അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.സിനിമകൾ കാണാൻ എല്ലാവർക്കും ഇഷ്ടമാണ്. പല കാറ്റഗറിയിലെ ചിത്രങ്ങളാണ് ആളുകൾ കാണുന്നത്. അതിൽ ത്രില്ലറുകളും ഹൊററും കോമഡിയും റൊമാൻസും എല്ലാം ഉൾപ്പെടും. സിനിമകൾ പലപ്പോഴും തിയേറ്ററുകളിൽ പോയി കാണാനാണ് ആളുകൾ താൽപര്യം കാണിക്കുന്നത്. കാരണം തീയറ്റർ എക്സ്പീരിയൻസ് ചില സിനിമകൾക്ക് അത്യാവശ്യമാണ്. വീട്ടിലിരുന്ന് ഒരു സിനിമ കാണുമ്പോൾ ഉണ്ടാകുന്ന അനുഭവം ആയിരിക്കില്ല അതേ സിനിമ തിയേറ്ററിൽ കാണുമ്പോൾ പലർക്കും തോന്നുക. അതുകൊണ്ട് സിനിമകളുടെ തീയറ്റർ എക്സ്പീരിയൻസ് എന്ന് പറയുന്നതിലും കുറച്ചു കാര്യമൊക്കെയുണ്ട്.
ക്രിസ്മസ് റിലീസായി തിയേറ്ററുകളെ ഹരം കൊള്ളിച്ചു കൊണ്ടിരിക്കുന്ന മാർക്കോ എന്ന ചിത്രത്തെക്കുറിച്ച് എല്ലാവരും കേട്ടിട്ടുണ്ടാകും. ഉണ്ണി മുകുന്ദൻ നായകനായ ചിത്രത്തിന് വൻ ജനപ്രീതിയാണ് ലഭിച്ചുകൊണ്ടിരിക്കുന്നത്. സിനിമയും അതിലെ വയലൻസുമാണ് ഇപ്പോൾ സോഷ്യൽ മീഡിയയിലെ ചർച്ച. സിനിമ കണ്ട് പലർക്കും ബോധക്ഷയം ഉണ്ടായെന്നും ഛർദ്ദിച്ചു എന്നുള്ള വാർത്തകൾ വരെ പുറത്തുവന്നിരുന്നു. വലിയൊരു ശതമാനം ആളുകൾ തങ്ങളും വല്ലാതെ പേടിക്കുമോ എന്ന ആശങ്കയോട് കൂടിയാണ് സിനിമ കാണാൻ കയറിയത്. ഭയന്ന പോലൊരു മാനസികാവസ്ഥയിൽ ആയിരുന്നില്ല സിനിമ കണ്ട് ഇറങ്ങിയത്. സിനിമയാണെന്നും ഇതിലെ അഭിനയമാണെന്നും ഇതെല്ലാം ഗ്രാഫിക്സ് ആണെന്ന് ഉള്ള ഒരു ബോധ്യം മനസ്സിൽ ഉണ്ടായിരുന്നു. എന്നാൽ എല്ലാവരും അങ്ങനെ ചിന്തിക്കണമെന്ന് ഇല്ലല്ലോ. അതുകൊണ്ടാണ് വയലൻസും ഹൊററും സിനിമകൾ കണ്ട് പലർക്കും ഉറക്കം പോലും പോകുന്നത്.
സിനിമകൾ നമ്മുടെ നിത്യജീവിതത്തിൽ വളരെയേറെ സ്വാധീനം ചെലുത്തുന്ന ഒന്നാണ്. ഭക്ഷണം, പ്രണയം അങ്ങനെ പല കാര്യങ്ങളിലും സിനിമ നമ്മളെ സ്വാധീനിക്കാറുണ്ട്. സിനിമയിലെ പോലെ പ്രണയിക്കുക, സിനിമയിലെ ഭക്ഷണങ്ങൾ ട്രൈ ചെയ്യുക, സ്ഥലങ്ങളിൽ പോകുക, സിനിമയിൽ കാണിച്ചിരിക്കുന്നതുപോലെ ക്രൈം വരെ ചെയ്യുക അതൊക്കെയാണ് ഇന്നത്തെ കാലത്ത് നടക്കുന്നത്. മാർക്കോ കണ്ട് ഛർദ്ദിച്ചു, തല ചുറ്റി വീണു മുതലായ സംഭവങ്ങൾ കഴിഞ്ഞ ഇടയ്ക്ക് നമ്മൾ കേട്ടു. ചോര തെറിപ്പിക്കുന്ന പ്രകടനങ്ങൾ മാത്രമല്ല കാണികളിൽ ഭയം ഉണ്ടാക്കുന്നത്. സ്വന്തം ജീവിതത്തിൽ ഇതൊക്കെ സംഭവിക്കുമോ എന്ന് ഭയക്കുന്ന കാര്യങ്ങൾ സിനിമയിൽ കണ്ടാലും നമ്മൾക്ക് പേടി ഉണ്ടാകും.
