അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.82-ാത് ഗോൾഡൻ ഗ്ലോബ് പുരസ്‌കാരങ്ങൾ പ്രഖ്യാപിച്ചു. മികച്ച ഇംഗ്ലീഷ് ഇതരഭാഷാ ചിത്രത്തിനുള്ള പുരസ്കാരം ‘ഓള്‍ വി ഇമേജിന്‍ ആസ് ലൈറ്റ്’ ചിത്രത്തിന് നഷ്ടമായി. ഫ്രഞ്ച് ചിത്രമായ എമിലിയ പെരെസ് ആണ് ഈ വിഭാഗത്തിൽ പുരസ്കാരം നേടിയത്. മികച്ച സംവിധായകയ്ക്കുള്ള പുരസ്കാരം പായല്‍ കപാഡിയയ്ക്കും നഷ്ടമായി. ബ്രാഡി കോർബറ്റിനാണ് പുരസ്കാരം ലഭിച്ചത്. ദ ബ്രൂട്ടലിസ്റ്റ് എന്ന ചിത്രത്തിലൂടെയാണ് ബ്രാഡി പുരസ്കാരത്തിന് അർഹനായത്. മികച്ച ഇംഗ്ലീഷ് ഇതര ഭാഷ ചിത്രം, മികച്ച സംവിധാനം എന്നീ നോമിനേഷനുകളിലാണ് ‘ഓള്‍ വി ഇമേജിന്‍ ആസ് ലൈറ്റ്’ മത്സരിച്ചിരുന്നത്. എന്നാൽ ഈ രണ്ടു വിഭാഗങ്ങളിലും ഇന്ത്യയുടെ പ്രതീക്ഷ നഷ്ടമായിരിക്കുകയാണ്.
സംഗീത ഹാസ്യ പ്രാധാന്യമുള്ള സിനിമാ വിഭാഗത്തിൽ മികച്ച നടിക്കുള്ള പുരസ്കാരം സബ്സ്റ്റൻസ് എന്ന ചിത്രത്തിലൂടെ ഡെമി മൂറി സ്വന്തമാക്കി. ‘എ ഡിഫറൻറ് മാൻ’ എന്ന ചിത്രത്തിലൂടെ സംഗീത, ഹാസ്യ പ്രാധാന്യമുള്ള സിനിമയിലെ മികച്ച നടനായി സെബാസ്റ്റ്യൻ സ്റ്റാൻ തിരഞ്ഞെടുക്കപ്പെട്ടു.
പായൽ കപാഡിയ സംവിധാനം ചെയ്ത ‘ഓള്‍ വി ഇമാജിന്‍ ആസ് ലൈറ്റ്’ അന്താരാഷ്ട്ര തലത്തിൽ തരംഗങ്ങൾ സൃഷ്ടിച്ച ഒന്നായിരുന്നു. 77-ാമത് കാൻ ഫിലിം ഫെസ്റ്റിവലിൽ ഗ്രാൻഡ് പ്രിക്സ് നേടിയ ആദ്യ ഇന്ത്യൻ ചിത്രം ഗോള്‍ഡന്‍ ഗ്ലോബ് പുരസ്കാരത്തിന് കൂടി മത്സരിക്കുമ്പോൾ വലിയ പ്രതീക്ഷയായിരുന്നു ഇന്ത്യക്കാർക്ക് ഉണ്ടായിരുന്നത്. ഗോള്‍ഡന്‍ ഗ്ലോബിൽ നിരാശയാണ് ഫലമെങ്കിലും ഇന്ത്യൻ സിനിമയുടെ ചരിത്രത്തിൽ തന്നെ പുതിയൊരു അധ്യായം കുറിച്ച ചിത്രമാണ് ‘ഓള്‍ വി ഇമേജിന്‍ ആസ് ലൈറ്റ്’. മുപ്പത് വർഷങ്ങൾക്ക് ശേഷം കാൻ ചലച്ചിത്ര മേളയിൽ പ്രദർശിപ്പിച്ച ഈ ചിത്രം കേവലം ഒരു അവാർഡിനപ്പുറം ഇന്ത്യൻ സിനിമയുടെ സാധ്യതകളെ ലോകത്തിന് മുന്നിൽ തുറന്നുകാട്ടുകയായിരുന്നു. ‘ഓൾ വി ഇമാജിൻ ആസ് ലൈറ്റ്’ ഇറ്റലിയിലെ ചലച്ചിത്രോത്സവത്തിലും ശ്രദ്ധ നേടി. മുന്‍ അമേരിക്കന്‍ പ്രസിഡന്റ് ബരാക്ക് ഒബാമയുടെ 2024ലെ പ്രിയപ്പെട്ട ചലച്ചിത്രങ്ങളുടെ പട്ടികയിലും പായല്‍ കപാഡിയ ചിത്രം ‘ഓള്‍ വി ഇമാജിന്‍ ആസ് ലൈറ്റ്’ ഇടം പിടിച്ചിരുന്നു.
ഫ്രാൻസിലെയും ഇന്ത്യയിലെയും നിർമാണ കമ്പനികളുടെ പങ്കാളിത്തത്തോടെയാണ് ചിത്രം നിർമിച്ചിരിക്കുന്നത്. പായൽ കപാഡിയയുടെ ആദ്യ ഫീച്ചർ ഫിലിം കൂടിയായ ‘ഓൾ വി ഇമാജിൻ ആസ് ലൈറ്റ്’ മുംബൈയിലെ രണ്ട് നഴ്സുമാരുടെ ജീവിതത്തിന്റെ കഥ പറയുന്നു. മലയാളികളായ കനി കുസൃതി, ദിവ്യ പ്രഭ, അസീസ് നെടുമങ്ങാട് എന്നിവർക്കൊപ്പം ഛായാ കദം, ഹൃദു ഹാറൂൺ എന്നിവരാണ് ചിത്രത്തിൽ പ്രധാന കഥാപാത്രങ്ങളെ അവതരിപ്പിച്ചിരിക്കുന്നത്. ചിത്രത്തിലെ പകുതിയിലേറെ സംഭാഷണങ്ങളും മലയാളത്തിലാണ്. മുംബൈയിലും രത്‌നഗിരിയിലുമായാണ് സിനിമ ചിത്രീകരിച്ചിരിക്കുന്നത്. സിനിമയുടെ തിരക്കഥാകൃത്തും പായൽ കപാഡിയയാണ്.
റാണ ദഗുബാട്ടിയുടെ സ്പിരിറ്റ് മീഡിയയാണ് ചിത്രം ഇന്ത്യയിൽ വിതരണം ചെയ്തത്. ലോകമെമ്പാടും നിരൂപക പ്രശംസ നേടിയ ‘ഓൾ വി ഇമാജിൻ ആസ് ലൈറ്റ്’ ടെല്ലുരൈഡ് ഫിലിം ഫെസ്റ്റിവൽ, ടൊറന്റോ ഇന്റർനാഷണൽ ഫിലിം ഫെസ്റ്റിവൽ, ന്യൂയോർക്ക് ഫിലിം ഫെസ്റ്റിവൽ, സാൻ സെബാസ്റ്റ്യൻ ഫിലിം ഫെസ്റ്റിവൽ തുടങ്ങിയ പ്രശസ്ത ചലച്ചിത്രോത്സവങ്ങളിലും പ്രദർശിപ്പിച്ചിട്ടുണ്ട്.
