അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.ശരിക്കും ദൈവം ഉണ്ടോ? ആരാണ് ദൈവം? ഈ ചോദ്യങ്ങൾക്ക് ഒരൊറ്റ ഉത്തരമേയുള്ളൂ. ആപത്സമയങ്ങളിൽ സ്വന്തം കാര്യം നോക്കാതെ മറ്റൊരാളെ സഹായിക്കാൻ മനസ്സുകാണിക്കുന്നവരാണ് യഥാർത്ഥത്തിൽ ദൈവതുല്യർ. സ്വാർത്ഥതയ്ക്ക് പിന്നാലെ പായുന്ന ഈ ലോകത്ത്, പലപ്പോഴും എല്ലാവർക്കും സ്വന്തം സുരക്ഷ മാത്രമാണ് പ്രധാനം. എന്നാൽ, ഉത്തർപ്രദേശിലെ ഒരു പത്തുവയസ്സുകാരൻ ഇതിന് വിപരീതമായിരുന്നു. സ്വന്തം ജീവനോ വേദനയോ കണക്കിലെടുക്കാതെ, ആ ഇളംപ്രായത്തിൽ അവൻ രക്ഷിച്ചത് എട്ട് കുരുന്നുകളെയാണ്. ആ എട്ട് കുട്ടികളോട് നിങ്ങൾ ദൈവത്തെ കണ്ടിട്ടുണ്ടോ എന്ന് ചോദിച്ചാൽ, ഒരുപക്ഷേ അവർ ഈ ബാലൻ്റെ പേരാകും പറയുക.
വെറും പത്തുവയസ്സു മാത്രം പ്രായമുള്ള ആ കുട്ടിയെ സംബന്ധിച്ച്, എല്ലാ കുട്ടികളെയും പോലെ സ്വന്തം ജീവൻ രക്ഷിക്കാൻ ശ്രമിക്കാമായിരുന്നു. ഉത്തർപ്രദേശിലെ അസംഗഡ് സ്വദേശിയായ ഓം പ്രകാശിന് അതിനുള്ള അവസരമുണ്ടായിരുന്നു. സ്കൂളിലേക്ക് പോവുകയായിരുന്ന വാൻ തീപിടിച്ചപ്പോൾ വണ്ടിയിലുണ്ടായിരുന്ന ഡ്രൈവർ സ്വന്തം ജീവൻ മാത്രം രക്ഷിച്ചു ഓടിപ്പോയി.
എന്നാൽ, കൂട്ടുകാർ സഹായത്തിനായി നിലവിളിക്കുന്നത് കേട്ടപ്പോൾ, ദൈവം രക്ഷിക്കുമെന്നോ മറ്റാരെങ്കിലും ഓടിയെത്തുമെന്നോ കാത്തുനിൽക്കാതെ അവൻ തീരുമാനമെടുത്തു. സ്വന്തം ജീവൻ പണയപ്പെടുത്തിക്കൊണ്ട് ആ കുഞ്ഞ് എട്ട് തവണ തീയിലേക്ക് സഞ്ചരിച്ചു. വെറും പത്തു വയസ്സിൽ അവൻ ഒരു സൂപ്പർ ഹീറോ ആയി മാറി. അവനിൽ ആ കുട്ടികൾ ദൈവത്തെ കണ്ടു എന്നുള്ളതാണ് സത്യം.
സംഭവം നടന്നത് 2010 സെപ്റ്റംബർ 4-നാണ്. ഉത്തർപ്രദേശിലെ അസംഗഡ് സ്വദേശിയായ ഓം പ്രകാശ് എന്ന പത്തുവയസ്സുകാരൻ മറ്റ് എട്ട് കുട്ടികളോടൊപ്പം മാരുതി വാനിൽ സ്കൂളിലേക്ക് പോവുകയായിരുന്നു. യാത്രയ്ക്കിടെ വാനിലെ ഗ്യാസ് കിറ്റിലുണ്ടായ ഷോർട്ട് സർക്യൂട്ട് കാരണം വാഹനം ആളിക്കത്തി. നിമിഷങ്ങൾക്കകം തീ ആളിപ്പടർന്നു. കുട്ടികൾ അപകടത്തിലായെന്ന് കണ്ടയുടൻ ഡ്രൈവർ സ്വന്തം വാതിൽ തുറന്ന് ഓടിരക്ഷപ്പെട്ടു. എന്നാൽ, പുകയുന്ന വാഹനത്തിനുള്ളിൽ കുടുങ്ങിയ കൂട്ടുകാരുടെ കരച്ചിൽ കേട്ട് ഓം പ്രകാശ് ഒട്ടും മടിക്കാതെ വാനിൻ്റെ വാതിൽ തകർത്ത് അവരെ ഓരോരുത്തരെയായി പുറത്തേക്ക് വലിച്ചെടുത്തു.
ഈ രക്ഷാപ്രവർത്തനത്തിനിടെ ഓം പ്രകാശിൻ്റെ ദേഹമാസകലം തീ പടർന്നു. മുഖത്തും ചെവികളിലും പുറത്തും കൈകളിലുമായി ഗുരുതരമായ പൊള്ളലേറ്റു. ഈ പരിക്കുകൾ ആ കുഞ്ഞിന് സ്ഥിരമായ പാടുകളുണ്ടാക്കുകയും, വലതുകൈ നെഞ്ചിലും അരക്കെട്ടിലുമായി ഒട്ടിപ്പിടിക്കുന്ന അവസ്ഥയിലേക്ക് എത്തുകയും ചെയ്തു. കൂട്ടുകാരെ രക്ഷിക്കാൻ സ്വന്തം ശരീരം അഗ്നിക്കിരയാക്കിയ ഓം പ്രകാശിന് ദീർഘകാല ആശുപത്രിവാസവും നിരവധി തിരുത്തൽ ശസ്ത്രക്രിയകളും വേണ്ടിവന്നു.
സ്വന്തം ജീവൻ പണയം വെച്ച് കൂട്ടുകാരെ രക്ഷിച്ച ഓം പ്രകാശിൻ്റെ അസാധാരണമായ മനസ്സാന്നിധ്യത്തിനും ത്യാഗത്തിനും ഇന്ത്യൻ കൗൺസിൽ ഫോർ ചൈൽഡ് വെൽഫെയർ (ICCW) ഏർപ്പെടുത്തിയ സഞ്ജയ് ചോപ്ര അവാർഡ് ലഭിച്ചു. ദേശീയ ധീരതാ പുരസ്കാരങ്ങളുടെ ഭാഗമായുള്ള ഈ ബഹുമതി, 2012 ജനുവരിയിൽ റിപ്പബ്ലിക് ദിനത്തിൻ്റെ തലേന്ന് അന്നത്തെ പ്രധാനമന്ത്രിയായിരുന്ന ഡോ. മൻമോഹൻ സിംഗ് ന്യൂഡൽഹിയിൽ വെച്ച് ഈ കർഷകൻ്റെ മകന് സമ്മാനിച്ചു. പ്രതിസന്ധി ഘട്ടങ്ങളിൽ സ്വന്തം സുരക്ഷയെക്കാൾ വലുതായി മറ്റുള്ളവരുടെ ജീവന് പ്രാധാന്യം നൽകാൻ കഴിയുമെന്നതിൻ്റെ ഉദാത്തമായ ഉദാഹരണമായി ഓം പ്രകാശിൻ്റെ കഥ ഇന്നും രാജ്യത്തിന് പ്രചോദനമാകുന്നു.
