ഏറെ പ്രതീക്ഷയോടെ എത്തിയ സൂര്യയുടെ കങ്കുവ ബോക്സോഫീസില്‍ വന്‍ തിരിച്ചടിയാണ് സമ്മാനിച്ചിരുന്നത്. എന്നാല്‍ വരും ചിത്രങ്ങളിലൂടെ വീണ്ടും ഒരു തിരിച്ചുവരവ് നടത്തുകയാണ് താരം. സൂര്യ 44 എന്ന പേരില്‍ കാര്‍ത്തിക് സുബ്ബരാജ് ചിത്രമാണ് അടുത്തതായി സൂര്യയുടെ വരാന്‍ ഇരിക്കുന്ന ചിത്രം. ഈ ചിത്രം പോസ്റ്റ് പ്രൊഡക്ഷനിലാണ്. അതിന് പിന്നാലെ സൂര്യ 45 എന്ന ചിത്രവും പ്രഖ്യാപിച്ചിട്ടുണ്ട്. താൽക്കാലികമായി സൂര്യ 45 എന്ന് പേരിട്ടിരിക്കുന്ന ചിത്രം ഔപചാരിക പൂജ ചടങ്ങുകളോടെ കഴിഞ്ഞ ഒക്ടോബര്‍ 15നാണ് പ്രഖ്യാപിച്ചിരുന്നത്.
ഡ്രീം വാരിയർ പിക്‌ചേഴ്‌സ് നിർമ്മിക്കുന്ന ചിത്രം സംവിധാനം ചെയ്യുന്നത് നടനും സംവിധായകനുമായ ആര്‍ജെ ബാലാജിയാണ്. നിരൂപക പ്രശംസ നേടിയ നിരവധി ചിത്രങ്ങള്‍ എടുത്ത ഡ്രീം വാരിയർ പിക്‌ചേഴ്‌സിന്‍റെ ഏറ്റവും ചിലവേറിയ ചിത്രം ആയിരിക്കും സൂര്യ 45 എന്നാണ് കോളിവുഡിലെ സംസാരം. ഇപ്പോഴിതാ ചിത്രത്തിന്‍റെ പുതിയ അപ്ഡേഷന്‍ പുറത്തുവന്നിരിക്കുകയാണ്.
സൂര്യ 45 ചിത്രീകരണം ഈ വാരം കൊയമ്പത്തൂരില്‍ ആരംഭിക്കും. ഒരു ഗ്രാമീണ കഥയാണ് ചിത്രം പറയുന്നത് എന്നാണ് വിവരം. അതേ സമയം തൃഷ ആയിരിക്കും ചിത്രത്തിലെ നായിക എന്നാണ് വിവരം. മുന്‍പ് ആറു എന്ന ചിത്രത്തിലാണ് സൂര്യയുടെ നായികയായി തൃഷ എത്തിയിരുന്നു. ആർജെ ബാലാജി പതിവ് രീതിയില്‍ നിന്നും വ്യത്യസ്തമായ കഥയാണ് ഒരുക്കുന്നത് എന്നാണ് വിവരം. ഒരു വർഷത്തിലേറെ എടുത്താണ് ബാലാജി തിരക്കഥ വികസിപ്പിച്ചത്. ആക്ഷൻ-അഡ്വഞ്ചർ ഗണത്തില്‍ ഉൾപ്പെടുന്നതായിരിക്കും ചിത്രം. എആര്‍ റഹ്മാന്‍ ആണ് സൂര്യ 45ന് സംഗീതം നല്‍കുന്നത്.
STORY HIGHLIGHT: suriya 45 update