മോഹന്‍ലാല്‍ നായകനായി എത്തിയ തുടരും ബോക്‌സ് ഓഫീസില്‍ കുതിപ്പ് തുടരുന്നു. ചിത്രത്തിന്റെ 11-ാം ദിവസത്തിലും വന്‍ കളക്ഷന്‍ ആണ് കേരളത്തില്‍ നിന്നും ഇന്ത്യയ്ക്ക് പുറമേ നിന്നും തുടരും നേടുന്നത്. ചിത്രത്തിന്റെ ബജറ്റും ലഭിക്കുന്ന കളക്ഷനും വച്ച് നോക്കിയാല്‍ മലയാള സിനിമയില്‍ സമീപകാലത്ത് ഏറ്റവും ജനപ്രീതി നേടിയ ചിത്രമായി മാറുകയാണ് ‘തുടരും’. മലയാളത്തിനൊപ്പം തമിഴ്, തെലുങ്ക് പ്രേക്ഷകര്‍ക്കിടയിലും സിനിമയ്ക്ക് മികച്ച പ്രതികരണം ലഭിക്കുന്നുണ്ട്. ഏപ്രില്‍ 25 നാണ് ചിത്രം തീയറ്ററുകളില്‍ എത്തിയത്. ചിത്രത്തിന്റെ സംവിധാനം നിര്‍വഹിച്ചിരിക്കുന്നത് തരുണ്‍ മൂര്‍ത്തിയാണ്.
ചിത്രം ഒരു ഫാമിലി ഡ്രാമ ആണെന്നും എന്നാല്‍ ഫീല്‍ ഗുഡ് അല്ലെന്നുമാണ് സംവിധായകന്‍ തരുണ്‍ മൂര്‍ത്തി റിലീസിന് മുന്‍പ് പറഞ്ഞത്. ഹൈപ്പ് കൂട്ടാതിരിക്കാനായി ചിത്രത്തിന്റെ ആക്ഷന്‍, ത്രില്ലര്‍ അംശങ്ങള്‍ അണിയറക്കാര്‍ ബോധപൂര്‍വ്വം മറച്ചുവെക്കുകയായിരുന്നു. എന്നാല്‍ ആദ്യ ഷോകള്‍ക്കിപ്പുറം വമ്പന്‍ മൗത്ത് പബ്ലിസിറ്റി നേടിയതോടെ ചിത്രം ബോക്‌സ് ഓഫീസില്‍ വന്‍ വിജയമായി മുന്നേറുകയാണ്.
ഇപ്പോഴിതാ ചിത്രത്തിന്റെ രണ്ടാം തിങ്കളാഴ്ചയും ആഗോള തലത്തില്‍ വമ്പന്‍ കളക്ഷനാണ് നേടുന്നത്. ആഭ്യന്തര ബോക്‌സോഫീസില്‍ ചിത്രം നേടിയിരിക്കുന്നത് 5.15 കോടിയാണ് രൂപയാണ്. ചിത്രം റിലീസ് ചെയ്ത് 11 ദിവസം കഴിഞ്ഞിട്ടും ചിത്രത്തിന്റെ നെറ്റ് കളക്ഷന്‍ ഇതുവരെ 5 കോടിക്ക് താഴെ പോയിട്ടില്ല എന്നതും എടുത്ത് പറയേണ്ട കാര്യമാണ്. ചിത്രം പല കളക്ഷന്‍ റെക്കോഡുകളും തകര്‍ത്തേക്കും എന്നാണ് സൂചന. ട്രാക്കര്‍മാര്‍ നല്‍കുന്ന ഏറ്റവും പുതിയ വിവരം അനുസരിച്ച് ചിത്രം ആഗോള ബോക്‌സ് ഓഫീസില്‍ നിന്ന് 150 കോടി കടന്നിട്ടുണ്ട്. പുലിമുരുകനെ പിന്നിലാക്കി മലയാളത്തില്‍ 150 കോടിയില്‍ അധികം നേടുന്ന ആറാമത്തെ ചിത്രമായിരിക്കുകയാണ് തുടരും.
ഷണ്മുഖം എന്ന ടാക്‌സി ഡ്രൈവറായാണ് ചിത്രത്തില്‍ മോഹന്‍ലാല്‍ എത്തുന്നത്. ശോഭനയാണ് ചിത്രത്തിലെ നായിക. ബിനു പപ്പു, ഫര്‍ഹാന്‍ ഫാസില്‍, മണിയന്‍പിള്ള രാജു എന്നിവര്‍ക്കൊപ്പം നിരവധി പുതുമുഖങ്ങളും ചിത്രത്തിലുണ്ട്. ഷാജി കുമാര്‍ ആണ് ഛായാഗ്രഹണം. എഡിറ്റിംഗ് നിഷാദ് യൂസുഫ്, ഷെഫീഖ് വി ബി, സംഗീതം ജേക്‌സ് ബിജോയ്, എക്‌സിക്യൂട്ടീവ് പ്രൊഡ്യൂസര്‍ അവന്തിക രഞ്ജിത്ത്.