അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.കണ്ടോട്ടി: അമിതമായ ജോലി സമ്മർദം താങ്ങാനാവുന്നില്ലെന്ന് ചൂണ്ടിക്കാട്ടി കൊണ്ടോട്ടി താലൂക്കിലെ ബിഎൽഒമാർ തഹസിൽദാർക്ക് സങ്കടഹർജി സമർപ്പിച്ചു. വോട്ടർ പട്ടിക പുതുക്കുന്നതിനിടയിൽ അനാവശ്യമായ അധിക ചുമതലകളും അസമയം നൽകിയ നിർദ്ദേശങ്ങളും ജോലിയിൽ വലിയ സമ്മർദ്ദമുണ്ടാക്കുന്നുവെന്നായിരുന്നു ബിഎൽഒമാരുടെ പ്രധാന പരാതികൾ.
“ആരുടെയെങ്കിലും വോട്ട് നഷ്ടപ്പെട്ടാൽ ജനങ്ങൾ നേരിട്ട് ഞങ്ങളെ കുറ്റം പറയും. അത് ഒരുതരം ഭീതിയും മാനസിക സമ്മർദവുമാണ്,” എന്ന് ഹർജിയിൽ ബിഎൽഒമാർ വ്യക്തമാക്കുന്നു.
ഫോം വിതരണം മുതൽ തിരികെ ശേഖരണം വരെ നൽകിയിരുന്ന മുന് ചുമതലയിൽ ഇപ്പോൾ ഡാറ്റ എൻട്രി ജോലിയും ചേർത്തതോടെ അവസ്ഥ താങ്ങാനാവാത്ത വിധം വഷളായതായും അവർ ചൂണ്ടിക്കാട്ടി. അസംഘടിതമായ രീതിയിലുള്ള നിർദ്ദേശങ്ങളും സർവർ തകരാറുകളും കാരണം നിശ്ചിത സമയപരിധിക്കുള്ളിൽ ജോലി പൂർത്തിയാക്കുക അസാധ്യമാണെന്നും അവർ വ്യക്തമാക്കി.
നവംബർ 4 മുതൽ ഡിസംബർ 4 വരെ ഫോം വിതരണം ചെയ്ത് ശേഖരിക്കുന്നതെന്ന ഒറ്റ ചുമതലയാണ് ആദ്യം നൽകിയിരുന്നത്. എന്നാൽ ഇപ്പോൾ നിർദ്ദേശങ്ങൾ മാറ്റി ഡാറ്റ എൻട്രിയും ആവശ്യപ്പെട്ടതോടെ പല വോട്ടർമാരുടെയും വിവരങ്ങൾ ഉൾപ്പെടാതെ പോകാൻ സാധ്യതയുണ്ടെന്നും അതോടെ ജനങ്ങളുടെ രോഷം നേരിടേണ്ടി വരുമെന്നും പരാതിയിൽ പറയുന്നു.
അതിനാൽ, ആവശ്യമായ സമയം നീട്ടി നൽകണമെന്നും മാന്യമായി പരിഗണിക്കണമെന്നും തഹസിൽദാരോട് ബിഎൽഒമാർ ആവശ്യപ്പെട്ടു.
