കാലിക പ്രസക്തമായ സിനിമകള്‍ സംവിധാനം ചെയ്യാന്‍ സ്പിരിറ്റ് ഓഫ് സിനിമ അവാര്‍ഡ് പ്രചോദനമാകുമെന്ന് അവാര്‍ഡ് ജേതാവും ‘ഓള്‍ വി ഇമാജിന്‍ ആസ് ലൈറ്റി’ന്റെ സംവിധായികയുമായ പായല്‍ കപാഡിയ പറഞ്ഞു. 29-ാമത് കേരള രാജ്യാന്തര ചലച്ചിത്ര മേളയുടെ സമാപന സമ്മേളനത്തില്‍ മുഖ്യമന്ത്രി പിണറായി വിജയനില്‍ നിന്നും പുരസ്‌കാരം ഏറ്റുവാങ്ങി സംസാരിക്കുകയായിരുന്നു പായല്‍. മലയാളത്തില്‍ സിനിമയെടുത്തത് ഒരു തരത്തില്‍ ഭ്രാന്തന്‍ ആശയമായിരുന്നു. പക്ഷെ കേരളത്തില്‍ ഈ സിനിമക്ക് ലഭിച്ച പിന്തുണയില്‍ ഏറെ അഭിമാനമുണ്ട്. ഈ അംഗീകാരം ഏറെ സന്തോഷത്തോടെയാണ് സ്വീകരിക്കുന്നത്. എന്റെ സിനിമയിലെ അഭിനേത്രിമാര്‍ നിരവധി പുരസ്‌കാരങ്ങള്‍ നേടിക്കഴിഞ്ഞു എന്നതിലും അഭിമാനമുണ്ടെന്നും പായല്‍ കപാഡിയ പറഞ്ഞു. ഓള്‍ വി ഇമാജിന്‍ ആസ് ലൈറ്റിലെ അഭിനേത്രിമാരായ കനി കുസൃതിയും ദിവ്യ പ്രഭയും സദസ്സില്‍ സന്നിഹിതരായിരുന്നു.