ഏഷ്യന്‍ സിനിമാ ലോകത്ത് പ്രവര്‍ത്തിക്കുന്നവര്‍ക്ക് എന്നും പ്രചോദനമായ വ്യക്തിത്വമാണ് അരുണ വാസുദേവെന്ന് ചലച്ചിത്ര അക്കാദമി മുന്‍ വൈസ് ചെയര്‍പേഴ്‌സണ്‍ ബീനാ പോള്‍ അഭിപ്രായപ്പെട്ടു. ഓപ്പണ്‍ ഫോറത്തിന്റെ ഭാഗമായി സംഘടിപ്പിച്ച ‘റിമംബറിങ് അരുണ വാസുദേവ്’ പരിപാടിയിലാണ് ഏഷ്യന്‍ സിനിമയുടെ മാതാവ് എന്നറിയപ്പെടുന്ന ചലച്ചിത്ര നിരൂപക അരുണ വാസുദേവിനെ അനുസ്മരിച്ച് ബീന പോള്‍ സംസാരിച്ചത്.
സിനിമയില്‍ സ്ത്രീസാന്നിധ്യം കുറവായിരുന്ന സമയത്താണ് അരുണാ വാസുദേവ് ഈ മേഖലയിലേക്കെത്തുന്നതെന്ന് ബീനാ പോള്‍ പറഞ്ഞു. നിരവധി മുതിര്‍ന്ന സിനിമാപ്രവര്‍ത്തകര്‍ക്കൊപ്പം അവര്‍ പ്രവര്‍ത്തിച്ചിട്ടുണ്ട്. യാത്രകളിലൂടെയാണ് ഏഷ്യന്‍ സിനിമാലോകത്തെ കുറിച്ച് ലോകത്തിനുള്ള അജ്ഞത അരുണ മനസ്സിലാക്കിയത്. പാശ്ചാത്യര്‍ ഏഷ്യന്‍ സിനിമകള്‍ക്ക് വേണ്ടത്ര പ്രാധാന്യം നല്‍കുന്നില്ല എന്ന തിരിച്ചറിവും ഇതിലൂടെ ഉണ്ടായി. സാംസ്‌കാരിക കെട്ടുപാടുകളില്‍ കുടുങ്ങി പലപ്പോഴും ഏഷ്യന്‍ സിനിമകള്‍ ലോകത്തിന്റെ ശ്രദ്ധയില്‍പ്പെടാറില്ല എന്നും അരുണ മനസ്സിലാക്കി. ഏഷ്യന്‍ സിനിമകളെ ലോകോത്തര നിലവാരത്തില്‍ എത്തിക്കുന്നതില്‍ പ്രധാന പങ്ക് വഹിക്കാന്‍ അവര്‍ക്കു കഴിഞ്ഞു. സിനിമയില്‍ സ്ത്രീസാന്നിധ്യം വര്‍ധിപ്പിക്കുക എന്ന ലക്ഷ്യവും അവര്‍ക്കുണ്ടായിരുന്നെന്നും ബീനാ പോള്‍ പറഞ്ഞു.
ഏഷ്യന്‍ സിനിമയെക്കുറിച്ച് ആധികാരികമായ നിരവധി പുസ്തകങ്ങള്‍ എഴുതിയ വ്യക്തിയായിരുന്നു അരുണാ വാസുദേവെന്ന് ആശംസാപ്രസംഗം നടത്തിയ ചലച്ചിത്ര അക്കാദമി ചെയര്‍മാന്‍ പ്രേംകുമാര്‍ പറഞ്ഞു. സിനിമയുടെ സാങ്കേതികമേഖലയില്‍ സ്ത്രീസാന്നിധ്യം കുറവായിരുന്ന ഒരു കാലഘട്ടത്തിലായിരുന്നു അരുണയുടെ സിനിമാ പ്രവേശനമെന്നും അദ്ദേഹം കൂട്ടിച്ചേര്‍ത്തു. പരിപാടിയില്‍ നെറ്റ്പാക്ക് അംഗങ്ങളായ നോമ്മുന്‍സുല്‍ തുര്‍മുഖ്, ഗുല്‍ബാര, ദീപ ഗലോട്ട് എന്നിവര്‍ പങ്കെടുത്തു.