അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.നടി മഞ്ജു വാരിയർ നായികയായി എത്തിയ‘കയറ്റം’ സിനിമ സൗജന്യമായി ഓൺലൈനിലൂടെ റിലീസ് ചെയ്ത് സംവിധായകൻ സനൽകുമാർ ശശിധരൻ. ചിത്രം അപ്‌ലോഡ് ചെയ്ത വിമിയോ ലിങ്കും സിനിമയുടെ ഫയൽ അടങ്ങിയ ഗൂഗിള്‍ ഡ്രൈവ് ലിങ്കുമാണ് സനൽ തന്റെ സമൂഹ മാധ്യമ അക്കൗണ്ടുകളിലൂടെ പങ്കുവച്ചത്. ഈ സിനിമ തിയറ്ററുകളിൽ റിലീസ് ചെയ്യുന്നത് തടയാൻ ആസൂത്രിത ശ്രമങ്ങൾ നടക്കുന്നുണ്ടെന്ന് അവകാശപ്പെട്ടാണ് ഇങ്ങനെയൊരു നീക്കമെന്ന് സംവിധായകൻ പറയുന്നു. ‘ഒരാൾപൊക്കം’, ‘സെക്‌സി ദുർഗ’ എന്നീ ചിത്രങ്ങളിലൂടെ പ്രശസ്തനായ സംവിധായകൻ ഇതേ കാരണങ്ങളാൽ നേരത്തെ ടൊവിനോ നായകനായ ‘വഴക്ക്’ ഓൺലൈൻ ആയി റിലീസ് ചെയ്തിരുന്നു.
മഞ്ജു വാരിയർ തന്നെ നിർമിച്ച ‘കയറ്റം’ പൂർണമായും ഹിമാലയത്തിലാണ് ചിത്രീകരിച്ചത്. സിനിമയിലെ ക്യാമറ മികവിന് ചന്ദ്രു സെൽവരാജിന് മികച്ച ഛായാഗ്രഹണത്തിലുള്ള സംസ്ഥാന പുരസ്കാരവും ലഭിച്ചിരുന്നു.
മഞ്ജു വാരിയരുമായി ബന്ധപ്പെട്ട വിവാദത്തിൽ അറസ്റ്റിലായ സംവിധായകൻ പിന്നീട് അമേരിക്കയിലേക്ക് താമസം മാറ്റിയിരുന്നു. തന്റെ ജീവൻ അപകടത്തിലായതിനാലാണ് ഇന്ത്യ വിട്ട്അമേരിക്കയിലേക്ക് പോകേണ്ടിവന്നുവെന്നും ഇന്ത്യയിൽ സിനിമ ചെയ്യുന്നത് തുടരാൻ അനുവദിക്കുന്നില്ലെന്നും സംവിധായകൻ പറയുകയുണ്ടായി. നിരവധി പേർ പദ്ധതിയിൽ ഉൾപ്പെട്ടതിനാൽ ‘കയറ്റം’ റിലീസ് ചെയ്യാൻ തനിക്ക് ധാർമ്മിക ബാധ്യതയുണ്ടെന്നും അദ്ദേഹം പറഞ്ഞു.
“2019-ൽ ഞാൻ എന്റെ ‘കയറ്റം’ എന്ന സിനിമ നിർമിച്ചിരുന്നു. ഇന്ത്യയിലും വിദേശത്തുമായി സിനിമയ്ക്ക് നിരവധി അവാർഡുകൾ ലഭിച്ചു. എന്നിരുന്നാലും, എന്റെ പ്രേക്ഷകർക്കായി ചിത്രം ഇതുവരെ റിലീസ് ചെയ്യാൻ എനിക്ക് കഴിഞ്ഞില്ല. സിനിമയുടെ നിർമാതാവും നടിയുമായ മഞ്ജു വാരിയരെ ഞാൻ ബന്ധപ്പെടാൻ ശ്രമിച്ചപ്പോഴൊക്കെ ആരോ എന്നെ തടയാൻ ശ്രമിക്കുന്നതായി എനിക്ക് തോന്നി. ആരോ അവരെ നിയന്ത്രിക്കാൻ ശ്രമിക്കുന്നതായി എനിക്ക് തോന്നുന്നു. അതിനുശേഷമാണ് മഞ്ജു വാരിയരുടെ ജീവൻ അപകടത്തിലാണെന്ന പോസ്റ്റ് ഇടുന്നത്. എനിക്കെതിരെ അവർ ഒരു വ്യാജ പരാതി കൊടുക്കുകയും എന്നെ അറസ്റ്റ് ചെയ്യുകയും ചെയ്തു. എന്നിട്ടും മജിസ്‌ട്രേറ്റ് കോടതിയിൽ ജയിലിൽ നിന്ന് ഇറങ്ങിയതിന് ശേഷം എന്നെ ജാമ്യത്തിൽ വിട്ടയച്ചു. എന്റെ ജീവൻ അപകടത്തിലാണെന്ന് എനിക്ക് മനസ്സിലായി, അതിനാലാണ് ഞാൻ ഇന്ത്യ വിട്ട് യുഎസിലേക്ക് പോയത്.
‘കയറ്റം’ എന്ന സിനിമ നിർമിക്കുന്നതിൽ ഒരുപാട് അപകടസാധ്യതകൾ ഉണ്ടായിരുന്നു. സിനിമ ഹിമാലയത്തിലാണ് ചിത്രീകരിച്ചത്. ചിത്രീകരണത്തിനായി അഭിനേതാക്കൾ അവരുടെ ജീവൻ വരെ അപകടത്തിലാക്കി. സിനിമ റിലീസ് ചെയ്യേണ്ടത് എന്റെ ഉത്തരവാദിത്തമാണെന്ന് ഞാൻ വിശ്വസിക്കുന്നു. സിനിമയുടെ ലിങ്ക് വിവിധ സൈറ്റുകളിൽ ലഭ്യമാണ്. സോഷ്യൽ മീഡിയ പ്ലാറ്റ്‌ഫോമുകളിൽ എന്റെ തീരുമാനത്തിന് ഒരുപാട് വിമർശനങ്ങൾ നേരിടേണ്ടി വരുമെന്ന് എനിക്കറിയാം. എങ്കിലും ഇത്തരമൊരു ‘വിഡ്ഢിത്തം’ ഞാൻ എടുക്കുന്നത് രണ്ടാം തവണയാണ്. ഒരു മുൻവിധിയും കൂടാതെ സിനിമ കാണുക.”–സനൽകുമാറിന്റെ വാക്കുകൾ.
content highlight : sanal-kumar-sasidharan-releases-kayattam-online
