അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.പയ്യോളി: ദേശീയപാത വികസനത്തിന്റെ ഭാഗമായി അയനിക്കാട് ഹൈദ്രോസ് ജുമാഅത്ത് പള്ളിക്കും സമീപത്തുള്ള അയ്യപ്പ ഭജനമഠത്തിനും അരികിലൂടെ അടിപ്പാത നിർമിക്കണമെന്ന ആവശ്യം ശക്തമായി ഉയർന്നിരിക്കുന്നു. ഇതിനായുള്ള ജനകീയ കൺവെൻഷനിൽ നാട്ടുകാർ പ്രതിഷേധഭാവത്തിൽ ഒന്നിച്ചു.
ദേശീയപാത വികസന പ്രവൃത്തി ആരംഭിച്ച് അഞ്ച് വർഷം കഴിഞ്ഞിട്ടും പ്രദേശവാസികളുടെ ഈ പ്രധാന ആവശ്യം പരിഗണിച്ചിട്ടില്ല. റോഡിന്റെ കിഴക്കും പടിഞ്ഞാറുമായി നിലനിൽക്കുന്ന ഇരുപതോളം മഹല്ലുകളിൽ നിന്നുള്ള വിശ്വാസികൾക്ക് ശവസംസ്കാരത്തിനും പ്രാർത്ഥനകൾക്കുമായി ആശ്രയിക്കുന്നത് ഹൈദ്രോസ് ജുമാഅത്ത് പള്ളിയെയാണ്. എന്നാൽ നിലവിൽ റോഡിന്റെ കിഴക്ക് താമസിക്കുന്നവർക്ക് പള്ളിയിലെത്തുക അത്യന്തം കഷ്ടമായി തുടരുകയാണ്.
പ്രാർത്ഥനയ്ക്കോ ശവസംസ്കാരത്തിനോ പോകാൻ ഒരു കിലോമീറ്റർ അകലെ പയ്യോളി ടൗണിലേക്കു പോയി യു-ടേൺ എടുക്കുകയോ, അതല്ലെങ്കിൽ രണ്ട് കിലോമീറ്റർ മാറി അയനിക്കാട് പോസ്റ്റ് ഓഫീസിനു സമീപമുള്ള അടിപ്പാത വഴിയാണ് ഇപ്പോൾ പോകേണ്ടത്. ഇതോടെ അടിയന്തരാവസ്ഥകളിലും രോഗികളെയും മുതിർന്നവരെയും കൊണ്ട് പോകാൻ വലിയ ബുദ്ധിമുട്ടാണ് നേരിടുന്നത്.
പള്ളിയുടെ സമീപത്തെ ബസ് സ്റ്റോപ്പുകളിൽ ഇറങ്ങുന്ന യാത്രക്കാരും മറുവശത്തേക്ക് കടക്കാൻ പരിതപ്പിക്കേണ്ട അവസ്ഥയിലാണ്. പടിഞ്ഞാറ് സ്ഥിതി ചെയ്യുന്ന അയ്യപ്പ ഭജനമഠത്തിലും കിഴക്ക് പ്രവർത്തിക്കുന്ന ഗവ. ഹോമിയോ ഡിസ്പെൻസറി, കൃഷിഭവൻ, ഗവ. വെൽഫെയർ എൽപി സ്കൂൾ, എ.എൽ.പി സ്കൂൾ എന്നിവിടങ്ങളിലേക്കും എത്താൻ അധിക ദൂരം യാത്ര ചെയ്യേണ്ടി വരുന്നു.
ഈ ദുരിതത്തിന് അവസാനം കുറിക്കണമെന്ന ആവശ്യവുമായി നടന്ന ജനകീയ കൺവെൻഷൻ അടിപ്പാത അടിയന്തരമായി നിർമ്മിക്കണമെന്ന് ആവശ്യപ്പെട്ടു. ടെമ്പിൾ–മസ്ജിദ് അടിപ്പാത ആക്ഷൻ കമ്മിറ്റി സംഘടിപ്പിച്ച കൺവെൻഷൻ മുൻ എം.എൽ.എ കെ. ദാസൻ ഉദ്ഘാടനം ചെയ്തു. ജനങ്ങളുടെ അടിസ്ഥാന അവകാശങ്ങൾ സംരക്ഷിക്കാൻ സമരം അനിവാര്യമെങ്കിൽ അതിന് മുന്നൊരുക്കം വേണമെന്നും അദ്ദേഹം പറഞ്ഞു.
ഹക്കീം അധ്യക്ഷത വഹിച്ച യോഗത്തിൽ മനോജ് തരിപ്പയിൽ വിഷയാവതരണം നടത്തി. അഡ്വ. പി. കുൽസു, കെ.ടി. വിനോദ്, എൻ.സി. മുസ്തഫ, ബഷീർ മേലടി, സി.പി. രവീന്ദ്രൻ, ശശി തരിപ്പയിൽ, ഖാലിദ്, ഷൗക്കത്തലി തുടങ്ങിയവർ പ്രസംഗിച്ചു.
