അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.വിവാഹമോചനം നേടിയെങ്കിലും നടൻ ധനുഷും ചലച്ചിത്ര നിർമ്മാതാവ് ഐശ്വര്യ രജനികാന്തും വീണ്ടും ഒന്നിച്ചു. സ്കൂൾ വിദ്യാഭ്യാസം പൂർത്തിയാക്കിയ മകൻ യാത്രയുടെ ബിരുദദാന ചടങ്ങ് ആഘോഷിക്കാനാണ് ഇരുവരും ഒന്നിച്ചെത്തിയത്. മകൻ യാത്രയുടെ ജീവിതത്തിലെ സുപ്രധാന നാഴികക്കല്ല് കൊണ്ടാടാൻ എത്തിയ ഇരുവരുടെയും ചിത്രങ്ങൾ സോഷ്യൽ മീഡിയയിലെല്ലാം വൈറൽ ആണ്.
അമേരിക്കൻ ഇന്റർനാഷ്നൽ സ്കൂൾ ചെന്നൈയിലെ വിദ്യാർഥിയായിരുന്നു യാത്ര. ഗ്രാജുവേഷൻ ചടങ്ങിന്റെ ചിത്രങ്ങൾ ധനുഷ് ഇൻസ്റ്റഗ്രാമിൽ പങ്കുവച്ചു. മുൻഭാര്യ ഐശ്വര്യ രജനികാന്തിനൊപ്പമുള്ള ചിത്രങ്ങളാണ് താരം ഇൻസ്റ്റഗ്രാമിൽ പങ്കുവച്ചത്.
ഇരുവരും ഒരുമിച്ച് മകനെ കെട്ടിപിടിച്ച് നിൽ‌ക്കുന്ന ചിത്രങ്ങളാണ് ധനുഷ് ‘പ്രൗഡ് പാരന്റ്സ്’ എന്ന അടിക്കുറിപ്പെടെ പങ്കുവച്ചത്. യാത്ര എന്ന ഹാഷ്ടാഗും ക്യാപ്ഷനൊപ്പം ചേർത്തിട്ടുണ്ട്. ചിത്രം രജനികാന്തും സമൂഹമാധ്യമങ്ങളിൽ പങ്കുവച്ചു. ‘എന്റെ കൊച്ചു മകൻ ആദ്യത്തെ നാഴികകല്ല് താണ്ടി, അഭിനന്ദനങ്ങൾ യാത്ര കണ്ണാ’ എന്ന ക്യാപ്ഷനോടെയാണ് രജനികാന്ത് ചിത്രം പങ്കുവച്ചിരിക്കുന്നത്.
നിമിഷ നേരം കൊണ്ടാണ് ധനുഷ് പങ്കുവച്ച ചിത്രം സമൂഹമാധ്യമങ്ങളിൽ വൈറലായത്. വേർപിരിഞ്ഞതിന് ശേഷം ധനുഷിനെയും ഐശ്വര്യയെയും ഒരുമിച്ച് കണ്ട സന്തോഷത്തിലാണ് ആരാധകർ. വിവാഹബന്ധം ഒന്നിനും ഒരു അവസാനമല്ലെന്നും ഇതുപോലെ സൗഹൃദപരമായി തുടരാമെന്നുമാണ് ആരാധകർ പറയുന്നത്. ഗായകൻ വിജയ് യേശുദാസ് അടക്കമുള്ള സെലിബ്രിറ്റികളും ആരാധകരും ഫോട്ടോയ്ക്ക് താഴെ നിരവധി കമന്റുകളാണ് രേഖപ്പെടുത്തിയിരിക്കുന്നത്. ‘എല്ലാവരെയും ഒരുമിച്ച് കണ്ടതിൽ സന്തോഷം’, ‘എന്തൊക്കെ അഭിപ്രായ വ്യത്യാസങ്ങൾ ഉണ്ടെങ്കിലും അതെല്ലാം മകന് വേണ്ടി മാറ്റിവച്ചു’, ‘ഇവരെ പോലയെ ആയിരിക്കണം’ എന്നിങ്ങനെയാണ് ഫോട്ടോയ്ക്ക് താഴെയുള്ള ചില കമന്റുകൾ.
ധനുഷും ഐശ്വര്യ രജനികാന്തും തമ്മിലുള്ള വിവാഹമോചനം വലിയ വാർത്തയായിരുന്നു. 18 വർഷത്തെ ദാമ്പത്യ ജീവിതം ഇരുവരും അവസാനിപ്പിച്ചത് 2022ൽ ആണ്. സമൂഹമാധ്യമ പോസ്റ്റിലൂടെയായിരുന്നു ഇരുവരും വേർപിരിയൽ പ്രഖ്യാപിച്ചത്. പിന്നീട് കുടുംബകോടതി വഴി 2024ൽ ഇരുവരും ഔദ്യോഗികമായി വിവാഹമോചിതരായി. എന്നാൽ മക്കളായ യാത്രയ്ക്കും ലിംഗയ്ക്കും വേണ്ടി ഇരുവരും എപ്പോഴും ഒന്നിച്ചെത്താറുണ്ട്.
