അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.ആസം മഴയിൽ മുങ്ങുകയാണ്. മഴയുടെ താണ്ഡവത്തിൽ ദുരിതത്തിലായത് നിരവധി പേരാണ് ഇവിടെ. വെള്ളപ്പൊക്കത്തിലും മണ്ണിടിച്ചിലിലും എട്ട് പേർ മരിച്ചു . തുടർച്ചയായ മഴയെ തുടർന്ന് 17 ജില്ലകളിലായി വൻ വെള്ളപ്പൊക്കമുണ്ടായി. 78,000 ത്തിലധികം ആളുകളെ ഇത് ബാധിച്ചതായി അധികൃതർ അറിയിച്ചു. സംസ്ഥാനത്തിന്റെ പടിഞ്ഞാറൻ ഭാഗത്തുള്ള മൂന്ന് ജില്ലകൾ ‘റെഡ് അലേർട്ട്’ പ്രഖ്യാപിച്ചിട്ടുണ്ട്. എട്ട് ജില്ലകൾ ഓറഞ്ച് അലേർട്ടിൽ തുടരുകയാണെന്ന് പ്രാദേശിക കാലാവസ്ഥാ കേന്ദ്രത്തിന്റെ (ആർഎംസി) കണക്കുകൾ സൂചിപ്പിക്കുന്നു. അതേസമയം, അരുണാചൽ പ്രദേശിലെയും മേഘാലയയിലെയും ഉയർന്ന പ്രദേശങ്ങളിൽ നിന്നുള്ള മഴവെള്ളം സംസ്ഥാനത്തെ വെള്ളപ്പൊക്ക സ്ഥിതി കൂടുതൽ വഷളാക്കി. കാംരൂപ് മെട്രോപൊളിറ്റൻ ജില്ലയിലാണ് മണ്ണിടിച്ചിലിൽ അഞ്ച് പേർ മരിച്ചതെന്ന് അസം സംസ്ഥാന ദുരന്ത നിവാരണ അതോറിറ്റി (എ.എസ്.ഡി.എം.എ) അറിയിച്ചു. ഗുവാഹത്തിയിൽ വൻതോതിലുള്ള വെള്ളക്കെട്ട് റിപ്പോർട്ട് ചെയ്യപ്പെട്ടു. പല പ്രദേശങ്ങളും രണ്ടാം ദിവസവും വെള്ളത്തിനടിയിലാണ്. വെള്ളമോ വൈദ്യുതിയോ ഇല്ലാതെ വീടുകൾ ഉപേക്ഷിച്ചുപോയതിനാൽ രക്ഷാപ്രവർത്തകർ ഒറ്റപ്പെട്ടുപോയ ആളുകളെ സുരക്ഷിത സ്ഥലങ്ങളിലേക്ക് മാറ്റികൊണ്ടിരിക്കുകയാണ്.