വളരെ വൈകാരികമായി ചിന്തിക്കുന്നവരും, സഹജീവിയോട് അനുകമ്പ കൂടുതലുള്ള വ്യക്തികൾ, ചോര കണ്ടാൽ പേടി തോന്നുന്ന ആളുകൾ, ജീവിതത്തിൽ അതിക്രമത്തിന് ഇരയായിട്ടുള്ള ആളുകൾ, കാട് കയറി ചിന്തിക്കുന്നവരോ ഉത്കണ്ഠയോ ഉള്ള ആളുകൾ, മരണഭയം ഉള്ളവർ എല്ലാം മാർക്കോ ഉൾപ്പടെയുള്ള വയലൻസ് കൂടിയ സിനിമകൾ ഒഴിവാക്കുന്നതാണ് മാനസികാരോഗ്യത്തിന് നല്ലത്. വയലൻസ് ആസ്വദിക്കുന്ന ഒരു കൂട്ടം ആളുകൾ നമ്മുടെ സമൂഹത്തിൽ ഉണ്ട്. കൊല്ലാനും, സ്ത്രീകളോടും കുട്ടികളോടും അതിക്രമം ചെയ്യാനും, മോഷ്ടിക്കാനും, മറ്റുള്ളവർക്ക് ദോഷം ചെയ്യാനും, ചതിക്കാനും ഒന്നും മടിയില്ലാത്തവർ. ചെറിയ പ്രായം മുതലേ അത്തരം പ്രവണതകൾ അത്തരം മനോഭാവം ഉള്ളവർ കാണിച്ചു തുടങ്ങും. അതുകൊണ്ടുതന്നെ അങ്ങനെ അക്രമവാസനയുള്ള ആളുകൾ, പ്രത്യേകിച്ചു കൗമാരക്കാർ ഇത്തരം ചിത്രങ്ങൾ കാണുന്നത് മോശമായി സ്വാധീനിക്കാൻ സാധ്യതയുണ്ട്. കൗതുകം തോന്നുകയും ചുറ്റുമുള്ളവയെ ആലോചന കൂടാതെ അനുകരിക്കുകയും ചെയ്യാൻ സാധ്യത കൂടുതൽ കൗമാരക്കാരിലാണ്.
മാർക്കോ പേടിപ്പിക്കാൻ കാരണം?
കുട്ടികൾക്ക് പേടിയുണ്ടാക്കുന്ന പല സീനുകളും സിനിമയിൽ ഉണ്ട്. അതുകൊണ്ടു തന്നെ ഒരു A റേറ്റഡ് സിനിമയാണ്. ഓൺലൈൻ പ്ലാറ്റ്ഫോമിലൂടെ കുട്ടികൾ സിനിമ കണ്ടാൽ, ആ സിനിമയിലെ കുട്ടികൾക്ക് വന്ന അവസ്ഥ തനിക്കും ഉണ്ടാകുമോ എന്നായിരിക്കാം മുതിർന്നവരോട് ചോദിക്കാൻ സാധ്യത. എല്ലാവരും എന്തിനാണ് പരസ്പരം കൊല്ലുന്നത് എന്ന ചോദ്യവും കുട്ടികളിൽ നിന്ന് പ്രതീക്ഷിക്കേണ്ടി വരും. മാർക്കോ പോലെയുള്ള സിനിമയിലെ വയലൻസ് കണ്ട് നമ്മൾ മലയാള സിനിമ പ്രേക്ഷകർക്ക് അത്ര ശീലമില്ല. പക്ഷേ വിവിധ ഭാഷകളിൽ പല ജോണറുകൾ (ഉദാ:slasher movies) കണ്ടു ശീലിച്ച ചെറുപ്പക്കാർക്ക് ഇത് പുതുമ ആയിരിക്കില്ല.
വയലൻസ് ഇഷ്ടപ്പെടാൻ കാരണം?
ജീവിതത്തിൽ ആരെയെങ്കിലും കൊന്നുകളയണം എന്നപോലെ ക്രൂരമായ മാനസികാവസ്ഥ ഉള്ളവർ, ഫ്രസ്ട്രേഷൻ അനുഭവിക്കുന്നവർ ഒക്കെ വയലിൻസിനെ ഇഷ്ടപ്പെട്ടേക്കാം. അവർ സിനിമ കാണുന്ന സമയം സ്വയം വില്ലനോ നായകനോ ആണ് എന്ന് തോന്നിപ്പോയേക്കാം. സ്ഥിരമായി വീട്ടിലും ചുറ്റുപാടും അക്രമ സ്വഭാവം കാണുന്ന ആളുകൾക്ക്/ കുട്ടികൾക്ക് അക്രമ വാസന ഉണ്ടാകും എന്നാണ് പഠനങ്ങൾ പറയുന്നത്. അതുപോലെ തന്നെ സ്ഥിരമായി വയലൻസ് ഉള്ള സിനിമകൾ കാണുന്നത് അവരുടെ മനോഭാവത്തെ സമൂഹത്തിന് എതിരായിമാറാൻ കാരണമായേക്കാം. അതുകൊണ്ട് വയലെൻസ് നോർമൽ ആണ്, മറ്റുള്ളവരെ ഉപദ്രവിക്കുന്നതിൽ തെറ്റില്ല എന്നുള്ള മനോഭാവം സമൂഹത്തെ ദോഷകരമായി ബാധിക്കും.
CONTENT HIGHLIGHT: malayalam cinema violence and mental health
