അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.കായികവകുപ്പ് സംഘടിപ്പിക്കുന്ന കിക്ക് ഡ്രഗ്‌സ്, സേ യെസ് ടു സ്‌പോര്‍ട്‌സ് (Kick Drugs Say yes to Sports) ലഹരിവിരുദ്ധ സന്ദേശ യാത്ര മെയ് 14 ന് തിരുവനന്തപുരത്തു നിന്ന് പുനരാരംഭിക്കുന്നു. അതിര്‍ത്തിയില്‍ സംഘര്‍ഷം ശക്തമായിരുന്ന സാഹചര്യത്തില്‍ യാത്ര താല്‍ക്കാലികമായി നിര്‍ത്തി വെച്ചിരുന്നു. വെടിനിര്‍ത്തല്‍ പ്രഖ്യാപിച്ചതിനാല്‍ സംഘര്‍ഷാവസ്ഥ അയഞ്ഞതോടെ സര്‍ക്കാര്‍ പരിപാടികള്‍ തുടരാന്‍ തീരുമാനം എടുത്ത സാഹചര്യത്തിലാണ് യാത്ര വീണ്ടും പ്രയാണം തുടങ്ങുന്നത്.
കുട്ടികളെയും യുവജനങ്ങളെയും മാത്രമല്ല, മുഴുവന്‍ ജനങ്ങളെയും കളിക്കളങ്ങളില്‍ എത്തിക്കുക എന്നതാണ് ജാഥയുടെ ലക്ഷ്യം. മെയ് 5 ന് കാസര്‍ക്കോട് നിന്നാരംഭിച്ച യാത്ര വലിയ ജനപങ്കാളിത്തത്തോടെ 5 ജില്ലകളില്‍ പര്യടനം പൂര്‍ത്തിയാക്കിയിരുന്നു. കണ്ണൂര്‍, വയനാട്, കോഴിക്കോട്, പാലക്കാട് ജില്ലകളില്‍ ഗംഭീര പ്രതികരണമാണ് ലഭിച്ചത്. ജനപ്രതിനിധികള്‍, വിദ്യാര്‍ഥികള്‍, യുവജനങ്ങള്‍, കായി സംഘടനകള്‍, കായിക ക്ലബുകള്‍, കായിക നക്കാദമികള്‍, വ്യാപാരി സമൂഹം, വിവിധ സംഘടനാ പ്രതിനിധികള്‍, മാധ്യമപ്രതിനിധികള്‍ തുടങ്ങിയ സമൂഹത്തിന്റെ എല്ലാ തുറകളിലുമുള്ളവര്‍ യാത്രയിലും ബന്ധപ്പെട്ട പരിപാടികളിലും അണിനിരന്നു. യാത്രാ കേന്രങ്ങളില്‍ അവതരിപ്പിച്ച വിവിധ പരിപാടികള്‍ കാണികളെ ആകര്‍ഷിച്ചു. കളിയുപകരണങ്ങളുടെ വിതരണവും കളിക്കളങ്ങള്‍ വീണ്ടെടുക്കലും ഓരോ വേദിയിലും വലിയ ആവേശമുയര്‍ത്തി.
തിരുവനന്തപുരത്തു നിന്ന് 14 ന് പുനരാരംഭിക്കുന്ന യാത്ര 24 ന് മലപ്പുറത്താണ് സമാപിക്കുക. അയ്യായിരത്തിലധികം പേര്‍ പങ്കെടുക്കുന്ന കൂട്ടയോട്ടത്തോടെയാണ് സമാപനം. ലഹരിക്കെതിരായ പോരാട്ടത്തില്‍ വലിയ ചര്‍ച്ചയായ യാത്രയ്ക്ക് അടുത്ത 9 ജില്ലകളിലും മികച്ച പ്രതികരണം ഉറപ്പാണ്. എല്ലാവരും സഹകരിച്ചാല്‍ ലഹരിയെന്ന മഹാവിപത്തിനെ നമുക്ക് അകറ്റാന്‍ കഴിയും. നന്മയിലേക്കുള്ള പോരാട്ടത്തിനായി, ലഹരിമരുന്ന് മുക്തമായ കേരളത്തിനായി നമുക്ക് കൈ കോര്‍ക്കാം.
യാത്രാ റൂട്ട്:
മെയ് 14: തിരുവനന്തപുരം.
15: കൊല്ലം
16: പത്തനംതിട്ട
17: ആലപ്പുഴ
19: കോട്ടയം
21: ഇടുക്കി
22: എറണാകുളം
23: തൃശൂര്‍
24: മലപ്പുറം (സമാപനം).
