ഇന്ത്യന്‍ മോട്ടോര്‍സ്പോര്‍ട്സിനെ പ്രോത്സാഹിപ്പിക്കുന്നതില്‍ മുന്‍പന്തിയിലുള്ള ടിവിഎസ് മോട്ടോര്‍ കമ്പനി, ഈ രംഗത്ത് പുതിയ യുഗത്തിന് തുടക്കം കുറിക്കുന്നു. ജൂണ്‍ 6 മുതല്‍ 8 വരെ ചെന്നൈയിലെ മദ്രാസ് ഇന്‍റര്‍നാഷണല്‍ സര്‍ക്യൂട്ടില്‍ (എംഐസി) നടക്കുന്ന 2025 ഇന്ത്യന്‍ നാഷണല്‍ മോട്ടോര്‍സൈക്കിള്‍ റേസിങ് ചാമ്പ്യന്‍ഷിപ്പിലെ (ഐഎന്‍എംആര്‍സി) നാഷണല്‍ ചാമ്പ്യന്‍ഷിപ്പ് പ്രോ സ്റ്റോക്ക് 200 ക്ലാസിന്‍റെ ഔദ്യോഗിക റേസ് മെഷീന്‍ ദാതാക്കളായി ടിവിഎസ് മോട്ടോര്‍ കമ്പനിയെ തിരഞ്ഞെടുത്തു. ഇതിന്‍റെ ഭാഗമായി ദേശീയ ചാമ്പ്യന്‍ഷിപ്പില്‍ പങ്കെടുക്കുന്ന സ്വതന്ത്ര റേസര്‍മാര്‍ക്ക് പ്രത്യേകമായി റേസ്ട്യൂണ്‍ ചെയ്ത മോട്ടോര്‍സൈക്കിളുകള്‍ ടിവിഎസ് കമ്പനി ലഭ്യമാക്കും. ഇത്തരത്തില്‍ ഇന്ത്യന്‍ മോട്ടോര്‍സ്പോര്‍ട്സിന്‍റെ ചരിത്രത്തില്‍ ആദ്യമായാണ് ഒരു ബ്രാന്‍ഡിനെ നിയോഗിക്കുന്നത്. ടിവിഎസിന്‍റെ നേതൃത്വവും റേസിങ് മികവിനോടുള്ള പ്രതിബദ്ധതയും വീണ്ടും ഉറപ്പിക്കുന്നതാണ് ഈ തീരുമാനം. ടൂവീലര്‍ റേസിങിനെ കൂടുതല്‍ ജനകീയവല്‍ക്കരിക്കാനും ഇത് വഴിയൊരുക്കും.
മത്സരം മികവുറ്റതാക്കുന്നതിനും, സ്വതന്ത്ര റേസിങ് ടീമുകളെ പിന്തുണയ്ക്കുന്നതിനുമായാണ് 2025 ഐഎന്‍എംആര്‍സിയില്‍ നാഷണല്‍ ചാമ്പ്യന്‍ഷിപ്പ് പ്രോ സ്റ്റോക്ക് 200 കാറ്റഗറി അവതരിപ്പിച്ചത്. ഈ വിഭാഗത്തില്‍ മത്സരിക്കുന്ന സ്വതന്ത്ര റേസര്‍മാര്‍ക്ക് റേസ്ട്യൂണ്‍ഡ് ടിവിഎസ് അപാച്ചെ ജിപി200ആര്‍ മോട്ടോര്‍സൈക്കിളുകള്‍ ടിവിഎസ് നല്‍കും. 200 സിസി ക്യൂബിക് ശേഷിയുള്ള ടിവിഎസ് അപാച്ചെ ജിപി200ആര്‍ മോട്ടോര്‍സൈക്കിളുകള്‍ക്ക് 105 കിലോയാണ് ഭാരം. സ്റ്റോക്ക് എഞ്ചിനേക്കാള്‍ 40% അധികം പരമാവധി പവര്‍ ലഭിക്കും. മണിക്കൂറില്‍ 155 കി.മീറ്ററിന് മുകളിലാണ് പരമാവധി വേഗത. കൂടാതെ, സീസണിലുടനീളം ഉയര്‍ന്ന പ്രകടനം ഉറപ്പാക്കുന്നതിന് പെട്രോണസ് ടിവിഎസ് റേസിങ് ടീം പൂര്‍ണ സാങ്കേതിക പിന്തുണയും മെഷീന്‍ സര്‍വീസും അറ്റകുറ്റ പണിയും ഉറപ്പാക്കും. ഈ വിഭാഗത്തില്‍ പങ്കെടുക്കുന്ന ടീമുകള്‍ക്കും റേസര്‍മാര്‍ക്കും വേണ്ടിയുള്ള തിരഞ്ഞെടുപ്പ് പ്രക്രിയ 2025 മെയ് 28ന് മദ്രാസ് ഇന്‍റര്‍നാഷണല്‍ സര്‍ക്യൂട്ടില്‍ സമാപിച്ചിരുന്നു. ആവേശകരമായ പുതിയ വിഭാഗം മത്സരത്തിലേക്ക് ഏഴ് ടീമുകളെയും പന്ത്രണ്ട് റേസര്‍മാരെയുമാണ് തിരഞ്ഞെടുത്തത്.
ലോക മോട്ടോ3യില്‍ വൈല്‍ഡ്കാര്‍ഡ് എന്‍ട്രിയായി പങ്കെടുക്കുന്ന ആദ്യത്തെ ഇന്ത്യന്‍ റൈഡറായ കെ.വൈ അഹമ്മദ്, രക്ഷിത് ഡേവ്, ആല്‍വിന്‍ സുന്ദര്‍, സാര്‍ഥക് ചവാന്‍, ചിരന്ത് വി എന്നിവരാണ് ഐഎന്‍എംആര്‍സി 2025 പ്രോ സ്റ്റോക്ക് 300, 400 സിസി ക്ലാസിനായുള്ള പെട്രോണാസ് ടിവിഎസ് റേസിങ് ടീമിലുള്ളത്. മുന്‍ ദേശീയ ചാമ്പ്യന്‍ ജഗന്‍ കുമാറാണ് പരിശീലകന്‍.
ഇന്ത്യന്‍ മോട്ടോര്‍സ്പോര്‍ട്ട് ചരിത്രത്തില്‍ ദേശീയ ചാമ്പ്യന്‍ഷിപ്പിനായി സ്വതന്ത്ര ടീമുകള്‍ക്ക് റേസ്ട്യൂണ്‍ഡ് മെഷീനുകള്‍ നല്‍കുന്ന ആദ്യത്തെ ഇരുചക്ര വാഹന നിര്‍മാതാക്കളാകാന്‍ കഴിഞ്ഞതില്‍ ഏറെ അഭിമാനമുണ്ടെന്ന് ടിവിഎസ് മോട്ടോര്‍ കമ്പനി പ്രീമിയം ബിസിനസ് മേധാവി വിമല്‍ സംബ്ലി പറഞ്ഞു.
STORY HIGHLIGHT: TVS