അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.സാങ്കേതികവിദ്യ വളരുന്നതിനനുസരിച്ച് ഓൺലൈൻ തട്ടിപ്പുകളും വർദ്ധിക്കുകയാണ്. ഈ സാഹചര്യത്തിലാണ്, തങ്ങളുടെ ഉപഭോക്താക്കൾക്കായി പുതിയ സുരക്ഷാ ഫീച്ചർ അവതരിപ്പിച്ചിരിക്കുകയാണ് ട്രൂകോളർ. ഡിജിറ്റൽ തട്ടിപ്പിനെതിരായി പുറത്തിറക്കിയ ട്രൂകോളർ സ്‌കാംഫീഡ് ഫീച്ചറിനെക്കുറിച്ച് കൂടുതലറിയാം.
ട്രൂകോളർ ആപ്പിലെ പുതിയൊരു ഇന്‍ററാക്‌ടീവ് വിഭാഗമാണ് സ്‌കാംഫീഡ്. ഉപയോക്താക്കൾക്ക് അവരുടെ നമ്പറിലേക്ക് വരുന്ന സ്‌കാം കോളുകളും സന്ദേശങ്ങളും റിപ്പോർട്ട് ചെയ്യാൻ സ്‌കാംഫീഡ് ഫീച്ചറിലൂടെ കഴിയും. ഉപയോക്താക്കൾ സംശയം തോന്നിക്കുന്ന കോളുകളോ സന്ദേശങ്ങളോ ലഭിച്ചാൽ അത് റിപ്പോർട്ട് ചെയ്യാനാകും. ഇത്തരത്തിൽ മറ്റുള്ളവർ റിപ്പോർട്ട് ചെയ്‌തത് കാണാനും, ഇന്‍ററാക്‌ടീവ് വിഭാഗം കമ്മ്യൂണിറ്റിയിൽ നൽകിയിരിക്കുന്ന ഉപദേശം വായിക്കാനും കഴിയും.
ഒടിപി തട്ടിപ്പ്, വ്യാജ ജോലി ഓഫറുകൾ, യുപിഐ തട്ടിപ്പുകൾ, പ്രണയ തട്ടിപ്പുകൾ, ഫിഷിങ് തുടങ്ങിയ എല്ലാ തട്ടിപ്പ് കേസുകളും ട്രൂകോളറിന്‍റെ സ്‌കാംഫീഡ് ഫീച്ചറിൽ ഉപഭോക്താക്കൾക്ക് പങ്കിടാം. ഉപയോക്താവ് തന്നെ സൃഷ്‌ടിക്കുന്ന ഒരു തത്സമയ അലേർട്ട് സംവിധാനമായിരിക്കും ഈ ഫീച്ചർ. സാധ്യമായ തട്ടിപ്പുകളെക്കുറിച്ച് കമ്മ്യൂണിറ്റിയിലെ മറ്റുള്ളവർക്കും മുന്നറിയിപ്പ് നൽകാൻ ഇതുവഴി അവർക്ക് സാധിക്കും. ഇതുവഴി വിവിധ ഡിജിറ്റൽ തട്ടിപ്പുകളെ കുറിച്ച് അവബോധവാന്മാരാവാനും, തട്ടിപ്പ് തടയാൻ എന്തുചെയ്യണമെന്നും ഉപയോക്താക്കൾക്ക് അറിവ് ലഭിക്കും.
കോടിക്കണക്കിന് സ്‌മാർട്ട്‌ഫോൺ ഉപയോക്താക്കൾ ഇന്ത്യയിലുണ്ട്. ഈ മൊബൈൽ ഉപയോക്താക്കൾക്ക് വർഷംതോറും കോടിക്കണക്കിന് സ്‌പാം കോളുകളാണ് വരുന്നത്. സ്‌പാം കോളുകളെ തടയാനായി കോൾ ബ്ലോക്കിങ് സാങ്കേതികവിദ്യയുണ്ടെങ്കിലും ഇതിൽ നിന്നൊന്നും തന്നെ ഉപയോക്താക്കൾക്ക് വലിയ പ്രയോജനം ലഭിക്കുന്നില്ല.
കോളർ നെയിം പ്രസന്‍റേഷൻ: അജ്ഞാത നമ്പറുകളിൽ നിന്ന് കോളുകൾ വരുമ്പോൾ ആരാണെന്ന് മനസിലാക്കാൻ ട്രൂകോളർ പോലെയുള്ള തേർഡ് പാർട്ടി ആപ്പുകൾ ഇല്ലാതെ തന്നെ വിളിക്കുന്ന ആളുകളുടെ പേര് കോളിനൊപ്പം മൊബൈൽ സ്‌ക്രീനിൽ പ്രദർശിപ്പിക്കാനൊരുങ്ങുകയാണ് ടെലികോം നിർമാതാക്കളായ എയർടെലും ജിയോയും വോഡഫോൺ ഐഡിയയും. കോളർ നെയിം പ്രസന്‍റേഷൻ (സിഎൻഎപി) എന്ന പേരിലാണ് ഈ പുതിയ ഫീച്ചർ പുറത്തിറക്കുക. ഈ സാങ്കേതികവിദ്യയ്‌ക്കാവശ്യമായ സെർവറുകളും സോഫ്റ്റ്‌വെയറുകളും വികസിപ്പിക്കുന്നതിനായി എച്ച്പി, ഡെൽ, എറിക്‌സൺ, നോക്കിയ തുടങ്ങിയ പ്രമുഖ കമ്പനികളുമായി കൈകോർക്കുകയാണ് പ്രമുഖ ടെലികോം ദാതാക്കൾ. 2024 ഫെബ്രുവരിയിൽ ടെലികോം അതോറിറ്റി ഓഫ് ഇന്ത്യ സിഎൻഎപി നടപ്പിലാക്കാൻ ശുപാർശ ചെയ്‌തിരുന്നു. ടെലികോം ദാതാക്കൾ ഇതിനായുള്ള തയ്യാറെടുപ്പുകൾ ആരംഭിച്ചുകഴിഞ്ഞു.
