തിയേറ്ററിലെ സൂപ്പർഹിറ്റുകൾ OTT-യിലേക്ക്;പ്രദീപ് രംഗനാഥന്റെ ‘ഡ്യൂഡ്’ ഉൾപ്പെടെ അഞ്ച് പ്രധാന ചിത്രങ്ങൾ

തിയേറ്ററുകളിൽ തരംഗം സൃഷ്ടിച്ചതും അല്ലാത്തതുമായ ഒട്ടേറെ സിനിമകളാണ് ഓരോ ആഴ്ചയും OTT പ്ലാറ്റ്‌ഫോമുകളിൽ എത്തുന്നത്. തിയേറ്റർ റിലീസിന് ശേഷം വലിയൊരു വിഭാഗം പ്രേക്ഷകരിലേക്ക് സിനിമകളെത്തിക്കുന്നതിൽ OTT-ക്ക് വലിയ പങ്കുണ്ട്. ചിലപ്പോൾ തിയേറ്ററിൽ വേണ്ടത്ര ശ്രദ്ധ നേടാത്ത ചിത്രങ്ങൾ പോലും OTT-യിൽ വലിയ വിജയം നേടാറുണ്ട്. ഈ വാരം പ്രേക്ഷകർ ആകാംഷയോടെ കാത്തിരിക്കുന്ന പ്രധാന സിനിമകളുടെ വിശേഷങ്ങൾ താഴെ നൽകുന്നു.

പ്രദീപ് രംഗനാഥൻ സംവിധാനം ചെയ്ത് പ്രധാന വേഷത്തിലെത്തിയ ‘ഡ്യൂഡ്’ ആണ് ഈ ആഴ്ചത്തെ പ്രധാന റിലീസുകളിൽ ഒന്ന്. ഒരു റൊമാന്റിക് ഫൺ എന്റർടെയ്‌നർ എന്ന നിലയിൽ മികച്ച പ്രേക്ഷക പ്രതികരണം നേടിയ ചിത്രം 100 കോടി ക്ലബ്ബിൽ ഇടം പിടിച്ചിരുന്നു. ഇതോടെ, തുടർച്ചയായി 100 കോടി കളക്ഷൻ നേടുന്ന പ്രദീപിന്റെ മൂന്നാമത്തെ ചിത്രമായി ഇത് മാറി. നവംബർ 14 മുതൽ നെറ്റ്ഫ്ലിക്സിലൂടെ സിനിമ സ്ട്രീമിംഗ് ആരംഭിക്കും. റിലീസ് ചെയ്ത് 28-ാം ദിവസമാണ് ചിത്രം OTT-യിലെത്തുന്നത്. മമിത ബൈജുവിന്റെ തമിഴിലെ ആദ്യ 100 കോടി ചിത്രമാണിത്. മമിതയുടെ പ്രകടനത്തിനും ചിത്രത്തിൽ മികച്ച സ്വീകാര്യത ലഭിച്ചിരുന്നു.

സിദ്ദു ജൊന്നലഗദ്ദ, ശ്രീനിധി ഷെട്ടി, റാഷി ഖന്ന എന്നിവർ കേന്ദ്രകഥാപാത്രങ്ങളായ ‘തെലുസു കാത’ എന്ന ചിത്രവും നവംബർ 14 മുതൽ നെറ്റ്ഫ്ലിക്സിൽ സ്ട്രീമിംഗ് ആരംഭിക്കുന്നുണ്ട്. നീരജ കോണ സംവിധാനം ചെയ്ത ഈ ചിത്രം ബോക്സ് ഓഫീസിൽ വലിയ വിജയം നേടിയിരുന്നില്ലെങ്കിലും, OTT റിലീസിലൂടെ കൂടുതൽ പ്രേക്ഷകരിലേക്ക് എത്തുമെന്നാണ് പ്രതീക്ഷ.

അക്ഷയ് കുമാറും അർഷാദ് വാർസിയും പ്രധാന വേഷത്തിലെത്തിയ വിജയിച്ച കോർട്ട് റൂം ഡ്രാമ ചിത്രം ‘ജോളി എൽഎൽബി ത്രീ’ ഈ ആഴ്ച OTT-യിലെത്തും. സുഭാഷ് കപൂർ ഒരുക്കിയ ഈ ചിത്രം ജിയോഹോട്ട്സ്റ്റാറിലൂടെ സ്ട്രീമിംഗ് ആരംഭിക്കുമെന്നാണ് വിവരം. ബോക്സ് ഓഫീസിൽ മികച്ച വിജയം നേടിയ ചിത്രം കൂടിയാണിത്.

കിരൺ അബ്ബാവാരം നായകനായെത്തിയ ‘കെ റാമ്പ്’ OTT-യിലെത്തുന്ന മറ്റൊരു ചിത്രമാണ്. റിലീസിന്റെ ആദ്യ ദിനങ്ങളിൽ ക്രിഞ്ച് കോമഡിയുടെ പേരിലും മറ്റും നെഗറ്റീവ് അഭിപ്രായങ്ങൾ നേരിട്ടെങ്കിലും, പിന്നീട് പതിയെ പ്രേക്ഷകരിൽ നിന്ന് മികച്ച പ്രതികരണങ്ങൾ നേടുകയും ബോക്സ് ഓഫീസിൽ കുതിപ്പ് തുടരുകയും ചെയ്തു. ഈ ചിത്രം നവംബർ 15 മുതൽ ആഹാ വീഡിയോയിൽ ലഭ്യമാകും.

മാരി സെൽവരാജ് സംവിധാനം ചെയ്ത ‘ബൈസൺ’ എന്ന ചിത്രവും ഈ വാരം OTT റിലീസ് ചെയ്യുമെന്നാണ് പ്രതീക്ഷിക്കുന്നത്. നെറ്റ്ഫ്ലിക്സ് ആണ് ചിത്രത്തിന്റെ സ്ട്രീമിംഗ് അവകാശം നേടിയിരിക്കുന്നത്. ധ്രുവ് വിക്രമിന്റെ ഗംഭീര പ്രകടനമാണ് ചിത്രത്തിന്റെ പ്രധാന ആകർഷണം. സിനിമയുടെ കഥയ്ക്കും പശുപതിയുടെ പ്രകടനത്തിനും മികച്ച കയ്യടി ലഭിച്ചിരുന്നു. പാ രഞ്ജിത്തിന്റെ നീലം സ്റ്റുഡിയോസിനൊപ്പം അപ്ലോസ് എന്റർടൈൻമെൻറ്സും ചേർന്നാണ് ചിത്രം നിർമ്മിച്ചത്. ധ്രുവിനൊപ്പം അനുപമ പരമേശ്വരൻ, ലാൽ, കലൈയരസൻ, രജിഷ വിജയൻ തുടങ്ങിയ താരങ്ങളും അണിനിരക്കുന്നുണ്ട്.