അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.ബേസിൽ ജോസഫിനെ നായകനാക്കി നവാഗതനായ ശിവപ്രസാദ് സംവിധാനം ചെയ്യുന്ന ‘മരണ മാസ്സ്’ ചിത്രത്തിന്റെ ഫസ്റ്റ്ലുക്ക് പോസ്റ്റര്‍ പുറത്തുവിട്ട് അണിയറപ്രവര്‍ത്തകര്‍. ആദ്യം മുതല്‍ അവസാനം വരെ ഹാസ്യത്തിന് പ്രാധാന്യം നല്‍കുന്നതാണ് ചിത്രമെന്നാണ് ലഭ്യമാകുന്ന വിവരം. നടൻ സിജു സണ്ണി കഥ രചിച്ച ചിത്രത്തിന്റെ തിരക്കഥയും സംഭാഷണവും രചിച്ചിരിക്കുന്നത് സിജു സണ്ണിയും സംവിധായകൻ ശിവപ്രസാദും ചേർന്നാണ്.
ഏറെ രസകരവും സ്റ്റൈലിഷുമായ ലുക്കിലാണ് ഈ ചിത്രത്തിൽ ബേസിൽ ജോസഫ് പ്രത്യക്ഷപ്പെടുന്നതെന്നാണ് ഫസ്റ്റ്ലുക്ക് പോസ്റ്റിലൂടെ വ്യക്തമാകുന്നത്. സിഗ്‌മ മെയില്‍ എന്നെഴുതിയിരിക്കുന്ന ചുവന്ന നിറമുള്ള ടീ ഷര്‍ട്ടാണ് ഫസ്‌റ്റ് ലുക്കില്‍ ബേസില്‍ ധരിച്ചിരിക്കുന്നത്. ലോക്കറ്റോടു കൂടിയൊരു ചെയിനും നടന്‍ അണിഞ്ഞിട്ടുണ്ട്.
തലമുടി കളര്‍ ചെയ്‌ത് മരണമാസ് ലുക്കാണ് ചിത്രത്തില്‍ ബേസിലിന്‍റേത്. ഇതുവരെ കണ്ട് പരിചയമില്ലാത്ത ബേസിലിന്‍റെ ഈ പുതുമയേറിയ ഫ്രീക്കന്‍ ലുക്കിന് സോഷ്യല്‍ മീഡിയയില്‍ വന്‍വരവേല്‍പ്പാണ് ലഭിച്ചിരിക്കുന്നത്.
അടുത്തിടെയായി ബേസില്‍ പങ്കെടുത്തിരുന്ന പരിപാടികളിലെല്ലാം നടന്‍ തലയില്‍ തൊപ്പി വച്ചാണ് എത്തിയിരുന്നത്. തൊപ്പി ഊരാന്‍ പലരും ആവശ്യപ്പെട്ടപ്പോള്‍, തലയില്‍ താജ്‌മഹല്‍ പണിതിരിക്കുകയാണ് എന്നായിരുന്നു ബേസിലിന്‍റെ മറുപടി. ഇപ്പോഴാണ് നടന്‍ തന്‍റെ തലയിലെ തൊപ്പി ഊരി മാറ്റിയത്. ‘മരണമാസ്സി’ന്‍റെ പോസ്റ്റര്‍ വന്നതോട് കൂടി ബേസിലിന്‍റെ തലയുടെ സസ്പെന്‍സും പുറത്തുവന്നു.
കിലോമീറ്റർസ് ആൻഡ് കിലോമീറ്റർസ്, കള, വഴക്ക്, അദൃശ്യജാലകങ്ങൾ എന്നിവക്ക് ശേഷം ടൊവിനോ തോമസ് നിർമ്മാതാവായി എത്തുന്ന ചിത്രമെന്ന പ്രത്യേകതയും മരണ മാസ്സിനുണ്ട്. ബേസിൽ ജോസഫിനെ കൂടാതെ രാജേഷ് മാധവൻ, സിജു സണ്ണി, പുളിയനം പൗലോസ്, സുരേഷ് കൃഷ്ണ, ബാബു ആന്റണി, അനിഷ്‌മ അനിൽകുമാർ എന്നിവരാണ് മറ്റ് പ്രധാനവേഷങ്ങള്‍ കൈകാര്യം ചെയ്യുന്നത്. ചിത്രത്തിന്റെ പോസ്റ്റ് പ്രൊഡക്ഷൻ ജോലികൾ പുരോഗമിക്കുകയാണ്. ഉടന്‍ തന്നെ ചിത്രം പ്രേക്ഷകരുടെ മുന്നിലെത്തും.
