അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.നടൻ ജോജു ജോർജ് ആദ്യമായി സംവിധാനം ചെയ്‌ത് പുറത്തിറങ്ങുന്ന ചിത്രമാണ് പണി. തിയേറ്ററിൽ ചിത്രം ഇറങ്ങിയതിന് പിന്നാലെ പല വിവാദങ്ങളിലും അകപ്പെട്ടെങ്കിലും ഒടിടി റിലീസിന് പിന്നാലെ ചിത്രത്തിന് വലിയ പ്രേക്ഷക പ്രശംസയാണ് ലഭിച്ചത്.
ജോജുവിന്റെ ഗിരി എന്ന കഥാപാത്രത്തിന് പുറമെ ശ്രദ്ധേയമായത് അഭിനയയുടെ ഭാര്യവേഷമാണ്. സാഗർ സൂര്യ, ജുനൈസ് വി പി എന്നിവരും അവരുടെ റോളുകളിൽ മാറ്റുരച്ചു. സീമ, ചാന്ദിനി ശ്രീധരൻ, പ്രശാന്ത് അലക്‌സാണ്ടർ, സുജിത് ശങ്കർ എന്നിവരാണ് പണിയിലെ മറ്റ് പ്രധാന താരങ്ങൾ.
ചിത്രം കണ്ടതിന് പിന്നാലെ തന്നെ പ്രശംസിക്കാൻ തമിഴ് സൂപ്പർസ്റ്റാർ കമൽഹാസൻ ഫോൺ വിളിച്ചെന്നാണ് നടി സീമ പറയുന്നത്. ഫോൺ വിളിച്ച് ഞാൻ പണി സിനിമ കണ്ടു നീ ഗംഭീരമായിട്ടുണ്ടെന്ന് പറഞ്ഞു. ആരാണ് തന്നെ നീ എന്ന് വിളിക്കുന്നത് മനസ്സിലായില്ല. അതുകൊണ്ട് ആരാണ് എന്ന് എടുത്തു ചോദിച്ചു. അപ്പോഴാണ് അദ്ദേഹം പറഞ്ഞത് ഞാൻ കമൽഹാസനാണ് എന്നും സീമ പറയുന്നു.
ഒക്‌ടോബര്‍ 24നായിരുന്നു സിനിമ തിയേറ്ററുകളിൽ റിലീസ് ചെയ്തത്. ത്രില്ലര്‍ റിവഞ്ച് വിഭാഗത്തിൽ പെട്ടതാണ് സിനിമ. ഒടിടിയിൽ ജനുവരി 16 മുതൽ സിനിമയുടെ സ്ട്രീമിങ് ആരംഭിച്ചത്. അഞ്ച് ഭാഷകളിലായാണ് സിനിമയുടെ ഒടിടി സ്ട്രീമിങ്. മലയാളത്തിന് പുറമെ തമിഴ്, തെലുങ്ക്, കന്നഡ, ഹിന്ദി ഭാഷകളിലും സിനിമ ലഭ്യമാണ്.
എഡി സ്റ്റുഡിയോസിന്‍റെയും ശ്രീ ഗോകുലം മൂവീസിന്‍റെയും ബാനറിൽ നിർമിച്ച ചിത്രമാണിത്. ജോജു ജോര്‍ജുവിന്റെ തന്നെ പ്രൊഡക്ഷൻ കമ്പനിയായ അപ്പു പാത്തു പപ്പു പ്രൊഡക്ഷൻസും ഇതിനൊപ്പമുണ്ട്. എം റിയാസ് ആദം, സിജോ വടക്കൻ എന്നിവർ ചേർന്നാണ് സിനിമ നിർമിച്ചത്. വിഷ്‍ണു വിജയ്, സന്തോഷ് നാരായണൻ, സാം സി എസ് തുടങ്ങിയവരുടെ സംഗീതമാണ് പണിയിലുള്ളത്. ആക്ഷൻ ചിത്രത്തിന്റെ ക്യാമറ കൈകാര്യം ചെയ്തത് വേണു ഐഎസ്‍സി, ജിന്റോ ജോർജ് എന്നിവരാണ്. മനു ആന്‍റണി പണിയുടെ എഡിറ്റിങ് നിർവഹിച്ചിരിക്കുന്നു.
