അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.വാഷിംഗ്ടണ്: ഹോളിവുഡ് താരം വിന് ഡീസലിനെതിരെ ലൈംഗികാതിക്രമത്തിന് കേസ്. നടന്റെ മുന് സഹായിയാണ് ഗുരുതര ആരോപണവുമായി രംഗത്ത് എത്തിയിരിക്കുന്നത്. 2010ല് ഫാസ്റ്റ് ഫൈവിന്റെ ചിത്രീകരണ സമയത്ത് ലൈംഗികമായി പീഡിപ്പിച്ചതായും ആക്രമണത്തിന് മണിക്കൂറുകള്ക്കുള്ളില് ജോലിയില് നിന്ന് പിരിച്ചുവിട്ടെന്നുമാണ് വിന് ഡീസലിന്റെ മുന് സഹായി ആസ്റ്റ ജോനാസണ് പരാതിയില് വിശദമാക്കുന്നത്. ഫാസ്റ്റ് ഫൈവിന്റെ ചിത്രീകരണത്തിനിടെ അറ്റ്ലാന്റയിലെ സെന്റ് റെജിസ് ഹോട്ടലില് വച്ചായിരുന്നു അതിക്രമം എന്നാണ് ആരോപണം.
വ്യാഴാഴ്ചയാണ് ആസ്റ്റ പരാതി നല്കിയത്. സമ്മതം കൂടാതെ 56കാരനായ വിന് ഡീസല് കയറിപ്പിടിച്ചതായും എതിര്പ്പ് അവഗണിക്കാതെ സ്യൂട്ട് റൂമിലേക്ക് കൊണ്ടുപോയി പീഡിപ്പിച്ചെന്നുമാണ് പരാതി. സംഭവം നടന്ന് മണിക്കൂറുകള്ക്കുള്ളില് ജോലിയില് നിന്ന് പുറത്താക്കിയതായും പരാതിക്കാരി വിശദമാക്കുന്നു. വിന് ഡീസലിന്റെ നിര്മ്മാണ കമ്പനിയായ വണ് റേസ് ഫിലിംസില് നിന്ന് നടന്റെ സഹോദരിയാണ് പരാതിക്കാരിയെ പുറത്താക്കിയത്. ലൈംഗിക പീഡനത്തിനൊപ്പം ലിംഗ വിവേചനം, നിയമവിരുദ്ധമായ പ്രതികാരം, മാനസിക ബുദ്ധിമുട്ട് എന്നിവ അടക്കമുള്ളവ നടനില് നിന്നും സഹിക്കേണ്ടി വന്നതായാണ് പരാതി വിശദമാക്കുന്നത്. നടന്റെ നിര്മ്മാണ കമ്പനിക്കും സഹോദരി സമാന്ത വിന്സെന്റിനെതിരെയുമാണ് യുവതിയുടെ പരാതി.
ആക്രമണം ആത്മാഭിമാനത്തിന് ക്ഷതമേല്പ്പിച്ചതായും സ്വന്തം കഴിവുകള വരെ ചോദ്യം ചെയ്യുന്ന അവസ്ഥയിലേക്ക് പരാതിക്കാരി എത്തുന്ന അവസ്ഥയ്ക്കും കാരണമായെന്നാണ് പരാതി വിശദമാക്കുന്നത്. കരിയറില് മുന്നോട്ട് വരാനായി ലൈംഗികപരമായ പ്രത്യുപകാരങ്ങള് ചെയ്യേണ്ടതുണ്ടോയെന്നാണ് പരാതിക്കാരി കോടതിയോട് ചോദിക്കുന്നത്. എന്നാല് തങ്ങളുടെ സ്ഥാപനത്തില് 9 ദിവസം മാത്രം ജോലി ചെയ്ത പരാതിക്കാരിയുടെ ആരോപണത്തില് അടിസ്ഥാനമില്ലെന്നാണ് വിന് ഡീസലിന്റെ അഭിഭാഷകന് പ്രതികരിക്കുന്നത്. 13 വര്ഷത്തിന് ശേഷം പരാതിയുമായി എത്തിയത് ദുരൂഹമാണെന്നും താരത്തിന്റെ അഭിഭാഷകന് പറയുന്നു. ഭയം മൂലമാണ് താൻ വര്ഷങ്ങളോളം നിശ്ശബ്ദത പാലിച്ചതെന്നും എന്നാല് തുറന്ന് സംസാരിക്കാൻ #MeToo പ്രസ്ഥാനം ഊര്ജ്ജം നല്കിയെന്നുമാണ് പരാതിക്കാരി വിശദമാക്കുന്നത്.
കാലിഫോര്ണിയയിലെ ലൈംഗിക ദുരുപയോഗം, മറച്ചുവെക്കല് നിയമപ്രകാരമാണ് കേസ് ഫയല് ചെയ്തിട്ടുള്ളത്. 2022 സെപ്റ്റംബറില് പാസാക്കിയ ഈ നിയമം അതിജീവിക്കുന്നവര്ക്ക് ഒരു പരാതി ഫയല് ചെയ്യുന്നതിന് മൂന്ന് വര്ഷത്തെ കാലയളവ് നല്കുന്നുണ്ട്. ഫാസ്റ്റ് ആൻഡ് ഫ്യൂരിയസ് പമ്പരയുടെ നിര്മ്മാതാവ് കൂടിയായ വിന് ഡീസല് ഹോളിവുഡില് ഏറ്റവും കൂടുതല് വരുമാനം നേടിയ നടന്മാരില് ഒരാളാണ്. ഫാസ്റ്റ് ആൻഡ് ഫ്യൂരിയസ് ചിത്രങ്ങള്ക്ക് പുറമേ, ഗാര്ഡിയൻസ് ഓഫ് ദി ഗാലക്സി, XXX,റിഡിക്ക് എന്നിവയുള്പ്പെടെയുള്ള സിനിമകളില് സുപ്രധാന കഥാപാത്രങ്ങളെയാണ് വിൻ ഡീസല് അവതരിപ്പിച്ചത്.
അന്വേഷണം വാർത്തകൾ വാട്സ്ആപ്പിലൂടെ ലഭിക്കാൻ ക്ലിക്ക് ചെയ്യു
