അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.KSRTC എന്നു കേട്ടാല് “തിളയ്ക്കണം രോഷം” മനസ്സുകളില്. KSFE എന്നു കേട്ടാലോ “തിളങ്ങണം കണ്ണുകള്” പളപളാന്ന്. KSEB എന്നു കേട്ടാലോ “അടിക്കണം ഷോക്ക്” ഞരമ്പുകളില്. ഇതാണ് ഇപ്പോഴത്തെ അവസ്ഥ. ഇതില് KSTCയുടെ കാര്യമാണ് വലിയ കഷ്ടം. അവിടുത്തെ ജീവനക്കാരുടെ കാര്യമാണെങ്കില് പറഞ്ഞിട്ടും കരഞ്ഞിട്ടും രക്ഷിയില്ലാത്ത സ്ഥിതിയിലും. ഈ മൂന്നു സ്ഥാപനങ്ങളും കേരളത്തിലെ വലിയ പൊതുമേഖലാ സ്ഥാപനങ്ങളാണ്. എന്നാല്, മൂന്നിടത്തെയും ജീവനക്കാരോട് സര്ക്കാരിന്റെ നിലപാടുകള് മൂന്നുരീതിയില്. ഈ മൂന്നു പൊതുമേഖലായ സ്ഥാപനങ്ങളില് സേവന മേഖലയില് വരേണ്ടത് ഏത് സ്ഥാപനമാണ് എന്ന് നിസ്സംശയം പറയാന് കഴിയുന്നതാണ് KSRTC.
കെ.എസ്.ഇ.ബി വൈദ്യുതിയുടെ കുത്തകയും കെ.എസ്.എഫ്.ഇ സര്ക്കാരിന്റെ സാമ്പത്തിക ക്രയവിക്രയം വഴി ലാഭം മാത്രം ലക്ഷ്യമിട്ട് ബിസിനസ് ചെയ്യുമ്പോള്, കെ.എസ്.ആര്.ടി.സി അതിന്റെ നിലനില്പ്പ് തന്നെ ചോദ്യം ചെയ്യപ്പെടുന്ന ഒരു സേവന മേഖലയായി നില്ക്കുന്നു. KSRTCയെ മറ്റ് പൊതുമേഖലാ സ്ഥാപനങ്ങളില് നിന്ന് വേര്തിരിക്കുന്നതു പോലും അതിന്റെ നിസ്വാര്ത്ഥമായ സേവന മനോഭാവം ഒന്നുകൊണ്ടു മാത്രമാണ്. വ്യത്യസ്ത തലങ്ങളിലുള്ളവര്ക്ക് അവരുടെ അര്ഹതയ്ക്കനുസരിച്ച് സൗജന്യം അനുവദിക്കുന്ന ഏക സ്ഥാപനം കൂടിയാണിത്. സംസ്ഥാനത്തെ പ്ലസ്ടു വരെയുള്ള വിദ്യാര്ത്ഥികള്ക്ക് കേവലം 10 രൂപയ്ക്ക് മൂന്ന് മാസത്തേക്ക് യാത്രാ സൗകര്യം നല്കുന്നുണ്ട് ഈ സ്ഥാപനം. കോടിക്കണക്കിന് രൂപ പ്രതിവര്ഷം നഷ്ടം സഹിച്ചാണ് ഈ സൗജന്യം നടത്തുന്നത്.
വിദ്യാര്ത്ഥികളെ സൗജന്യമായി കൊണ്ടുപോയി പഠിപ്പിക്കാനുള്ള ധാര്മിക ഉത്തരവാദിത്തം KSRTCക്കില്ല. അത് സര്ക്കാരിന്റെ ഉത്തരവാദിത്വമാണ്. അതുകൊണ്ട് പ്രഖ്യാപനം നടത്തും. എന്നാല് ഈ സൗജന്യങ്ങളുടെ ഭാരം മുഴുവന് പേറുന്നത് KSRTCയും. അതിന്റെ ഭവിഷ്യത്ത് അനുഭവിക്കുന്നത് ജീവനക്കാരും. ഈ അടുത്ത കാലം വരെ രണ്ടുവര്ഷത്തിലൊരിക്കല് പുതുക്കേണ്ടിയിരുന്ന സൗജന്യ പാസുകള്, നിലവിലെ സര്ക്കാര് എടുത്തുമാറ്റി മരണം വരെ ഉപയോഗിക്കാവുന്ന പാസുകളാക്കി മാറ്റിയത് സ്ഥിതി കൂടുതല് വഷളാക്കിയിട്ടുണ്ട്. അംഗപരിമിതര്, അന്ധര്, വിദ്യാര്ത്ഥികള് എന്നിവര്ക്ക് നല്കുന്ന ഈ പാസുകള് പലപ്പോഴും ദുരുപയോഗം ചെയ്യപ്പെടുന്നുണ്ട്. സര്ക്കാര് ജോലിയില് ഇരിക്കുന്നവര് പോലും ഈ സൗജന്യ പാസുകള് ഉപയോഗിക്കുന്നുണ്ടെന്നത് സത്യമാണ്.
