അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.
പിഎംശ്രീ വിഷയത്തിൽ എതിർപ്പ് വീണ്ടും ആവർത്തിച്ച് സിപിഐ. പാർട്ടിയുടെ മുഖപത്രമായ ജനയുഗത്തിലൂടെയാണ് കേന്ദ്രത്തേയും പിഎംശ്രീ പദ്ധതിയേയും രൂക്ഷമായ ഭാഷയിൽ വിമർശിച്ചത്.
മോദി സര്ക്കാരിന്റെ ദുശാഠ്യത്തിന് വഴങ്ങരുതെന്നും പിഎം ശ്രീയിൽ ചേരാത്തതിനാൽ എസ്എസ്എ ഫണ്ട് തടഞ്ഞുവെക്കുന്നത് അംഗീകരിക്കാനാകില്ലെന്നുമാണ് ജനയുഗത്തിലെ മുഖപ്രസംഗത്തിൽ പറഞ്ഞിരിക്കുന്നത്. പദ്ധതിയിൽ ചേരാതെ അര്ഹമായ അവകാശങ്ങള് കണക്ക് പറഞ്ഞു വാങ്ങണമെന്നും സിപിഐ വ്യക്തമാക്കുന്നു. പിഎം ശ്രീയിൽ ചേരാൻ വിദ്യാഭ്യാസ വകുപ്പ് തിടുക്കം കാണിക്കുമ്പോഴാണ് സിപിഐ ഇത്തരമൊരു നിലപാട് എടുത്തിരിക്കുന്നത്.
പിഎം ശ്രീയുടെ ധാരണാപത്രം ഒപ്പുവെക്കാത്തതിന്റെ പേരിൽ സമഗ്ര ശിക്ഷ അഭിയാൻ പദ്ധതി പ്രകാരം കേരളത്തിന് ലഭിക്കേമ്ട 1500 കോടിയോളം രൂപ കേന്ദ്രം തടഞ്ഞിരിക്കുകയാണെന്നും ജനയുഗം മുഖപ്രസംഗത്തിൽ പറയുന്നു. ദേശീയ വിദ്യാഭ്യാസ നയം നടപ്പാക്കുന്നതിന്റെ ഘടകങ്ങളിലൊന്നാണ് പിഎം ശ്രീ പദ്ധതി. എൻഇപി 2024 നടപ്പാക്കുന്നത് സംബന്ധിച്ച് കേരളമടക്കമുള്ള സംസ്ഥാനങ്ങളുടെ വിയോജിപ്പ് രാഷ്ട്രീയവും ആശയപരവും പ്രായോഗികവുമായ വസ്തുതകളെ അടിസ്ഥാനമാക്കിയുള്ളതാണെന്നും മുഖപ്രസംഗത്തിൽ പറയുന്നു.
കേരളമടക്കം രാജ്യത്തെ വിവിധ സംസ്ഥാനങ്ങള് വിദ്യാഭ്യാസ രംഗത്ത് കൈവരിച്ച നേട്ടങ്ങളും മികവും അവഗണിച്ച് ഈ രംഗത്തെ തുടര് വികാസത്തെയും വളര്ച്ചെയും തടയാൻ മാത്രമേ മോദി സര്ക്കാരിന്റെ ദുശാഠ്യത്തിന് കഴിയുകയുള്ളു. അത്തരം സമ്മര്ദങ്ങള്ക്ക് വഴങ്ങാതെ അര്ഹമായ അവകാശങ്ങള് കണക്കുപറഞ്ഞ് വാങ്ങാൻ രാജ്യത്തിന്റെ ഭരണഘടനയും നീതിന്യായ വ്യവസ്ഥയും സംസ്ഥാനങ്ങള്ക്ക് അവസരം ഉറപ്പുനൽകുന്നുണ്ടെന്ന് പറഞ്ഞാണ് മുഖപ്രസംഗം അവസാനിക്കുന്നത്.
