അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.സമൂഹമാധ്യമം കയ്യടക്കിയിരിക്കുന്നത് എമ്പുരാന്റെ ടീസര്‍ വിശേഷങ്ങളാണ്. ആരാധകര്‍ ആകാംക്ഷയോടെ കാത്തിരിക്കുന്ന ചിത്രത്തിന്റെ ടീസര്‍ ചുരുങ്ങിയ സമയംകൊണ്ട് കണ്ടത് ലക്ഷക്കണക്കിനാളുകളാണ്. ഇതിനിടെ മറ്റൊരു എമ്പുരാൻ വിശേഷം കൂടി ആഘോഷമാക്കുകയാണ് ആരാധകർ. ഒരു വമ്പന്‍ സര്‍പ്രൈസ് ആണ് പുറത്തുവന്നത്.
ഇതിലെ ‘ലൈക്ക് എ ഫ്ലേം ‘ എന്ന് തുടങ്ങുന്ന തീം സോങ് എഴുതിയിരിക്കുന്നത് പൃഥ്വിരാജ് തന്നെയാണ്. ദീപക് ദേവിന്‍റെ സംഗീതത്തിൽ ഒരുങ്ങിയിട്ടുള്ള തീം സോങ് ഇന്ദ്രജിത്തിന്‍റെ മകൾ പ്രാര്‍ത്ഥന ഇന്ദ്രജിത്ത് ആണ് പാടിയിട്ടുള്ളത്. ചിത്രത്തിന്റെ അണിയറപ്രവർത്തകർ തന്നെയാണ് ഇക്കാര്യം പങ്കുവെച്ചിട്ടുള്ളത്. ആദ്യമായാണ് പൃഥ്വിരാജ് പാട്ടിന് വരികളെഴുതുന്നത് എന്ന പ്രത്യേകതയുമുണ്ട്. സംവിധാനവും അഭിനയവും പാട്ടെഴുതും എല്ലാം കൂടെ എങ്ങനെ സാധിക്കുന്നുവെന്നാണ് പൃഥ്വിരാജിനോട് ആരാധകർ ഇപ്പോൾ ചോദിക്കുന്നത്.
പ്രാര്‍ഥന ഇതിനു മുന്‍പും സിനിമകളില്‍ പാടിയിട്ടുണ്ട്. മഞ്ജുവാര്യര്‍ നായികയായെത്തിയ ‘മോഹന്‍ലാല്‍’ എന്ന സിനിമയിലെ ‘ലാ ലാ ലാലേട്ട’, അന്ന ബെന്‍ നായികയായ ‘ഹെലനി’ലെ താരാപഥമാകെ തുടങ്ങിയ ഹിറ്റ് ഗാനങ്ങള്‍ പാടിയത് പ്രാര്‍ഥനയാണ്. തെലുങ്കിലും ഹിന്ദിയിലും പ്രാര്‍ഥന അരങ്ങേറ്റം കുറിച്ചിട്ടുണ്ട്. എമ്പുരാനിലെ തീം സോങ് എന്തായാലും ഞെട്ടിച്ചു എന്നാണ് കമന്‍റുകള്‍.
ചിത്രത്തിന്റെ ടീസര്‍ പ്രത്യേക പരിപാടിയിൽ മമ്മൂട്ടിയാണ് പുറത്തിറക്കിയത്. മലയാളത്തിന് പുറമെ തമിഴ്, ഹിന്ദി, തെലുങ്ക്, കന്നഡ എന്നീ ഭാഷകളിലാണ് ടീസര്‍ റിലീസ് ചെയ്തത്.
ലൂസിഫറിന്റെ വന്‍ വിജയത്തിന് പിന്നാലെ 2019 ല്‍ പ്രഖ്യാപിച്ച സിനിമയുടെ ചിത്രീകരണം ആരംഭിച്ചത് 2023 ഒക്ടോബറിലായിരുന്നു. ഇരുപതോളം വിദേശ രാജ്യങ്ങളിലാണ് സിനിമ ചിത്രീകരിച്ചിരിക്കുന്നതെന്നാണ് വിവരം. ലൈക്ക പ്രൊഡക്ഷൻസും ആശിർവാദ് സിനിമാസും ചേർന്നാണ് എമ്പുരാൻ നിർമിക്കുന്നത്. 2025 മാർച്ച് 27 ന് ലോകമെമ്പാടുമുള്ള തിയേറ്ററുകളിൽ ‘എമ്പുരാൻ’ എത്തും. ‘എമ്പുരാൻ’ ലൂസിഫറിന്റെ പ്രീക്വലും സീക്വലുമാണെന്നാണ് പുറത്തുവരുന്ന റിപ്പോർട്ടുകൾ.
സ്റ്റീഫൻ നെടുമ്പള്ളിയെന്ന അബ്രാം ഖുറെഷിയുടെ പഴയ ജീവിതവും പുതിയ കാലഘട്ടവും ചിത്രത്തിൽ കാണിച്ചു തരുമെന്നും വാർത്തകളുണ്ട്. ആദ്യ ഭാഗത്തിലെ അഭിനേതാക്കളായ മഞ്ജു വാര്യർ, ടൊവിനോ തോമസ്, സാനിയ അയ്യപ്പൻ, സായ് കുമാർ, ഇന്ദ്രജിത് സുകുമാരൻ, ബൈജു എന്നിവർക്കൊപ്പം സുരാജ് വെഞ്ഞാറമൂട്, ഷൈൻ ടോം ചാക്കോ, ഷറഫുദ്ദീൻ, അർജുൻ ദാസ് എന്നിങ്ങനെ പുതിയ താരങ്ങളും ചിത്രത്തിലുണ്ട്.
