ഓന്തുകൾക്ക് എങ്ങനെയാണ് നിറം മാറാനുള്ള കഴിവുണ്ടായത്?

ഓന്ത് എന്ന് കേൾക്കുമ്പോൾ നമ്മുടെ മനസിലേക്ക് ആദ്യം ഓടിയെത്തുക നിറം മാറാനുള്ള ഈ ജീവിയുടെ കഴിവിനെക്കുറിച്ചാണ് അല്ലേ? ഇടയ്ക്കിടെ നിലപാട് മാറ്റിപ്പറയുന്ന ആളുകളെ നമ്മൾ ഓന്തിനെപ്പോലെ നിറം മാറുന്നവർ എന്ന് വിശേഷിപ്പിക്കാറുണ്ട് താനും. ഓന്തുകൾക്കുള്ള ഈ സവിശേഷമായ കഴിവിന്റെ പിന്നിലുള്ള കാരണമെന്താണെന്ന് നിങ്ങൾ ചിന്തിച്ചിട്ടുണ്ടോ? ചില ശരീരകോശങ്ങളാണ് ഇത്തരത്തിൽ നിറം മാറാനുള്ള കാരണം. ഓന്തിന്റെ ചർമത്തിലെ ക്രോമാറ്റോഫോറുകൾ, ഇറിഡോഫോറുകൾ എന്നിങ്ങനെയുള്ള പ്രത്യേക കോശങ്ങളുടെ പ്രവർത്തനത്തിലൂടെയാണ് അവ നിറം മാറുന്നത്. വർണകങ്ങൾ അടങ്ങിയ ക്രോറ്റോഫോറുകൾക്ക് വികസിക്കാനും സങ്കോചിക്കാനും കഴിയും. അതേസമയം, ചർമത്തിന് താഴെയുള്ള ഇറിഡോഫോറുകളിൽ പ്രകാശത്തെ പ്രതിഫലിപ്പിക്കുന്ന നാനോക്രിസ്റ്റലുകളുണ്ട്. ഈ നാനോക്രിസ്റ്റലുകൾ തമ്മിലുള്ള അകലത്തിൽ മാറ്റം വരുത്തി വ്യത്യസ്ത തരംഗദൈർഘ്യമുള്ള പ്രകാശത്തെ പ്രതിഫലിപ്പിക്കാൻ ഓന്തിന് സാധിക്കും. ഇത് നീല, പച്ച മുതൽ ചുവപ്പ്, മഞ്ഞ വരെയുള്ള നിറങ്ങൾ ഇവയുടെ ചർമ്മത്തിന് നൽകുന്നു.

നമ്മളിൽ പലരും തെറ്റിദ്ധരിച്ചുവെച്ചിരിക്കുന്ന ഒരു കാര്യമാണ് ചുറ്റുപാടിൽനിന്നും മറഞ്ഞിരിക്കാനാണ് ഓന്തുകൾ നിറം മാറുന്നത് എന്നാണ്. യഥാർത്ഥത്തിൽ മാനസികാവസ്ഥ, താപനില, വെളിച്ചം, മറ്റ് ഓന്തുകളുമായുള്ള ആശയവിനിമയം എന്നിവയാണ് ഓന്തുകളുടെ നിറംമാറ്റത്തെ സ്വാധീനിക്കുന്ന പ്രധാന ഘടകങ്ങൾ. ഉദാഹരണത്തിന് ഇണയെ ആകർഷിക്കാനോ ദേഷ്യം പ്രകടിപ്പിക്കാനോ ഓന്ത് തിളക്കമുള്ള നിറങ്ങൾ സ്വീകരിക്കും. അതുപോലെ, ശരീരത്തിലെ താപം നിയന്ത്രിക്കുന്നതിന് നിറം ഇരുണ്ടതാക്കുകയോ മങ്ങിയതാക്കുകയോ ചെയ്യുന്നു

നിറം മാറാനുള്ള കഴിവ് കൂടാതെ മറ്റ് ചില പ്രത്യേക കഴിവുകളും ഓന്തുകൾക്കുണ്ട്. പുറത്തേക്ക് തെറിപ്പിക്കാവുന്ന നീണ്ട നാവ്, സ്വതന്ത്രമായി ചലിപ്പിക്കാവുന്ന കണ്ണുകൾ എന്നിവയുടെ പേരിലും ഓന്തുകൾ പ്രശസ്തി നേടിയിട്ടുണ്ട്. മരങ്ങളിലും കുറ്റിച്ചെടികളിലും ജീവിക്കുന്ന ഇവ മികച്ച വേട്ടക്കാരാണ്. ആഫ്രിക്ക, മഡഗാസ്കർ,ദക്ഷിണ യൂറോപ്പ്, മധ്യപൂർവദേശങ്ങൾ, ഇന്ത്യ എന്നിവിടങ്ങളിലാണ് ഇവ കാണപ്പെടുന്നത്. വശങ്ങളിലേക്ക് പതിഞ്ഞ ശരീരം, മരച്ചില്ലകളിൽ പിടിച്ചിരിക്കാൻ സഹായിക്കുന്ന പാദങ്ങൾ, ബാലൻസ് നിലനിർത്താൻ സഹായിക്കുന്ന വാൽ എന്നിവ മരങ്ങളിലെ ജീവിതത്തിന് അവയെ പ്രാപ്തമാക്കുന്നു. സാധാരണയായി ഇലകൾക്കിടയിൽ തിരിച്ചറിയാതിരിക്കാൻ പച്ചയോ തവിട്ടുനിറമോ ആണ് ഇവയുടെ ചർമത്തിന്.

ഓന്തുകൾക്കുള്ള പ്രധാനപ്പെട്ട ഒരു സവിശേഷതയാണ് ഇവയുടെ കാഴ്ച. ഓരോ കണ്ണും വെവ്വേറെ ചലിപ്പിക്കാനും ശ്രദ്ധ കേന്ദ്രീകരിക്കാനും സാധിക്കുന്നതിനാൽ ഓന്തിന് ഏകദേശം 360 ഡിഗ്രി കാഴ്ച ലഭിക്കുന്നു. അതിനാൽ തന്നെ മികച്ച ഇരപിടിയന്മാർകൂടിയാണ് ഇക്കൂട്ടർ. ഒരേ സമയം ഇരയെയും ശത്രുവിനെയും കണ്ടെത്താം എന്നതാണ് ഇവയുടെ പ്രധാന സവിശേഷത. ഇരയെ കണ്ടുകഴിഞ്ഞാൽ രണ്ട് കണ്ണുകളും അതിൽ കേന്ദ്രീകരിച്ച ശേഷം, ശരീരത്തിന്റെ ഇരട്ടിയോളം നീളമുള്ള പശപോലെയുള്ള നാവ് നിമിഷാർധം കൊണ്ട് പുറത്തേക്ക് തെറിപ്പിച്ച് ദൂരെനിന്നുപോലും ഇരയെ പിടികൂടും. വ്യക്തമായ കാഴ്ചയും നാവിന്റെ വേഗതയും ഓന്തുകളെ ഉരഗലോകത്തെ ഏറ്റവും മികച്ച പ്രാണിവേട്ടക്കാരിൽ ഒന്നാക്കി മാറ്റിയിട്ടുണ്ട്.