അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.സംവിധായകൻ ഷാഫിയെ അനുസ്മരിച്ച് നടി മിയ എഴുതിയ വാക്കുകളാണ് ശ്രദ്ധേയമാകുന്നത്. ഷാഫിയുടെ മരണവാർത്ത കേട്ടപ്പോഴുണ്ടായ ഹൃദയഭാരം അടക്കാൻ കഴിയുന്നില്ലെന്നും അദ്ദേഹത്തെക്കുറിച്ച് പറയാൻ വാക്കുകൾ മതിയാകില്ലെന്നും മിയ കുറിച്ചു. ഒരാൾക്ക് ബോറടിക്കാതെ എത്ര മണിക്കൂറുകൾ വേണമെങ്കിലും സംസാരിച്ചിരിക്കാൻ കഴിയുന്ന ഒരാളാണ് ഷാഫി എന്ന് മിയ പറയുന്നു. നിരവധി സൂപ്പർ ഹിറ്റ് സിനിമകൾ സംവിധാനം ചെയ്യാത്തതിന്റെ ഒരു ഗർവുമില്ലാതെ എല്ലാവരോടും വളരെ സ്നേഹപൂർവം പെരുമാറുന്ന ആളായിരുന്നു ഷാഫി എന്നും മിയ കുറിച്ചു.
‘എന്റെ ഹൃദയം കനപ്പെട്ടിരിക്കുന്നു. അദ്ദേഹം പോയി എന്ന സത്യം ഉൾക്കൊള്ളാൻ എനിക്ക് കഴിയുന്നില്ല. ഞാൻ എത്രമാത്രം ദുഃഖിതയാണെന്ന് പറഞ്ഞറിയിക്കാൻ വാക്കുകൾ കിട്ടുന്നില്ല. അദ്ദേഹം എപ്പോഴും ഒരു തമാശക്കാരനായിരുന്നു, ചുറ്റും നടക്കുന്ന കുഞ്ഞു കുഞ്ഞു കാര്യങ്ങളിൽ പോലും ഒരു തമാശ കണ്ടെത്താൻ അദ്ദേഹത്തിന് കഴിയുമായിരുന്നു. ഫോണിൽ മറ്റൊന്നും തിരയാതെ മണിക്കൂറുകളോളം നമുക്ക് സംസാരിച്ചുകൊണ്ടിരിക്കാൻ പറ്റുന്ന ഏക മനുഷ്യൻ അദ്ദേഹമാണ്. കാരണം അദ്ദേഹത്തിന്റെ സിനിമകൾ പോലെ തന്നെ അദ്ദേഹവും നമ്മെ എപ്പോഴും രസിപ്പിച്ചുകൊണ്ടിരിക്കും.
സിനിമ ചെയ്യുമ്പോൾ അദ്ദേഹം സഹപ്രവർത്തകരുടെ ഫോട്ടോ എടുക്കുന്നത് കാണാം, ഇത്രയും സൂപ്പർഹിറ്റ് സിനിമകൾ ചെയ്ത മറ്റൊരു സംവിധായകൻ ഇത്തരത്തിൽ പെരുമാറുന്നത് ഞാൻ കണ്ടിട്ടില്ല. അദ്ദേഹം കൂളായി പെരുമാറിയതിന്റെ നിരവധി ഉദാഹരണങ്ങളിൽ ഒന്നുമാത്രമാണിത്. വളരെ വേഗം പോയിക്കളഞ്ഞല്ലോ ഷാഫി സാർ അങ്ങയുടെ ആത്മാവിന് നിത്യശാന്തി ലഭിക്കട്ടെ. അങ്ങയുടെ സിനിമകളോടൊപ്പം തന്നെ അങ്ങും ഞങ്ങളോടൊപ്പം എന്നെന്നേക്കുമായി ഇവിടെ ഉണ്ടാകും’- മിയ കൂട്ടിച്ചേർത്തു.
കൊച്ചിയിലെ സ്വകാര്യ ആശുപത്രിയിൽ ചികിത്സയിലിരിക്കെ ഞായറാഴ്ച പുലർച്ചെ 12.25-ഓടെയായിരുന്നു ഷാഫി(56)യുടെ അന്ത്യം. കല്യാണരാമൻ, മായാവി, ടു കൺട്രീസ് തുടങ്ങിയ ചിരിച്ചിത്രങ്ങളിലൂടെ മലയാള സിനിമയിലെ ഹിറ്റ്മേക്കറായ സംവിധായകനാണ് ഷാഫി. എളമക്കര മൂത്തോട്ടത്ത് എം.പി. ഹംസയുടെയും നബീസയുടെയും മകനാണ് ഷാഫി എന്ന എം.എച്ച്. റഷീദ്. ബന്ധുവായ സംവിധായകൻ സിദ്ദീഖിന്റെയും സഹോദരൻ റാഫിയുടെയും പാതയിലൂടെയാണ് സിനിമയിലേക്ക് കടന്നുവന്നത്. സംവിധാനം ചെയ്ത 17 സിനിമകളിൽ ഏറെയും വമ്പൻ ഹിറ്റുകളായിരുന്നു.
