റെക്കോര്‍ഡുകളെ മറികടന്ന് 1800 കോടിയോളം ബോക്‌സ് ഓഫീസ് കളക്ഷന്‍ നേടിയ ചിത്രമാണ് പുഷ്പ 2 ദി റൂൾ. അല്ലു അര്‍ജുന്റെ കരിയറിലെ ഏറ്റവും വലിയ വിജയമായി മാറിയ ചിത്രം കൂടിയാണ് പുഷ്പ 2. ഡിസംബര്‍ 5ന് തിയേറ്ററുകളിലെത്തിയ ചിത്രം ഒടിടിയില്‍ പ്രദര്‍ശനത്തിന് എത്തിയിരിക്കുകയാണ്. നെറ്റ്ഫ്‌ലിക്‌സിലൂടെയാണ് ചിത്രം ഇന്ന് മുതൽ സ്ട്രീമിങ് ആരംഭിച്ചിരിക്കുന്നത്.
സുകുമാറിന്റെ സംവിധാനത്തില്‍ അല്ലു അര്‍ജുനും രശ്മിക മന്ദാനയും പ്രധാന കഥാപാത്രങ്ങളെ അവതരിപ്പിച്ച പുഷ്പ 2 ഡിസംബര്‍ 5 നായിരുന്നു തിയേറ്ററുകളിൽ എത്തിയത്. ചിത്രം നിരവധി ബോക്‌സ് ഓഫീസ് റെക്കോര്‍ഡുകള്‍ തകര്‍ത്തതിന് ശേഷമാണ് ഇപ്പോള്‍ ഒടിടിയില്‍ എത്തുന്നത്. ഏറ്റവും വലിയ തുകയ്ക്കാണ് നെറ്റ്ഫ്ലിക്സ് ചിത്രം സ്വന്തമാക്കിയതെന്നാണ് പുറത്തു വരുന്ന റിപ്പോര്‍ട്ടുകള്‍. തീയറ്ററില്‍ റിലീസ് ചെയ്തതില്‍ നിന്നും 23 മിനിറ്റ് അധികമുള്ള ചിത്രത്തിന്റെ പുതിയ പതിപ്പാണ് ഒടിടിയില്‍ എത്തിയിരിക്കുന്നത്. നിലവില്‍ ചിത്രം തെലുങ്ക്, തമിഴ്, കന്നഡ, മലയാളം എന്നീ നാല് ഭാഷകളില്‍ മാത്രമേ റിലീസ് ചെയ്യൂ.
പുഷ്പയുടെ ഒന്നാം ഭാഗം പ്രൈം വീഡിയോ ആയിരുന്നെങ്കിലും, പുഷ്പ 2 നെറ്റ്ഫ്ലിക്സ് സ്വന്തമാക്കി. കാരണം തെലുഗിന് പുറമെ മറ്റ് ഭാഷകളിലും പുഷ്പയ്ക്ക് ആരാധകർ ഏറെയാണെന്നത് തന്നെ. ആഗോള കളക്ഷനില്‍ എസ്.എസ്. രാജമൗലിയുടെ ബ്രഹ്മാണ്ഡ ചിത്രങ്ങളായ ‘ബാഹുബലി 2’ (1790 കോടി), ‘ആര്‍.ആര്‍.ആര്‍’ (1230 കോടി), പ്രശാന്ത് നീലിന്റെ ‘കെ.ജി.എഫ്: ചാപ്റ്റര്‍ 2’ (1215 കോടി) എന്നീ സിനിമകളുടെ റെക്കോഡുകള്‍ സുകുമാറിന്റെ ‘പുഷ്പ 2: ദി റൂള്‍’ മറികടന്നിരുന്നു.