സിനിമ പ്രേമികള്‍ കാത്തിരിക്കുന്ന ചിത്രമാണ് കാന്താര 2. ചിത്രത്തിന്റെ ആദ്യ ഭാഗം മുന്‍വിധികള്‍ ഒന്നും ഇല്ലാതെ എത്തി വമ്പന്‍ ഹിറ്റ് ആയി മാറിയതാണ്. ചിത്രത്തിന് ദേശീയ അവാര്‍ഡും ലഭിച്ചിരുന്നു. മികച്ച നടനുള്ള ദേശീയ അവാര്‍ഡും ഋഷഭ് ഷെട്ടിക്കായിരുന്നു. അതുകൊണ്ട്‌ തന്നെ കാന്താര 2നെ കുറിച്ചും വലിയ പ്രതീക്ഷയാണ് പ്രേക്ഷകർക്ക് ഉള്ളത്.
ഇപ്പോഴിതാ കാത്തിരിപ്പിന് വിരാമമിട്ട് കൊണ്ട് ഋഷഭ് ഷെട്ടിയുടെ കാന്താരയുടെ തുടര്‍ച്ചയുടെ റിലീസ് തീയതി പ്രഖ്യാപിച്ചിരിക്കുകയാണ്. അടുത്ത വര്‍ഷം ഒക്ടോബര്‍ രണ്ടിനാണ് ചിത്രം പ്രദര്‍ശനത്തിനെത്തുക. പ്രീക്വലായിട്ടാണ് ഋഷഭ് ഷെട്ടി കാന്താരയുടെ തുടര്‍ച്ച ഒരുക്കുന്നത്.
ആരെക്കൊയാകും കാന്താരായുടെ തുടര്‍ച്ചയിലുണ്ടാകുക എന്ന ആകാംക്ഷയാണ് ഏറ്റവും കൂടുതൽ പ്രേക്ഷകർക്ക് ഉള്ളത്. മലയാളത്തിന്റെ സൂപ്പര്‍ താരങ്ങളില്‍ ചിലര്‍ കാന്താര 2 ന്റെ ഭാഗമാകുമെന്ന് അനൗദ്യോഗികമായ റിപ്പോര്‍ട്ടുകള്‍ ഉണ്ടായിരുന്നു. ജയറാമും മോഹൻലാലും കാന്താരയുടെ തുടര്‍ച്ചയില്‍ ഉണ്ടാകുമെന്ന് വാര്‍ത്തകള്‍ ഉണ്ടായെങ്കിലും ഇതുവരെ ഇക്കര്യത്തില്‍ സ്ഥിരീകരണമായിട്ടില്ല.