അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.നടൻ കലാഭവൻ മണിയുടെ കൂടെ അഭിനയിക്കാൻ വിസമ്മതിച്ച നടിയെ ചൊല്ലിയുള്ള പഴയ വിവാദത്തിൽ, സംവിധായകൻ വിനയൻ ഇത്രയും കാലത്തിന് ശേഷം നടത്തിയ വെളിപ്പെടുത്തൽ വിമർശനങ്ങൾക്കിടയാക്കുന്നു. മണിയുടെ നായികയാകാൻ തയ്യാറാവാത്തത് ദിവ്യ ഉണ്ണി ആയിരുന്നില്ല എന്ന് വിനയൻ കഴിഞ്ഞ ദിവസം ഫേസ്ബുക്ക് കമൻ്റിലൂടെ വെളിപ്പെടുത്തിയതാണ് പുതിയ ചർച്ചകൾക്ക് വഴി തുറന്നത്.
വർഷങ്ങളായി ഈ വിഷയത്തിൻ്റെ പേരിൽ ദിവ്യ ഉണ്ണി പൊതുസമൂഹത്തിൽ അവഹേളിക്കപ്പെട്ടിട്ടും, വിനയൻ ഇത്രയും കാലം മൗനം പാലിച്ചതിനെതിരെയാണ് വിമർശനം ശക്തമാകുന്നത്. ദിവ്യ ഉണ്ണിയല്ല യഥാർത്ഥ നടി എന്ന് വ്യക്തമാക്കാൻ സംവിധായകൻ ഇത്രയധികം വൈകിയത് എന്തിനെന്നാണ് ചോദ്യം.
വിനയൻ തന്നെ സംവിധാനം ചെയ്ത ‘ചാലക്കുടിക്കാരൻ ചങ്ങാതി’ എന്ന സിനിമയിൽ, ഒരു നടി മണിയുടെ കൂടെ അഭിനയിക്കില്ല എന്ന് പറയുന്ന രംഗം ഉൾപ്പെടുത്തിയിരുന്നു. അന്നും ദിവ്യ ഉണ്ണി കടുത്ത ആക്രമണം നേരിട്ടിട്ടും വിനയൻ ഇടപെട്ടില്ല.
ഇപ്പോൾ മൗനം ഭഞ്ജിക്കുമ്പോഴും, യഥാർത്ഥ നടിയുടെ പേര് വെളിപ്പെടുത്താൻ വിനയൻ തയ്യാറായിട്ടില്ല. “ആ നടിയുടെ പേര് ഞാൻ വെളിപ്പെടുത്താൻ ആഗ്രഹിക്കുന്നില്ല” എന്ന അദ്ദേഹത്തിൻ്റെ നിലപാട്, സ്വന്തം സിനിമയുടെ പ്രമേയത്തിന് വേണ്ടി വിവാദത്തെ ഉപയോഗിക്കുകയും എന്നാൽ സത്യം പറയാൻ കാലതാമസം വരുത്തുകയും ചെയ്തതിലെ ധാർമികത ചോദ്യം ചെയ്യുന്നതിലേക്ക് നയിച്ചിരിക്കുകയാണ്. വിനയൻ്റെ ഈ നടപടിയെ ‘നിഷ്കളങ്കത’യായി കാണാൻ കഴിയില്ലെന്നാണ് സിനിമാ നിരീക്ഷകരുടെ അഭിപ്രായം.
