ബിഗ് ബോസ് റിയാലിറ്റി ഷോ താരം സിജോയുടെ വിവാഹച്ചടങ്ങിലെ വീഡിയോ സൃഷ്ടിച്ച വിവാദങ്ങള്‍ക്ക് അവസാനമില്ല. വിവാഹസല്‍ക്കാരത്തിനിടെ നോറ മസ്ക്കാന്‍ എന്ന സുഹൃത്ത് സിജോയുടെ മുഖത്ത് കേക്ക് തേക്കുന്ന വിഡിയോ സാമൂഹ്യമാധ്യമങ്ങളില്‍ പ്രചരിച്ചിരുന്നു. നോറയും ഈ വിഡിയോ തന്റെ സാമൂഹ്യമാധ്യമ അക്കൗണ്ടില്‍ പങ്കുവച്ചു. ഈ വീഡിയോ സംബന്ധിച്ച് സോഷ്യല്‍ മീഡിയ ഇന്‍ഫ്ളുവന്‍സറായ ദിയ കൃഷ്ണ എഴുതിയ കുറിപ്പാണ് വിവാദങ്ങള്‍ക്ക് തുടക്കമിട്ടത്. ‘ഇവര്‍ ആരാണെന്ന് എനിക്ക് അറിയില്ല. പക്ഷേ ഞങ്ങളുടെ വിവാഹ ദിവസം എന്റെ ഭര്‍ത്താവിനോടാണ് ഇങ്ങനെ ചെയ്തിരുന്നതെങ്കില്‍ പിന്നീടൊരു ദിവസം കൂടി കേക്ക് കഴിക്കാനായി അവര്‍ ഉണ്ടാകില്ല’ എന്നായിരുന്നു ദിയയുടെ ഇൻസ്റ്റാഗ്രാം സ്റ്റോറി.
ഇതിനെതിരെ സിജോയും ഭാര്യയുയും ചേര്‍ന്ന് വീഡിയോ ചെയ്തു. ഇങ്ങനെ ഒരു തമാശ ചെയ്യുമെന്ന് നോറ നേരത്തെ പറഞ്ഞിരുന്നെന്നും അതില്‍ തങ്ങള്‍ സുഹൃത്തുക്കള്‍ സന്തോഷവാന്‍മാരാണെന്നുമായിരുന്നു സിജോയുടെ പ്രതികരണം. ഭാര്യയായ തനിക്ക് അതില്‍ അനിഷ്ടമോ അതൃപ്തിയോ ഇല്ലെന്ന് ലിനുവും കൂട്ടിച്ചേര്‍ത്തു.
ഇതിനെതിരെയാണ് ഇപ്പോള്‍ ദിയ വീണ്ടും രംഗത്തെത്തിയിരിക്കുന്നത്. സിജോയെയും നോറയെയും തനിക്ക് യാതൊരു പരിചയവും ഇല്ലെന്നും അവരൊക്കെ ബിഗ് ബോസ് മത്സരാര്ഥികളായിരുന്നു എന്ന് അറിഞ്ഞിട്ടല്ല താൻ പ്രതികരിച്ചത് എന്നും ദിയ പറഞ്ഞു. താൻ ആ വ്യക്തികളെ യാതൊരു വിധത്തിലും പരാമർശിച്ചട്ടില്ല പകരം തന്റെ കൂട്ടുകാർ അങ്ങനെ ചെയ്താൽ താൻ പെരുമാറുന്നത് എങ്ങനെയായിരിക്കും എന്ന് പറഞ്ഞതാണ്. തന്നേയും തൻറെ തന്റെ കുടുംബത്തെയും ടാർഗറ്റ് ചെയ്തുകൊണ്ടുള്ള വധൂവരന്മാരുടെ വിഡിയോ തന്നെ ഞെട്ടിച്ചു എന്ന് ദിയ കൃഷ്ണ പറയുന്നു. നിങ്ങളുടെ കൂട്ടുകാർ ചിലപ്പോൾ ഭക്ഷണം പാഴാക്കുന്നവരും കൂട്ടുകാരെ പോലും ആക്രമിക്കുന്നവരുമായിരിക്കും എന്നാൽ തന്റേത് അങ്ങനെയല്ലെന്നും ഒരു പൊതു പ്ലാറ്റ്‌ഫോമിൽ വന്ന വീഡിയോയ്ക്കുള്ള പ്രതികരണമായാണ് താൻ നടത്തിയതെന്നും ദിയ കൃഷ്ണ ഇൻസ്റ്റാഗ്രാം സ്റ്റോറിൽ പങ്കുവച്ച കുറിപ്പിൽ പറയുന്നു.
