അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.കോഴിക്കോട്: തദ്ദേശ തെരഞ്ഞെടുപ്പ് പ്രചരണവുമായി ബന്ധപ്പെട്ട് പെരുമാറ്റച്ചട്ടം കർശനമായി പാലിക്കുന്നതിനായി ഹരിത പദ്ധതിയുടെ ഭാഗമായി ജില്ലാ സ്പെഷ്യൽ സ്ക്വാഡ് പ്രിന്റിംഗ് പ്രസുകളിൽ അപ്രതീക്ഷിത പരിശോധന നടത്തി. പരിശോധനയിൽ 220 മീറ്റർ നിരോധിത മെറ്റീരിയലുകൾ കണ്ടെത്തി പിടിച്ചെടുത്തു.
ഇന്റേണൽ വിജിലൻസ് ഓഫീസർ ടി. ഷാഹുൽ ഹമീദിന്റെ നേതൃത്വത്തിലായിരുന്നു റെയ്ഡ്. പിടിച്ചെടുത്ത വസ്തുക്കൾ കോഴിക്കോട് കോർപറേഷൻക്ക് കൈമാറി, സ്ഥാപന ഉടമകൾക്ക് നോട്ടീസുകളും ഓരോരുത്തർക്കും 10,000 രൂപ വീതം പിഴ ചുമത്താനും നിർദ്ദേശം നൽകി.
കോഴിക്കോട് നഗരത്തിൽ ആകെ ലൈസെൻസ് ഉള്ള 88 പ്രിന്റിംഗ് പ്രസുകളുള്ളപ്പോൾ, ഈ ഘട്ടത്തിൽ ഏഴ് സ്ഥാപനങ്ങളിലാണ് പരിശോധന നടത്തിയത്. ശുചിത്വ മിഷൻ പ്രോഗ്രാം ഓഫിസർ ഒ. ജ്യോതിഷ്, കോർപറേഷൻ ഹെൽത്ത് ഇൻസ്പെക്ടർമാരായ ബിജു ജയറാം, ഇ.പി. ഷൈലേഷ് തുടങ്ങിയവരും സംഘത്തോടൊപ്പമുണ്ടായിരുന്നു.
സംസ്ഥാന ഇലക്ഷൻ കമ്മീഷൻ നിരോധിച്ച വസ്തുക്കൾ ഇനി മുതൽ പ്രിന്റിംഗിന് ഉപയോഗിക്കരുതെന്ന് അധികൃതർ മുന്നറിയിപ്പ് നൽകി. പ്രിന്റിംഗിന് ഉപയോഗിക്കുന്ന എല്ലാ അസംസ്കൃത വസ്തുക്കൾക്കും QR കോഡ് നിർബന്ധമാക്കി. ഈ കോഡ് സ്കാൻ ചെയ്താൽ അംഗീകൃത സർട്ടിഫിക്കറ്റ് ലഭിക്കുന്ന ഉൽപ്പന്നങ്ങൾ മാത്രമേ ഉപയോഗിക്കാവൂ എന്നും നിർദേശിച്ചു.
ഈ നിർദ്ദേശങ്ങൾ ലംഘിക്കുന്ന സ്ഥാപനങ്ങൾക്കെതിരെ കർശന നടപടികൾ സ്വീകരിക്കുമെന്ന് സ്ക്വാഡ് അറിയിച്ചു. വരും ദിവസങ്ങളിലും തുടർച്ചയായ പരിശോധനകൾ നടക്കും.
