അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.തനിക്കെതിരെ ഒരു തട്ടിപ്പുകാരന്റെ വ്യാജ ആരോപണത്തെ അടിസ്ഥാനമാക്കി വാർത്ത നൽകിയ റിപ്പോർട്ടർ ടി.വി. ചാനലിനും പരാതിക്കാരനുമെതിരെ നൂറ് കോടി രൂപയുടെ മാനനഷ്ടക്കേസ് ഫയൽ ചെയ്യുമെന്ന് അബീർ ഗ്രൂപ്പ് ചെയർമാനും 24 ന്യൂസ് ചാനൽ ചെയർമാനുമായ ആലുങ്ങൽ മുഹമ്മദ് പ്രഖ്യാപിച്ചു. വ്യാജ പ്രചാരണങ്ങളെ നിയമപരമായി നേരിടുമെന്നും അദ്ദേഹം സമൂഹമാധ്യമങ്ങളിലൂടെ വ്യക്തമാക്കി.
ആലുങ്ങൽ മുഹമ്മദിനെതിരെ മലപ്പുറം മമ്പാട് സ്വദേശി അബ്ദുൽ സലാം നൽകിയ പരാതിയുടെ അടിസ്ഥാനത്തിലാണ് റിപ്പോർട്ടർ ടി.വി. വാർത്ത പ്രസിദ്ധീകരിച്ചത്. അബ്ദുൽ സലാം എന്ന വ്യക്തിയിൽ നിന്ന് രണ്ടായിരം കോടി രൂപ വഞ്ചിച്ചെടുത്തുവെന്നായിരുന്നു ആലുങ്ങൽ മുഹമ്മദിനെതിരായ ആരോപണം. 2015-ൽ നടന്നുവെന്ന് പറയുന്ന സംഭവത്തിൽ 2025 ഫെബ്രുവരിയിലാണ് അബ്ദുൽ സലാം നെടുമ്പാശ്ശേരി പോലീസിൽ മൊഴി നൽകുകയും തുടർന്ന് എഫ്.ഐ.ആർ. രജിസ്റ്റർ ചെയ്യുകയും ചെയ്തത്.
ഈ വ്യാജ ആരോപണങ്ങളെ തുടർന്ന് ചാനലിനും പരാതിക്കാരനും എതിരെ ഹൈക്കോടതിയിൽ നൂറ് കോടി രൂപയുടെ മാനനഷ്ടക്കേസ് ഫയൽ ചെയ്യുമെന്ന് ആലുങ്ങൽ മുഹമ്മദ് അറിയിച്ചു. പ്രമുഖ അഭിഭാഷകൻ എസ്. രാജീവ് ആയിരിക്കും അദ്ദേഹത്തിനുവേണ്ടി കോടതിയിൽ ഹാജരാവുക. കേസ് കൊടുത്ത ദിവസം അറിഞ്ഞിരുന്നെങ്കിൽ താൻ നാട്ടിൽത്തന്നെ ഉണ്ടായിരുന്നോ എന്ന അറിയാമായിരുന്നെന്നും അദ്ദേഹം പ്രതികരിച്ചു. തൻ്റെ 62 വർഷത്തെ ജീവിതത്തിൽ ആരെയും വഞ്ചിക്കുകയോ മോശമായി പെരുമാറുകയോ ചെയ്തിട്ടില്ലെന്നും അദ്ദേഹം കൂട്ടിച്ചേർത്തു.
പരാതി രജിസ്റ്റർ ചെയ്തെങ്കിലും, 2025 ഫെബ്രുവരിക്ക് ശേഷം കേസിൽ തുടർനടപടികളൊന്നും ഉണ്ടായിട്ടില്ല. കേസുമായി ബന്ധപ്പെട്ട് യാതൊരു തെളിവുകളും പോലീസിന് ലഭിക്കാത്തതാണ് ഇതിന് കാരണം. മർദ്ദനം നടന്നുവെന്ന് പറയപ്പെടുന്ന കൊച്ചിയിലെ ഹോട്ടലിൽനിന്നും തെളിവുകൾ ശേഖരിക്കാൻ കഴിഞ്ഞിട്ടില്ലെന്നും വിവരമുണ്ട്. തെളിവില്ലാത്ത ഈ പഴയ പരാതിയുടെ അടിസ്ഥാനത്തിൽ റിപ്പോർട്ടർ ടി.വി. വാർത്ത നൽകിയത് കൂടുതൽ സംശയങ്ങൾക്ക് വഴിയൊരുക്കുന്നു.
റിപ്പോർട്ടർ ടി.വി.യുടെ ഈ വാർത്താപ്രചാരണം തങ്ങളുടെ ചാനലിനോടുള്ള പ്രതികാര നടപടിയാണെന്ന് 24 ന്യൂസ് മേധാവി ശ്രീകണ്ഠൻ നായർ ആരോപിച്ചു. BARC റേറ്റിംഗ് ക്രമക്കേടുമായി ബന്ധപ്പെട്ട് അടുത്തിടെ റിപ്പോർട്ടർ ടി.വി.ക്കെതിരെ 24 ന്യൂസ് വാർത്ത നൽകിയിരുന്നു. ഇതിൻ്റെ അടിസ്ഥാനത്തിൽ BARC ഉദ്യോഗസ്ഥനെ ഒന്നാം പ്രതിയായും റിപ്പോർട്ടർ ടി.വി. എം.ഡി. ആന്റോ അഗസ്റ്റിനെ രണ്ടാം പ്രതിയായും പോലീസ് കേസെടുത്തിരുന്നു. ഇതിനുള്ള പ്രതികാരമാണ് ആലുങ്ങൽ മുഹമ്മദിനെതിരായ വാർത്തയെന്നും, അദ്ദേഹത്തെയും 24 ന്യൂസിനെയും തകർക്കാമെന്ന് കരുതേണ്ടെന്നും ശ്രീകണ്ഠൻ നായർ മുന്നറിയിപ്പ് നൽകി.
