ലോകമെമ്പാടും ആരാധകരുള്ള ഹോളിവുഡ് സംവിധായകനാണ് ക്രിസ്റ്റഫര്‍ നോളന്‍. ഓരോ സിനിമയും പ്രേക്ഷകനെ ആഴത്തില്‍ ചിന്തിപ്പിക്കുന്നതും മറക്കാനാകാത്ത ദൃശ്യവിസ്മയം നല്‍കുന്നതുമാണ് നോളന്റെ സിനിമകളുടെ പ്രത്യേകത. ആദ്യചിത്രമായ ഫോളോവിങ് മുതല്‍ ഏറ്റവുമൊടുവില്‍ പുറത്തിറങ്ങിയ ഓപ്പന്‍ഹൈമര്‍ വരെ നോളന്റ സംവിധാന വൈദഗ്ധ്യം എടുത്തുകാണിക്കുന്നവയാണ്. ഓപ്പന്‍ഹൈമറിലൂടെ കരിയറിലെ ആദ്യ ഓസ്‌കര്‍ അവാര്‍ഡും നോളന്‍ സ്വന്തമാക്കി.
നോളന്റെ ഫിലിമോഗ്രഫിയില്‍ ഏറ്റവുമധികം ആരാധകരുള്ള ചിത്രമാണ് ഇന്റെർസ്റ്റെല്ലാർ. 2014ല്‍ റിലീസായ സയന്‍സ് ഫിക്ഷന്‍ ചിത്രം ഇന്നും പലര്‍ക്കും അത്ഭുതമാണ്. സയന്‍സ് ഫിക്ഷനോടൊപ്പം ഒരു അച്ഛനും മകളും തമ്മിലുള്ള മനോഹരബന്ധത്തെയും നോളന്‍ ഇന്റെർസ്‌റ്റെല്ലാറില്‍ വരച്ചുകാട്ടിയിരുന്നു.
സിനിമയുടെ പത്താം വാർഷികത്തോട് അനുബന്ധിച്ച് ഇന്ത്യ ഒഴികെയുള്ള രാജ്യങ്ങളിൽ ചിത്രം വീണ്ടും ഐമാക്സിൽ റീ റിലീസിനെത്തിയിരുന്നു. മികച്ച പ്രതികരണങ്ങളും കളക്ഷനുമാണ് സിനിമക്ക് റീ റിലീസിലും ലഭിച്ചത്. ഇപ്പോഴിതാ എല്ലാവരും കാത്തിരുന്ന ചിത്രത്തിന്റെ ഇന്ത്യയിലെ റീ റിലീസ് തീയതി പുറത്തുവന്നിരിക്കുകയാണ്.
ഫെബ്രുവരി 7 ന് ഇന്ത്യയിലൊട്ടാകെയുള്ള ഐമാക്സ് സ്‌ക്രീനുകളിൽ ഇന്റെർസ്റ്റെല്ലാർ വീണ്ടുമെത്തും. സിനിമയുടെ നിർമാതാക്കളായ വാർണർ ബ്രോസ് തന്നെയാണ് ഈ വാർത്ത സോഷ്യൽ മീഡിയയിലൂടെ പുറത്തുവിട്ടത്. മാത്യു മക്കോനാഗെ, ആൻ ഹാത്ത്‌വേ, ജെസ്സിക്ക ചാസ്റ്റൈൻ, മൈക്കൽ കെയ്ൻ തുടങ്ങിയവരായിരുന്നു ചിത്രത്തിൽ പ്രധാന വേഷങ്ങളിൽ എത്തിയത്.
നേരത്തെ അല്ലു അർജുൻ സിനിമയായ പുഷ്പ 2 കാരണമാണ് ഇന്റെർസ്റ്റെല്ലാറിന് ഇന്ത്യയിൽ റീ റിലീസ് നിഷേധിച്ചതെന്ന് വാർത്തകളുണ്ടായിരുന്നു. ഇന്‍റര്‍സ്റ്റെല്ലാർ ഇന്ത്യയിൽ റിലീസ് ചെയ്യാത്തതിൽ ആരാധകർ നിരാശ പ്രകടിപ്പിച്ചിരുന്നു. ഇന്ത്യയിൽ നേരത്തെ ചിത്രം ജനുവരിയിൽ റീ റിലീസ് ചെയ്യുമെന്നാണ് വാർത്തകൾ പുറത്തുവന്നത്.
ഇതിന് മുൻപും ‘ഇന്റെർസ്റ്റെല്ലാർ’ തിയേറ്ററുകളിൽ റീ റിലീസ് ചെയ്തിട്ടുണ്ട്. 165 മില്യൺ ഡോളറിൽ ഒരുങ്ങിയ സിനിമ ആഗോള ബോക്സ് ഓഫീസിൽ നിന്നും നേടിയത് 730.8 മില്യൺ ഡോളറാണ്. പത്താം വാര്‍ഷികത്തോടനുബന്ധിച്ച് ഇപ്പോഴത്തെ റീറിലീസിലും, പത്ത് ദിവസത്തിനുള്ളില്‍ ഇൻ്റർസ്റ്റെല്ലാർ 10.8 മില്യൺ ഡോളറാണ് നേടിയത്. ഇതോടെ എക്കാലത്തെയും ഉയർന്ന കളക്ഷൻ നേടിയ റീ റിലീസായി ഇന്റെർസ്റ്റെല്ലാർ മാറി.