അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.വയനാട്: നടവയൽ പൂതാടി പഞ്ചായത്തിലെ നെയ്ക്കുപ്പ പ്രദേശത്ത് കാട്ടാനയുടെ ആക്രമണം തുടർന്നുകൊണ്ടിരിക്കുന്നു. കഴിഞ്ഞ രാത്രിയും പാതിരി സൗത്ത് സെക്ഷൻ വനത്തിലെ ചെഞ്ചടി വനഭാഗത്തുനിന്ന് ഇറങ്ങിയ കാട്ടാന ജനവാസ മേഖലയിലേക്ക് കടന്നു വന്ന് കർഷകരുടെ നിരവധി കൃഷികളെ നശിപ്പിച്ചു. കായ്ഫലം നിറഞ്ഞ വലിയ തെങ്ങുകളടക്കമുള്ള കൃഷികൾ തകർത്തതോടെ നാട്ടുകാർ വലിയ സാമ്പത്തിക നഷ്ടം നേരിടുകയാണ്.
കോടികളുടെ ചെലവിൽ ആരംഭിച്ച ക്രാഷ് ഗാർഡ് വേലി പണികൾ അവസാനഘട്ടത്തിൽ നിലച്ചതിനാൽ, നാട്ടുകാരും വനം വകുപ്പും ചേർന്ന് താൽക്കാലികമായി സ്ഥാപിച്ച തൂക്കുവേലി മാത്രമാണ് ഇപ്പോൾ അവിടെ ഉള്ളത്. ഈ തൂക്കുവേലിയുടെ മുകളിൽ മരം തള്ളി മറിച്ച് കാട്ടാന ജനവാസ മേഖലയിലേക്ക് കടന്നെന്നാണ് കർഷകർ പറയുന്നത്.
നെയ്ക്കുപ്പ എ കെ ജി എന്ന സ്ഥലവുമായി ചേർന്ന് നിൽക്കുന്ന ചെഞ്ചടി ബിനോയിയുടെ വീടിനു സമീപം നിന്ന വലിയ തെങ്ങ് കാട്ടാന കുത്തിമറിച്ചതോടെ സമീപത്തുണ്ടായിരുന്ന കാപ്പി വൃക്ഷങ്ങളും തെങ്ങിന്റെ വീഴ്ചയിൽ നശിച്ചു. പ്രദേശത്തെ ഒരു ചെറിയ കടയുടെ സമീപവും കാട്ടാന എത്തി, സ്റ്റോറിനു ചേർന്നുനിന്ന വാഴകൾ പലതും നശിപ്പിച്ചു.
കഴിഞ്ഞ നാല് ആഴ്ചയായി ഇടയ്ക്കിടെ ഇറങ്ങുന്ന ഈ ഒറ്റയാനാണ് പ്രദേശത്ത് കർഷകർക്കു കനത്ത ആശങ്കയുണ്ടാക്കുന്നത്. തുടർച്ചയായ ഈ ആക്രമണങ്ങൾ കൃഷിനാശം ദിനംപ്രതി വർധിപ്പിക്കുകയാണെന്ന് നാട്ടുകാർ പറയുന്നു. കാട്ടാനയെ നിയന്ത്രിക്കുന്നതിനും വേലി പണികൾ പുനരാരംഭിക്കുന്നതിനും അടിയന്തര നടപടി സ്വീകരിക്കണമെന്ന് നാട്ടുകാർ അധികൃതരോട് ആവശ്യപ്പെടുന്നു.
