമുള്ള ഫോട്ടോ താരം പങ്കുവെച്ചായിരുന്നു ആശംസ അറിയിച്ചത്. ഇതിന് പിന്നാലെ തന്നെയാണ് കീർത്തിയുടെ വിവാഹവുമായി ബന്ധപ്പെട്ട വാർത്തകളും വന്നത്.