മുമ്പ് ഇന്സ്പെക്ടറെ അയച്ച് യോഗ്യത ഉറപ്പാക്കിയ ശേഷമായിരുന്നു പാസ് നല്കിയിരുന്നത്. എന്നാല് ഇപ്പോള് വില്ലേജ് ഓഫീസറുടെ സര്ട്ടിഫിക്കറ്റിന്റെ മാത്രം അടിസ്ഥാനത്തില് യാതൊരു പരിശോധനയുമില്ലാതെ പാസുകള് നല്കുന്നു. ഈ സൗജന്യങ്ങള് പ്രഖ്യാപിക്കുന്ന സര്ക്കാര് തന്നെയാണ്, KSRTCയിലെ ജീവനക്കാര്ക്ക് പെന്ഷന് നല്കാതെ പുറംതിരിഞ്ഞു നില്ക്കുന്നതും. KSRTCയുടെ സേവന നിലപാടുകള്ക്ക് നേര് വിപരീതമാണ് KSEBയുടെയും KSFEയുടെയും സമീപനം. തെരുവ് വിളക്കുകള്ക്കു പോലും അതതു പഞ്ചായത്തുകള് പണമടച്ചില്ലെങ്കില് KSEB വൈദ്യുതി വിച്ഛേദിക്കും. അഞ്ചു പൈസയുടെ സൗജന്യം KSEBയില് നിന്നും ജനങ്ങള്ക്ക് കിട്ടുന്നുണ്ടോ ?. (വിദ്യാര്ഥിതകള്ക്കു പഠിക്കാന് ?, മുതിര്ന്ന പൗരന്മാര്ക്ക് ജീവിക്കാന്, വികലാംഗര്ക്കോ, കിട രോഗികള്ക്കോ, മറ്റ് അര്ഹതപ്പെട്ടവര്ക്ക് ആര്ക്കെങ്കിലും സൗജന്യ വൈദ്യുതി നല്കുന്നുണ്ടോ).
ഒരു ദിവസം പണമടയ്ക്കാന് വൈകിയാല് പോലും ഫ്യൂസ് ഊരാന് ഒരു മടിയുമില്ല. പഠിക്കുന്ന കുട്ടികളുള്ള വീടുകള്ക്ക് പോലും വൈദ്യുതിയില് പകുതി വിലയിളവ് നല്കാത്ത KSEBക്ക് ലാഭം മാത്രമാണ് ലക്ഷ്യമെന്ന് പറയാതെ വയ്യ. എന്തിന്, ഒരു സേവന മേഖലയെന്നോണം ജനങ്ങള്ക്ക് സകല സൗജന്യങ്ങളും നല്കി നിരന്തരം പ്രവര്ത്തിക്കുന്ന KSRTCക്ക് പോലും നല്കുന്ന വൈദ്യുതിയില് ഈടാക്കുന്നത് വ്യാവസായിക അടിസ്ഥാനത്തിലുള്ള ഉയര്ന്ന നിരക്കാണ്. KSFEയുടെ പ്രവര്ത്തനങ്ങളും മറിച്ചല്ല. KSFEയില് ഒരു ലോണോ ചിട്ടിയോ മുടങ്ങിയാല് പലിശയും കൂട്ടുപലിശയും ചേര്ന്ന് മുതലിന്റെ ഇരട്ടി നല്കിയാലും തീരാത്ത ബാധ്യതയാകും. ലാഭേച്ഛയില്ലാത്ത സേവനത്തിന് പകരം ഈ പൊതുമേഖലാ സ്ഥാപനങ്ങള് പിന്തുടരുന്നത് കടുപ്പമേറിയ ബിസിനസ് തന്ത്രങ്ങളാണെന്നതില് ഇതിലും നല്ല ഉദാഹരണം വേറെ വേണോ.
