ആരാധകർ ആകാംഷയോടെ കാത്തിരുന്ന പുഷ്പ സിനിമയുടെ രണ്ടാംഭാഗം ‘പുഷ്പ: ദ റൂള്‍’ ന്റെ ട്രെയിലർ പുറത്തിറങ്ങി. ബിഹാർ പാട്നയിലാണ് ഗംഭീര ട്രെയിലർ ലോഞ്ച് ചടങ്ങ് നടന്നത്. ആക്ഷനും മാസും ഒന്നിച്ച അടിപൊളി ട്രെയിലറാണ് അണിയറപ്രവർത്തകർ പുറത്ത് വിട്ടിരിക്കുന്നത്. ട്രെയിലറിൽ അല്ലു അർജുന്റെ ആവേശകരമായ പ്രകടനമാണ് കാണാൻ കഴിയുന്നത്. അതോടൊപ്പം തന്നെ ഫഹദ് ഫാസിലിനും ഗംഭീര ഇൻട്രോയാണ് ട്രെയിലറിൽ നൽകിയിരിക്കുന്നത്. ഡിസംബർ അഞ്ചിനാണ് പുഷ്പ തിയേറ്ററിലെത്തുന്നത്. പക്കാ മാസ് ത്രില്ലർ ആയാണ് പുഷ്പ 2 ഒരുക്കിയിരിക്കുന്നത് എന്ന സൂചനയാണ് ട്രെയിലർ നൽകുന്നത്. ആദ്യ ഭാഗത്തിന്റെ അവസാനത്തിൽ മാസ് വില്ലനായി എത്തിയ ഫഹദും അല്ലു അർജുനും തമ്മിലുള്ള ഫൈറ്റ് തന്നെയായിരിക്കും ചിത്രത്തിലെ ഹൈലൈറ്റ് എന്നത് ഉറപ്പാണ്. രണ്ടാം ഭാഗവും ഒരു വലിയ ബോക്‌സ് ഓഫീസ് പ്രതിഭാസമാകുമെന്നാണ് ആരാധകരുടെ പ്രതീക്ഷ. സിനിമ ഇറങ്ങുന്നതിന് ഒരു മാസം മുന്‍പേ തന്നെ കേരളത്തിലെ പുഷ്പ 2 ഫാന്‍സ് ഷോ ടിക്കറ്റുകള്‍ വിറ്റു തീര്‍ന്നിരിക്കുകയാണ്. കേരളക്കരയിലെ തിയേറ്ററുകളിൽ 24 മണിക്കൂറും പ്രദർശനമുണ്ടാകുമെന്ന് അറിയിച്ചിരിക്കുകയാണ് ഇ ഫോർ എന്‍റർടെയ്ൻമെന്‍റ്സ് സാരഥി മുകേഷ് ആർ മേത്ത. തിയേറ്ററുകള്‍തോറും ഇതുവരെ കാണാത്ത വിധത്തിലുള്ള ഗംഭീരമായ റിലീസിങ് മാമാങ്കത്തിനാണ് നിർമ്മാതാക്കൾ തയ്യാറെടുക്കുന്നുണ്ട്.