അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.ദുബായ് നഗരത്തെക്കുറിച്ച് ആലോചിക്കുമ്പോൾ ആദ്യം ഓർമയിലെത്തുക ലോകത്തിലെ ഏറ്റവും ഉയരമുള്ള അംബരചുംബിയായ ബുർജ് ഖലീഫയാണ്. നിരവധി പ്രതിസന്ധികൾ അതിജീവിച്ചാണ് ഇത്രയും ഉയരമുള്ള കെട്ടിടം പടുത്തുയർത്തിയത്. എന്നാൽ എല്ലാ ആശങ്കകളെയും അസ്ഥാനത്താക്കി ബുർജ് ഖലീഫ പതിനഞ്ചാം വയസ്സിലും തലയുയർത്തി നിൽക്കുന്നു. അഭിലാഷത്തിൻ്റെയും പുതുമയുടെയും പ്രതീകമായി ഒന്നരപതിറ്റാണ്ടുകാലമായി ബുർജ് നിലകൊള്ളുന്നു. നഗരത്തിലെ ആധുനിക ചാരുതയുടെ പര്യായമായ ലോകത്തിലെ ഏറ്റവും ഉയരം കൂടിയ കെട്ടിടം ജനുവരി 4 ന് അതിൻ്റെ 15-ാം വാർഷികം ആഘോഷിക്കുകയാണ്.
മണൽപ്രദേശമായ ദുബായിൽ അനേകം നിലകളുള്ള കെട്ടിടത്തിന്റെ സ്ഥിരതയെക്കുറിച്ചുള്ള ആശങ്ക പോലും നിർമാണഘട്ടത്തിൽ നിലനിന്നിരുന്നു. എന്നാൽ എല്ലാ ആശങ്കകളും പ്രതിബന്ധങ്ങളും ദൂരീകരിച്ച് ബുർജ് ഖലീഫ ആധുനികലോകത്ത് അത്ഭുതമായുയർന്നു. ബുർജ് ഖലീഫയുടെ ചിത്രങ്ങളോ വീഡിയോ ദൃശ്യങ്ങളോ കാണുമ്പോൾ ആ സൗധത്തെ നേരിട്ടുകാണാനുള്ള ആഗ്രഹം ഒരിക്കലെങ്കിലും തോന്നാത്തവർ വിരളമായിരിക്കും.
2004 ലാണ് ബുർജ് ഖലീഫയുടെ നിർമാണപ്രവർത്തനം ആരംഭിച്ചത്. അഞ്ച് വർഷക്കാലം കൊണ്ട് കെട്ടിടത്തിന്റെ ബാഹ്യമായുള്ള പണികൾ പൂർത്തിയായി. 828 മീറ്റർ (2,716.5 അടി) ഉയരമുള്ള കെട്ടിടത്തിന് 163 നിലകളുണ്ട്. 2010 ജനുവരിയിൽ ബുർജ് ഖലീഫയുടെ ഔദ്യോഗിക ഉദ്ഘാടനം നടന്നു. മുഹമ്മദ് കജൂർ അലബ്ബാറിന്റെ ഉടമസ്ഥയിലുള്ള റൽ എസ്റ്റേറ്റ് കമ്പനിയായ എമാർ പ്രോപർട്ടീസിന്റേതാണ് ബുർജ് ഖലീഫ. അതസേമയം, ഈ കെട്ടിടത്തിന്റെ നിർമാണപ്രവർത്തനങ്ങളുടെ ചുമതല ദക്ഷിണ കൊറിയൻ കമ്പനിയായ സാംസങ് സി & ടി, യുഎഇയിലെ ആരബ്ടെക്, ബെൽജിയം കമ്പനിയായ ബെസിക്സ് എന്നിവയ്ക്കായിരുന്നു. ദുബായ് മാൾ ഉൾപ്പെടെയുള്ളവയുടെ നിർമാണം നടത്തിയത് എമാർ കമ്പനിയായിരുന്നു.
നിരവധി ലോകറെക്കോഡുകളും ഈ കെട്ടിടത്തിന് സ്വന്തം. ഏറ്റവും ഉയരമുള്ള നിർമിതി, സ്വതന്ത്രമായി നിലയുറപ്പിച്ചിരിക്കുന്ന ഏറ്റവും ഉയരമുള്ള നിർമിതി, ഏറ്റവുമധികം നിലകളുള്ള കെട്ടിടം, പുറംകാഴ്ചകൾ വീക്ഷിക്കുന്നതിനായി ഏറ്റവും ഉയരത്തിലുള്ള മേൽത്തട്ട്, ഏറ്റവും ദൈർഘ്യമേറിയ ലിഫ്റ്റ് യാത്ര, ഏറ്റവും ഉയരമുള്ള ലിഫ്റ്റ് യാത്ര തുടങ്ങിയ റെക്കോഡുകൾ ബുർജ് ഖലീഫയ്ക്കുണ്ട്.
