അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.ബോളിവുഡ് താരം ടൈഗർ ഷ്‌റോഫിന് നേരെ ഉണ്ടായ വധശ്രമത്തിന് പിന്നിൽ ഞെട്ടിക്കുന്ന കാരണം പുറത്ത്. താരം സൽമാൻ ഖാനെ പൊതുവേദിയിൽ പുകഴ്ത്തിയതിന്റെ പ്രതികാരമായാണ് തങ്ങൾ ആക്രമണം നടത്തിയതെന്ന് അറസ്റ്റിലായ പ്രതികളിൽ ഒരാൾ അന്വേഷണ ഉദ്യോഗസ്ഥരോട് വെളിപ്പെടുത്തി.
2022-ൽ ഒരു സിനിമാ പ്രൊമോഷണൽ പരിപാടിക്കിടെ സൽമാൻ ഖാനാണ് ബോളിവുഡിലെ ഒരേയൊരു ‘ടൈഗർ’ എന്ന് ടൈഗർ ഷ്‌റോഫ് പരാമർശിച്ചിരുന്നു.
ഈ സംഭവത്തിലുള്ള വൈരാഗ്യമാണ് ആക്രമണത്തിലേക്ക് നയിച്ചതെന്നാണ് പ്രതി മൊഴി നൽകിയിരിക്കുന്നത്. സൽമാനുമായുള്ള താരത്തിന്റെ അടുത്ത ബന്ധവും ഇതിന് കാരണമായതായി നേരത്തെ അഭ്യൂഹങ്ങളുണ്ടായിരുന്നു.
ഞായറാഴ്ച (ഒക്‌ടോബർ 18) ജുഹുവിലെ ഒരു മൈതാനത്ത് ഫുട്ബോൾ കളി കഴിഞ്ഞ് മടങ്ങവേയാണ് ടൈഗറിന് നേരെ വധശ്രമമുണ്ടായത്.
താരത്തിന്റെ വാഹനത്തിന് നേരെ അക്രമികൾ ഏഴ് തവണ വെടിയുതിർക്കുകയും, തുടർന്ന് കൂട്ടാളിയോടൊപ്പം സ്ഥലത്തുനിന്ന് രക്ഷപ്പെടുകയുമായിരുന്നു. വെടിവയ്പ്പിൽ ടൈഗറിന്റെ ഡ്രൈവർക്ക് പരിക്കേറ്റിരുന്നു.
സംഭവത്തിന്റെ ഉത്തരവാദിത്വം ലോറൻസ് ബിഷ്‌ണോയ് സംഘം ഏറ്റെടുത്തിരുന്നു. ആക്രമണം നടന്ന് തൊട്ടുപിറ്റേന്ന് കോട്ട റെയിൽവേ സ്റ്റേഷനിൽ വെച്ച്, പുനെ-ജയ്പൂർ സൂപ്പർ ഫാസ്റ്റ് എക്സ്പ്രസിൽ നിന്നാണ് മൂന്ന് പ്രതികളെയും പോലീസ് പിടികൂടിയത്.
