അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.വിവാദ പ്രസ്താവനകൾ നടത്തി ഇടക്കിടെ കുരുക്കിൽ ചെന്ന് ചാടാറുള്ള താരമാണ് കങ്കണ റണാവത്ത്. ഇപ്പോൾ നിറത്തെക്കുറിച്ച് പറഞ്ഞാണ് പുതിയ വിവാദത്തിൽ എം.പി കൂടിയായ കങ്കണ ഇടം പിടിക്കുന്നത്. ബോളിവുഡ് താരങ്ങളെ കുറിച്ചും സൗന്ദര്യ കാഴ്ചപ്പാടുകളെ കുറിച്ചുമുള്ള കങ്കണയുടെ വാക്കുകൾ വലിയ രീതിയിൽ ചർച്ചയാവുകയാണ്. മഹാ കുംഭമേളയ്ക്കിടെ വൈറലായ മൊണാലിസയുടെ ഫോട്ടോ പങ്കുവെച്ചായിരുന്നു കങ്കണയുടെ ഇൻസ്റ്റഗ്രാം കുറിപ്പ്.
ദേശീയ മാധ്യമങ്ങൾ ‘ബ്രൗൺ ബ്യൂട്ടി’ എന്ന് വിശേഷിപ്പിച്ച മൊണാലിസയുടെ ഫോട്ടോകളും വീഡിയോകളും സോഷ്യൽ മീഡിയയിൽ വ്യാപകമായി പ്രചരിച്ചിരുന്നു. ഇതിന് പിന്നാലെ ഇവരുടെ സൗന്ദര്യത്തെക്കുറിച്ചായിരുന്നു കങ്കണയുടെ കുറിപ്പ്. മുൻകാലങ്ങളിൽ ദീപിക പദുക്കോൺ, കജോൾ, ബിപാഷ ബാസു തുടങ്ങിയ ഉരുണ്ട നിറമുള്ള മുൻനിര നായികമാർ നമുക്കുണ്ടായിരുന്നുന്നും, എന്നാൽ ഇന്ന് ഇരുണ്ട ചർമ്മമുള്ള നായകമാർ ഹിന്ദി സിനിമയിൽ ഇല്ലെന്നുമായിരുന്നു കുറിപ്പിൽ പറഞ്ഞത്.
കങ്കണയുടെ ഇൻസ്റ്റഗ്രാം കുറിപ്പ്
‘മൊണാലിസ എന്ന പെൺകുട്ടി അവളുടെ സ്വാഭാവിക സൗന്ദര്യത്താൽ സോഷ്യൽമീഡിയയിൽ തരംഗമായി മാറിയിരിക്കുകയാണ്. ഇന്ന് ഗ്ലാമർ ലോകത്ത് ഇരുണ്ട നിറമുള്ള സ്ത്രീകൾക്ക് പ്രാധാന്യമുണ്ടോ? എനിക്ക് ചിന്തിക്കാതിരിക്കാൻ കഴിയുന്നില്ല.
ദീപികയെയോ, അനു അഗർവാളിനെയോ, കജോളിനെയോ, ബിപാഷയെയോ,റാണി മുഖർജിയെയോ സ്നേഹിച്ചതുപോലെയാണോ ആളുകൾ യുവ നടിമാരെ സ്നേഹിക്കുന്നത്?
ചെറുപ്പത്തില്‍ ഇരുണ്ട നിറമായിരുന്ന നായികമാരടക്കം എല്ലാ നടിമാരും ഇന്ന് വെളുത്ത സ്ത്രീകളെപ്പോലെ വിളറിയിരിക്കുന്നതെന്താണ്? എന്തുകൊണ്ടാണ് ആളുകൾ മൊണാലിസയെ തിരിച്ചറിയുന്ന രീതിയിൽ പുതുമുഖ നായികമാരെ തിരിച്ചറിയാത്തത്? വളരെയധികം ലേസർ, ഗ്ലൂട്ടത്തയോൺ കുത്തിവയ്പ്പുകളാണോ?’
ഈ പോസ്റ്റിന് പിന്നാലെ കങ്കണ വലിയ രീതിയിൽ വിമർശിക്കപ്പെടുകയാണ്. നിറത്തെക്കുറിച്ച് പരാമർശം, ദീപികയെ അധിക്ഷേപിച്ചു, ദീപിക കാജോൾ എന്നിവർ ഗ്ലൂട്ടാത്തയോൺ എടുത്തു എന്ന് എന്തിന് പറഞ്ഞു അവർ ജീവിതശൈലി കൊണ്ട് മാറിയതാണ് എന്നിങ്ങനെ നീളുന്നു കങ്കണയ്ക്ക് നേരെ വിമർശനങ്ങൾ. അതേസമയം കങ്കണ പറഞ്ഞതിൽ തെറ്റില്ലെന്ന് പറഞ്ഞ് അനുകൂലിക്കുന്നവരും ഉണ്ട്.
