അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.അല്ലു അർജുൻ നായകനായ പുഷ്പയുടെ രണ്ടാം ഭാഗം, പുഷ്പ 2 ഡിസംബർ അഞ്ചിന് തിയേറ്ററുകളിലേക്ക് എത്തുകയാണ്. ചിത്രത്തിന്റെ പ്രമോഷൻ തിരക്കിലാണ് അല്ലു അർജുനും നായികയായ രശ്മിക മന്ദാനയും. പ്രമോഷനുമായി ബന്ധപ്പെട്ട് ഇരുവരും ഇന്നലെ കൊച്ചിയിൽ എത്തിയിരുന്നു. പുഷ്പ 2ൽ പ്രതിനായകനായി മലയാളത്തിന്റെ സ്വന്തം ഫഹദ് ഫാസിലും അഭിനയിക്കുന്നുണ്ട്. ഫഹദിന്റെ പ്രകടനത്തെ കുറിച്ച് അല്ലു അർജുൻ പറഞ്ഞ വാക്കുകളാണ് ഇപ്പോൾ ശ്രദ്ധ നേടുന്നത്.
പുഷ്പ രണ്ടാം ഭാഗത്തിൽ ഗംഭീരപ്രകടനമാണ് ഫഹദ് കാഴ്ച വച്ചതെന്നാണ് അല്ലുവിന്റെ വെളിപ്പെടുത്തൽ. ‘എല്ലാ മലയാളികള്‍ക്കും നമസ്‌കാരം. കേരളത്തിനോട് ദത്തുപുത്രനായ മല്ലു അര്‍ജുന്‍ സ്‌നേഹമറിയിക്കുകയാണ്. കേരളത്തിലേക്ക് വണ്ടി കയറുമ്പോള്‍ ഞാന്‍ സഹപ്രവര്‍ത്തകരോട് പറഞ്ഞത് എന്റെ സ്വന്തം നാടായ കേരളത്തിലേക്ക് സ്വാഗതമെന്നാണ്. കഴിഞ്ഞ 20 വര്‍ഷങ്ങളായി നിങ്ങളെനിക്ക് കണക്കറ്റ സ്‌നേഹം തന്നു. പുഷ്പയെന്ന ഈ സിനിമയ്ക്കായി മൂന്ന് വര്‍ഷത്തോളം നിങ്ങള്‍ കാത്തിരുന്നു. ഈ സ്‌നേഹത്തിന് നന്ദി പറയുകയാണ്. ഈ സിനിമ കുറേക്കാരണങ്ങളാല്‍ എനിക്ക് സ്‌പെഷ്യലാണ്. ആദ്യമായി മലയാളത്തിലെ വലിയ നടന്മാരിലൊരാളായ നമ്മുടെ സ്വന്തം ഫഫയോടൊപ്പം ഞാന്‍ അഭിനയിച്ചു. പുഷ്പ 2-ല്‍ ഫഹദ് ഫാസില്‍ തകര്‍ത്തടുക്കിയിട്ടുണ്ട്. രാജ്യം മുഴുവനുള്ള മലയാളികള്‍ക്ക് അഭിമാനിക്കാനുള്ള പ്രകടനമാണ് അദ്ദേഹം പുഷ്പ 2-ല്‍ കാഴ്ചവെച്ചിരിക്കുന്നത്. അത് ഞാന്‍ ഉറപ്പുതരാം.’ അല്ലു അർജുൻ പറഞ്ഞു.
മലയാളത്തിൽ വലിയൊരു ഫാൻ ബേസ് തന്നെ സ്വന്തമാക്കിയ അപൂർവ്വം തെലുങ്കു നടന്മാരിൽ ഒരാളാണ് അല്ലു അർജുൻ. പുഷ്പ 2ലെ ഒരു ഗാനം തുടങ്ങുന്നത് മലയാളത്തിലാണ്. ആറു ഭാഷകളിൽ ചിത്രം റിലീസ് ചെയ്യുമ്പോഴും ഈ വരികൾക്കു മാത്രം മാറ്റം കാണില്ലെന്നും അല്ലു വെളിപ്പെടുത്തി. സുകുമാർ സംവിധാനം ചെയ്ത പുഷ്പ ദ റൈസ്’ ആദ്യഭാഗം രണ്ട് ദേശീയ ചലച്ചിത്ര പുരസ്കാരങ്ങളും 7 സംസ്ഥാന ചലച്ചിത്ര പുരസ്കാരങ്ങളും നേടിയിരുന്നു. ‘പുഷ്പ ദ റൂൾ’ ഇതിന്‍റെ തുടർച്ചയായെത്തുമ്പോൾ സകല റെക്കോർഡുകളും കടപുഴകുമെന്നാണ് ആരാധകരുടെ കണക്ക്കൂട്ടൽ.
ചിത്രത്തിൽ അല്ലു അർജുന് പുറമെ രശ്മിക മന്ദാന, ഫഹദ് ഫാസിൽ, സുനിൽ, ജഗപതി ബാബു, പ്രകാശ് രാജ് തുടങ്ങിയവരാണ് പ്രധാന കഥാപാത്രങ്ങളായുള്ളത്. രണ്ടാം ഭാഗത്തിൽ എന്തൊക്കെ ട്വിസ്റ്റും ടേണും സംഭവിക്കുമെന്നാതാണ് ആരാധകർ ഏറെ കാത്തിരിക്കുന്ന വിഷയം.
STORY HIGHLIGHT: pushpa 2 allu arjun fahadh faasil praise
