അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.പന്തീരാങ്കാവ് ഗാര്ഹിക പീഡനക്കേസ് ഒരിക്കല് ഒത്തുതീര്പ്പായി പോയതാണ്. ആ സംഭവത്തില് പൊലീസുകാരന് പ്രതിയാകുകയും സിഐക്കു സസ്പെന്ഷന് ലഭിക്കുകയും ചെയ്തു. കഴിഞ്ഞ മേയ് 12 നാണ് പന്തീരാങ്കാവ് സ്വദേശി രാഹുല് പി.ഗോപാലിനെതിരെ നവവധു ആദ്യം ഗാര്ഹിക പീഡന പരാതി നല്കിയത്. എന്നാല് പിന്നീട് ഒരുമിച്ചു ജീവിക്കാനാണ് താല്പര്യമെന്നും കേസ് റദ്ദാക്കണമെന്നും ആവശ്യപ്പെട്ട് രാഹുലും പെണ്കുട്ടിയും ഹൈക്കോടതിയെ സമീപിച്ചു. കോടതി പൊലീസിന്റെ റിപ്പോര്ട്ട് തേടി.
പക്ഷേ രാഹുലിന് എതിരെയാണ് പൊലീസ് റിപ്പോര്ട്ട് നല്കിയത്. രാഹുല് ലഹരിമരുന്ന് ഉപയോഗിക്കാറുണ്ടെന്നും ഇത്തരം സംഭവങ്ങള് ആവര്ത്തിക്കാന് സാധ്യതയുണ്ടെന്നുമായിരുന്നു റിപ്പോര്ട്ട്. എന്നാല് ഇരുവര്ക്കും കൗണ്സലിങ് നല്കിയ ശേഷം ഒരുമിച്ച് ജീവിക്കാന് ഹൈക്കോടതി അനുവദിക്കുകയായിരുന്നു. അറസ്റ്റുണ്ടാവില്ല എന്നുറപ്പായ ശേഷമാണ് രാഹുല് വിദേശത്തുനിന്നു തിരിച്ചെത്തിയത്. അങ്ങനെ, അഞ്ചു പ്രതികളുള്ള കേസില് ഒന്നാം പ്രതി രാഹുല് മാത്രം അറസ്റ്റില്നിന്ന് രക്ഷപ്പെടുകയും കേസ് റദ്ദാക്കുകയും ചെയ്തു.
കോടതിയുടെ അനുമതിയോടെ ഒരുമിച്ച് ജീവിക്കുന്നതിനിടെയാണ് വീണ്ടും പരാതിയുണ്ടായത്. ഇത്തവണയും പെണ്കുട്ടി പരാതി നല്കാന് ആദ്യം തയാറായില്ല. പരുക്കുകളുമായി ആശുപത്രിയിലെത്തിയപ്പോള്, ഗാര്ഹിക പീഡനമാണെന്ന് ആശുപത്രി അധികൃതരാണ് പൊലീസിനെ അറിയിച്ചത്. തിങ്കളാഴ്ച രാത്രി തന്നെ പൊലീസ് രാഹുലിനെ പിടികൂടി. മദ്യലഹരിയിലായിരുന്നു ഇയാള്. തുടര്ന്ന് പെണ്കുട്ടിയുടെ വീട്ടുകാര് സ്ഥലത്തെത്തിയ ശേഷമാണു പരാതി നല്കിയത്. സാധ്യമായ എല്ലാ വകുപ്പുകളും രാഹുലിനെതിരെ ചുമത്തുകയും ചെയ്തു.
കസ്റ്റഡിയിലെടുത്ത രാഹുലിനെ വിടാന് പൊലീസ് തയാറായില്ല. മദ്യലഹരിയിലായതുകൊണ്ട് കരുതല് തടങ്കലില് വയ്ക്കുകയായിരുന്നു. തുടര്ന്ന് പരാതി ലഭിച്ചപ്പോള് വധശ്രമമടക്കമുള്ള വകുപ്പുകള് ചുമത്തി. പ്രതി റിമാന്ഡിലായി. ഹൈക്കോടതി റദ്ദാക്കിയ മുന് കേസു കൂടി വീണ്ടും ചുമത്താന് സാധിക്കുമോ എന്നാണ് പൊലീസ് പരിശോധിക്കുന്നത്. പെണ്കുട്ടി പഴയ പരാതി വീണ്ടും ഉന്നയിക്കാന് തയാറായാലേ പൊലീസിന് ഇക്കാര്യത്തില് മുന്നോട്ടുപോകാന് സാധിക്കൂ. അതിനാല് പ്രതിയെ പൊലീസ് കസ്റ്റഡിയില് ചോദിച്ചിട്ടില്ല. അതേസമയം, രാഹുലിന്റെ കേസ് ഏറ്റെടുക്കാന് ആദ്യത്തെ അഭിഭാഷകന് തയാറായിട്ടില്ല. മറ്റാരും ഇതുവരെ ഏറ്റെടുത്തതുമില്ല. അതിനാല് ജാമ്യ ഹര്ജി നല്കാന് രാഹുലിന് സാധിച്ചില്ല.
രാഹുല് ‘സൈക്കോ ടൈപ്’ ആണെന്നാണ് പെണ്കുട്ടിയുടെ അച്ഛന് ആരോപിച്ചത്. രാഹുല് വഞ്ചകനാണ്. ലഹരിമരുന്ന് സ്ഥിരമായി ഉപയോഗിക്കാറുണ്ട്. ആദ്യത്തെ പരാതി കൊടുത്തപ്പോള് മകള്ക്ക് മോഹനവാഗ്ദാനങ്ങളൊക്കെ നല്കി കേസില്നിന്ന് പിന്തിരിപ്പിക്കുകയാണുണ്ടായത്. കൈകൊണ്ട് മര്ദിച്ചതിനേക്കാള് വലിയ പീഡനം വാക്കുകള് കൊണ്ട് ഉണ്ടായിട്ടുണ്ട്. ഒരുമിച്ച് ജീവിക്കാന് ഇനി ആഗ്രഹിക്കുന്നില്ലെന്ന് അവള് തീര്ത്തു പറഞ്ഞു. അതിനാല് ഇനി ഈ കേസില് ഒരു ട്വിസ്റ്റ് ഉണ്ടാവില്ലെന്നും അച്ഛന് പറഞ്ഞു.
