മികച്ച തിരക്കഥയുടെയും ഗംഭീര വിഷ്വലുകളുടെയും പിൻബലത്തോടെ പ്രേക്ഷകരെ ഞെട്ടിക്കുന്ന സംവിധായകനാണ് സഞ്ജയ് ലീല ബൻസാലി. കൂടാതെ രൺബീർ കപൂർ, ആലിയ ഭട്ട്, വിക്കി കൗശൽ എന്നിവരെ പ്രധാന കഥാപാത്രങ്ങളാക്കി സഞ്ജയ് ലീല ബൻസാലി നിർമിക്കുന്ന ഏറ്റവും പുതിയ വരാനിരിക്കുന്ന ചിത്രമാണ് ‘ലവ് ആൻ്റ് വാർ’. ഒരു റൊമാന്റിക് ഡ്രാമയായാണ് ചിത്രം ഒരുങ്ങുന്നത്. ചിത്രത്തിന്റെ ഷൂട്ടിംഗ് ഇടവേളയിൽ സഞ്ജയ് ലീല ബൻസാലിക്കൊപ്പം അഭിനേതാക്കൾ പങ്കുവെച്ച ചിത്രമാണ് ഇപ്പോൾ സോഷ്യൽ മീഡിയയിൽ ശ്രദ്ധേയമാകുന്നത്.
ബൻസാലിയുടെ പിറന്നാൾ ആഘോഷിക്കുന്നതിനോടൊപ്പം വിക്കി കൗശലിന്റെ ഏറ്റവും പുതിയ സിനിമയായ ഛാവയുടെ വിജയവും അവർ ആഘോഷിച്ചു. നടൻ വിക്കി കൗശൽ, രൺബീർ കപൂർ, ആലിയ ഭട്ട്, സംവിധായകൻ സഞ്ജയ് ലീല ബൻസാലി എന്നിവരാണ് ആഘോഷ ചിത്രങ്ങളിലുള്ളത്.
‘ഞങ്ങളുടെ സംവിധായകനെ ആഘോഷിക്കാൻ നൈറ്റ് ഷൂട്ടുകളിൽ നിന്ന് പെട്ടെന്നുള്ള ഇടവേള. ഛാവയിലൂടെ ബോക്സ് ഓഫീസ് തകർത്ത വിക്കിയ്ക്ക് ഒരുപാട് കൈയടി’ ആലിയ ഭട്ട് ഇൻസ്റ്റാഗ്രാമിലൂടെ കുറിച്ചു. ‘ഗംഗുഭായ് കത്തിയവാടി’ എന്ന സൂപ്പർഹിറ്റ് ചിത്രത്തിന് ശേഷം ആലിയ ഭട്ട് – ബൻസാലി കൂട്ടുകെട്ടിലെത്തുന്ന ചിത്രമാണ് ‘ലവ് ആൻ്റ് വാർ’. 2026 മാർച്ച് 20-ന് ചിത്രം തിയേറ്ററുകളിൽ എത്തും.
ഛത്രപതി ശിവാജിയുടെ മകനും മറാത്താ രാജാവുമായിരുന്ന സാംബാജിയുടെ ജീവിതത്തെ ആസ്പദമാക്കിയെടുത്ത ചിത്രമാണ് ‘ഛാവ’. ഗംഭീര പ്രതികരണമാണ് സിനിമയ്ക്ക് ബോക്സ് ഓഫീസിൽ നിന്നും പ്രേക്ഷകരിൽ നിന്നും ലഭിക്കുന്നത്. രണ്ടു വാരം പിന്നിടുമ്പോൾ ചിത്രം ആഗോളതലത്തിൽ 400 കോടി ക്ലബിൽ ഇടം പിടിച്ചിരിക്കുകയാണ്.
STORY HIGHLIGHT: vicky kaushal ranbir kapoor alia bhat celebrates chhaava success