കേരളത്തില്‍ നിന്നും ‘ലോക’ കണ്ടത് ഇത്രയും പേരോ? കണക്കുകള്‍ പുറത്ത്

ഡൊമിനിക് അരുണിന്റെ സംവിധാനത്തില്‍ കല്യാണി പ്രിയദര്‍ശനെ കേന്ദ്ര കഥാപാത്രമാക്കി പുറത്തിറങ്ങിയ ചിത്രമാണ് ലോക ചാപ്റ്റര്‍-1 ചന്ദ്ര. 275 കോടി രൂപ ആഗോളതലത്തില്‍ കളക്ഷന്‍ നേടിയ ഇന്‍ഡസ്ട്രി ഹിറ്റ് ചിത്രമാണ് ലോക. മഞ്ഞുമ്മല്‍ ബോയ്സിനേയും എമ്പുരാന്റെയും കളക്ഷന്‍ റെക്കോര്‍ഡുകള്‍ തകര്‍ത്താണ് ലോക ഈ നേട്ടം കൈവരിച്ചിരിക്കുന്നത്. ഇപ്പോഴിതാ മറ്റൊരു റെക്കോര്‍ഡ് കൂടി ലോകയെ തേടി എത്തിയിരിക്കുകയാണ്.

കേരളത്തില്‍ ഏറ്റവും കൂടുതല്‍ ആളുകള്‍ തിയേറ്ററില്‍ കണ്ട നാലാമത്തെ സിനിമയായി മാറിയിരിക്കുകയാണ് ലോക. 1.18 കോടി ജനങ്ങളാണ് ചിത്രം ഇതുവരെ തിയേറ്ററില്‍ കണ്ടത്. മോഹന്‍ലാല്‍ ചിത്രമായ പുലിമുരുകന്‍, മഞ്ഞുമ്മല്‍ ബോയ്‌സ്, തുടരും എന്നീ സിനിമകളാണ് ഈ ലിസ്റ്റില്‍ ആദ്യ മൂന്ന് സ്ഥാനത്തുള്ള സിനിമകള്‍. നിലവില്‍ ലോക കേരളത്തില്‍ നിന്നും ഇതുവരെ നേടിയത് 114 കോടി രൂപയാണ്.

The 4th movie to Surpass 1+ crore footfalls in the 21st century after Pulimurugan, ManjummelBoys and Thudarum 🔥 https://t.co/0il0Qa0FHq

— AB George (@AbGeorge_) October 1, 2025

കേരളത്തില്‍ മോഹന്‍ലാല്‍ ചിത്രമായ തുടരുമിനെ മറികടന്ന് ഒന്നാം സ്ഥാനം നേടാന്‍ ലോകയ്ക്ക് ഇനി വേണ്ടത് വെറും അഞ്ച് കോടി മാത്രമാണ്. തുടരും 119 കോടി സ്വന്തമാക്കിയിട്ടാണ് കേരളക്കര വിട്ടത്. കേരള മാര്‍ക്കറ്റില്‍ നിന്നും ഒരു മലയാളം സിനിമ നേടിയ ഏറ്റവും ഉയര്‍ന്ന കളക്ഷനും ഇതോടെ തുടരുമിന്റെ പേരിലായി. ഈ റെക്കോര്‍ഡാണ് ഇപ്പോള്‍ ലോക തകര്‍ക്കാന്‍ ഒരുങ്ങുന്നത്. മികച്ച കളക്ഷനുമായി ഇപ്പോഴും തിയേറ്ററില്‍ പ്രദര്‍ശനം തുടരുന്ന ലോക വരും ദിവസങ്ങളില്‍ ഈ മോഹന്‍ലാല്‍ സിനിമയെ മറികടക്കും എന്ന് തന്നെയാണ് എല്ലാവരുടെയും പ്രതീക്ഷ.

ഇതോടൊപ്പം മഞ്ഞുമ്മല്‍ ബോയ്സിന് ശേഷം തമിഴ് നാട്ടില്‍ നിന്നും 10 കോടി ഷെയറിന് മുകളില്‍ നേടുന്ന ഒരു മലയാള സിനിമയായി മാറിയിരിക്കുകയാണ് ലോക. അഞ്ചാം ആഴ്ചയിലും ഗംഭീര കളക്ഷന്‍ ആണ് സിനിമയ്ക്ക് തമിഴ്‌നാട്ടില്‍ നിന്നും ലഭിക്കുന്നത്. മലയാളത്തിന്റെ തലവര മാറ്റിയ മഞ്ഞുമ്മല്‍ ബോയ്സ് 50 കോടിയാണ് നേടിയത്. ഒരു മലയാള സിനിമ തമിഴ്‌നാട്ടില്‍ നിന്നും നേടുന്ന ഏറ്റവും ഉയര്‍ന്ന കളക്ഷനാണിത്. അതേസമയം, ഈ നേട്ടത്തെ ലോക മറികടക്കുമോ എന്നും പലരും ഉറ്റുനോക്കുന്നുണ്ട്.

അഞ്ച് ഭാഗങ്ങള്‍ ഉള്ള ഒരു വമ്പന്‍ ഫാന്റസി സിനിമാറ്റിക് യൂണിവേഴ്സിലെ ആദ്യ ഭാഗമായി എത്തിയ ഈ ബിഗ് ബഡ്ജറ്റ് ചിത്രത്തില്‍ ചന്തു സലിംകുമാര്‍, അരുണ്‍ കുര്യന്‍, ശരത് സഭ, നിഷാന്ത് സാഗര്‍, വിജയരാഘവന്‍ എന്നിവരും തിളങ്ങിയിട്ടുണ്ട്. ചിത്രത്തിന്റെ രണ്ടാം ഭാഗം പ്രഖ്യാപിച്ചുകൊണ്ടുള്ള ടീസര്‍ കഴിഞ്ഞ ദിവസം അണിയറപ്രവര്‍ത്തകര്‍ പുറത്തുവിട്ടിരുന്നു.