ദിയയുടെ വാക്കുകൾ
‘എന്റെ ഫോളോവേഴ്‌സിൽ ചിലർ ചില യൂട്യൂബർമാരുടെ വീഡിയോകൾ ഷെയർ ചെയ്യുകയും അത് ഒന്ന് നോക്കണമെന്ന് എന്നോട് ആവശ്യപ്പെടുകയും ചെയ്തിരുന്നു. ഇന്നലെ ഞാൻ ഒരു ദമ്പതികളുടെ വീഡിയോ പോസ്റ്റ് ചെയ്തിരുന്നു. അതിൽ അവരുടെ സുഹൃത്ത് വരന് നേരെ കേക്ക് എറിയുന്നത് കണ്ടു. വിവാഹവേഷത്തിൽ നിൽക്കുന്ന വരന് സംഭവിച്ചതും ഭക്ഷണം പാഴാക്കിയതും കാരണം ആ വീഡിയോ കണ്ടപ്പോൾ എനിക്ക് വളരെ സങ്കടവും ദേഷ്യവും തോന്നി. എൻ്റെ പങ്കാളിക്ക് അങ്ങനെ സംഭവിച്ചാൽ അവനോട് അത് ചെയ്യുന്നവരെ ഞാൻ കൊല്ലുമെന്ന് പറയുകയും ചെയ്തു. ആ വീഡിയോയിൽ ഉള്ള ആരെയും എനിക്ക് പരിചയമില്ല. ഞാൻ ആ വീഡിയോയിൽ ആരെയും വ്യക്തിപരമായി ഉപദ്രവിച്ചതുമില്ല.
പിന്നീടാണ് അറിഞ്ഞത് അവരെല്ലാം ബിഗ് ബോസ് മത്സരാർത്ഥികളായിരുന്നു എന്ന്. ഞാൻ ബിഗ് ബോസ് കാണാത്തതുകൊണ്ട് അവരെയൊന്നും അറിയില്ലായിരുന്നു. എന്നാൽ പിന്നീട് കണ്ട പ്രതികരണ വിഡിയോകൾ കാഴ്ചക്കാരെ കിട്ടാൻ വേണ്ടി മാത്രം കെട്ടിച്ചമച്ചതാണെന്നു എനിക്ക് തോന്നി. ആ വിഡിയോയിൽ ഉണ്ടായിരുന്ന വധൂവരന്മാർക്ക് ഒരു യൂട്യൂബ് ചാനൽ ഉണ്ടായിരുന്നു. ആ ചാനലിൽ വന്നിരുന്നു എനിക്കും കുടുംബത്തിനും എതിരെ മോശം പറഞ്ഞത് എന്നെ ഞെട്ടിച്ചു. എന്റെ കുടുംബം ഈ വിഷയത്തിൽ ഉൾപ്പെട്ടിട്ടില്ല എന്നത് പ്രധാന കാര്യമാണ്. പിന്നെ, നിങ്ങളുടെ ഭാര്യയെ കുറിച്ചല്ല ഞാൻ അഭിപ്രയം പറഞ്ഞത്. ആ നേരത്തെ ഇമോഷനെ പറ്റിയാണ്. ഞാൻ പറഞ്ഞത്, എന്റെ കൂട്ടുകാരിൽ ആരെങ്കിലുമാണ് അങ്ങനെ ചെയ്തതെങ്കിൽ ഞാൻ അവരെ കൊല്ലുമായിരുന്നു എന്നാണ്. നിങ്ങളുടെ കൂട്ടുകാർ ചിലപ്പോൾ ഭക്ഷണം പാഴാക്കുന്നവരും കൂട്ടുകാരെ പോലും ആക്രമിക്കുന്നവരുമായിരിക്കും. എന്റേത് അങ്ങനെയല്ല.
അതിനാൽ ഒരു പൊതു പ്ലാറ്റഫോമിൽ വന്ന വീഡിയോയ്ക്കുള്ള പ്രതികരണമായാണ് ഞാൻ അതിനെ കണ്ടത്. ഇപ്പോൾ ഈ എഴുത്ത് പോലും നിങ്ങളുടെ വീഡിയോക്ക് വിഷയമാകാം, അത് ഞാൻ തടയുന്നുമില്ല. എന്നാൽ വധൂവരന്മാരുടെ മറുപടി വീഡിയോ അർത്ഥശൂന്യവും എന്നോടും എൻ്റെ കുടുംബത്തോടും വെറുപ്പുളവാക്കുന്നതുമാണ്. ഞാൻ നിങ്ങളെക്കുറിച്ചോ നിങ്ങളുടെ സുഹൃത്തുക്കളെക്കുറിച്ചോ പോലും സംസാരിക്കാതെ, എൻ്റെ സുഹൃത്തുക്കളെയും എൻ്റെ പങ്കാളിയെയും പരാമർശിക്കുകയായിരുന്നു. അതിനു നിങ്ങൾ എന്തിനാണ് ഈ കരയുന്നതെന്നു എനിക്ക് മനസിലാകുന്നില്ല.