KSEBയിലും KSFEയിലും ജോലി ചെയ്യുന്നവരുടെയും, പെന്ഷന് പറ്റിയവരുടെയും കാര്യം എടുത്തു നോക്കൂ. ജോലിയില് ഉള്ളവരുടെ ഭീമമായ ശമ്പളം അറിയേണ്ടതു തന്നെയാണ്. പെന്ഷന് പറ്റിയവരുടെ പെന്ഷന് ആനുകൂല്യങ്ങളും നോക്കൂ. ആനുകൂല്യങ്ങള്ക്ക് മുടക്കം സംഭവിച്ചിട്ടുണ്ടോ എന്നും പരിശോധിക്കണം. എന്നാല്, KSRTC ജീവനക്കാരുടെ കഴിഞ്ഞ കുറച്ചു കാലങ്ങളായുള്ള ജീവിതം പരിശോധനയക്കു വിധേയമാക്കണം. ഈ പൊതുമേഖലാ സ്ഥാപനത്തിലെ ജീവനക്കാരുടെ ഗതികേടുകള് മനസ്സിലാക്കണം. പറയുമ്പോള് എല്ലാം പൊതുമേഖലാ സ്ഥാപനങ്ങള്, എന്നാല്, സര്ക്കാരിന്റെ കണ്ണില് KSRTC എന്നും രണ്ടാമതോ മൂന്നാമതോ ആണ്. ചിറ്റമ്മ നയം കാട്ടുമ്പോഴും KSRTC ജീവനക്കാര് എല്ലുമുെറിയെ പണിയെടുക്കുന്നുണ്ട് എന്നത് മറക്കരുത്.
എന്നിട്ടും അവര്ക്ക് കിട്ടുന്നതോ, വാങ്ങുന്ന ശമ്പളം പോലും ഔദാര്യമെന്ന നിലയില്. ശമ്പളത്തിന് ഫണ്ട് അനുവദിക്കുമ്പോള് വാര്ത്താ സമ്മേളം വിളിച്ച് അറിയിക്കും. പെന്ഷന് വിതരണം കൊട്ടി ഘോഷിക്കും. എന്നാലോ, KSEBയിലും KSFEയിലും ഇത്തരം ചടങ്ങുകള് നടത്തില്ല. ഗ്രാമപഞ്ചായത്ത് തലം മുതല് ജില്ലാ പഞ്ചായത്ത് തലം വരെയുള്ള ജീവനക്കാര്ക്ക് ശമ്പളം ഇരട്ടിയാക്കി സര്ക്കാര് ഖജനാവില് നിന്ന് നല്കുകയും, തൊഴിലില്ലാത്തവര്ക്ക് പെന്ഷന് അനുവദിക്കുകയും ചെയ്യുമ്പോള്, വര്ഷങ്ങളോളം നാടിന് വേണ്ടി ഓടിയ കെ.എസ്.ആര്.ടി.സിയിലെ ജീവനക്കാരുടെ കാര്യത്തില് സര്ക്കാര് നടത്തുന്നത് ഇരട്ടത്താപ്പാണ്. KSRTC സമൂഹത്തിന് വേണ്ടി ചെയ്യുന്ന സേവനങ്ങളെയെല്ലാം സൗകര്യപൂര്വ്വം മറന്നുകളയുകയാണ് ജനങ്ങളും സര്ക്കാരും എന്ന പരിഭവം ജീവനക്കാര്ക്കുണ്ട്. എന്നാല്, കിട്ടുന്ന അവസരങ്ങളിലെല്ലാം നിസ്സാര കാര്യങ്ങള്പറഞ്ഞ് തൊഴിലാളികളെ കരിവാരി തേക്കാനുള്ള ശ്രമങ്ങള് തുടരുകയും ചെയ്യുന്നുണ്ടെന്നും തൊഴിലാളികള് പറയുന്നു.
CONTENT HIGH LIGHTS; Will KSRTC be ‘trampled on and wiped clean’?: Will KSFE and KSEB be ‘patted on the shoulder and walked away’?; Want to know this policy towards KSRTC?
