അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.തദ്ദേശ സ്വയംഭരണ തിരഞ്ഞെടുപ്പ് ഫലപ്രഖ്യാപനത്തിൽ കനത്ത തിരിച്ചടി നേരിടുന്നതിനിടെ വോട്ടർമാരെ ലക്ഷ്യമിട്ട് സി.പി.എം. നേതാവും എം.എൽ.എയുമായ എം.എം. മണിയുടെ വിവാദ പരാമർശം. ക്ഷേമപെൻഷനുകൾ കൈപ്പറ്റി നന്നായി ഭക്ഷണം കഴിച്ച ശേഷം ആളുകൾ ഇടതുപക്ഷത്തിന് എതിരായി വോട്ട് ചെയ്തു എന്നായിരുന്നു മണിയുടെ പ്രതികരണം. ഇടുക്കിയിൽ മാധ്യമങ്ങളോട് സംസാരിക്കവെയായിരുന്നു ജനങ്ങളെ അമ്പരപ്പിക്കുന്നതും അപമാനിക്കുന്നതുമായ ഈ തുറന്നുപറച്ചിൽ.
തിരഞ്ഞെടുപ്പ് ഫലങ്ങൾ ഇടതുപക്ഷത്തിന് അനുകൂലമല്ലാത്ത സാഹചര്യത്തിൽ പ്രതികരണം ആരാഞ്ഞപ്പോഴാണ് എം.എം. മണി രൂക്ഷമായ വിമർശനമുന്നയിച്ചത്. “നല്ല ഒന്നാന്തരം പെൻഷൻ മേടിച്ചിട്ട് ഭംഗിയായി ശാപ്പാടും കഴിച്ച ശേഷം നല്ല ഭംഗിയായി നമ്മക്കിട്ട് വെച്ചു എന്നാണ് തോന്നുന്നത്,” എന്നായിരുന്നു അദ്ദേഹത്തിന്റെ വാക്കുകൾ. സർക്കാരിന്റെ ക്ഷേമപദ്ധതികൾ ആസ്വദിച്ച ജനവിഭാഗം തന്നെ തിരഞ്ഞെടുപ്പിൽ പാർട്ടിയെ കൈവിട്ടു എന്ന സൂചനയാണ് ഈ വാക്കുകളിലുള്ളത്.
സർക്കാർ നടപ്പാക്കിയ വികസന പ്രവർത്തനങ്ങളെ എടുത്തുപറഞ്ഞുകൊണ്ടാണ് അദ്ദേഹം വോട്ടർമാരുടെ നിലപാടിനെ ചോദ്യം ചെയ്തത്. റോഡ്, പാലം, മറ്റ് വികസന പ്രവർത്തനങ്ങൾ തുടങ്ങിയ ജനക്ഷേമ പരിപാടികൾ കേരളത്തിന്റെ ചരിത്രത്തിൽ ഇതുവരെ നടന്നിട്ടുണ്ടോ എന്നും അദ്ദേഹം ചോദിച്ചു. വികസന നേട്ടങ്ങൾ ഉണ്ടായിട്ടും വോട്ട് ലഭിക്കാത്തതിലുള്ള അമർഷവും നിരാശയുമാണ് മണിയുടെ വാക്കുകളിലൂടെ പുറത്തുവന്നത്.
ഫലപ്രഖ്യാപനത്തിന്റെ ആദ്യഘട്ടത്തിൽ തന്നെ പല നിർണ്ണായക സീറ്റുകളിലും മുന്നണിക്ക് തിരിച്ചടി നേരിടേണ്ടി വന്നിരുന്നു. ഈ രാഷ്ട്രീയ സാഹചര്യം നിലനിൽക്കെ വോട്ടർമാരെയും ജനങ്ങളെയും അധിക്ഷേപിക്കുന്ന തരത്തിലുള്ള ഒരു മുതിർന്ന നേതാവിന്റെ ഈ പ്രതികരണം രാഷ്ട്രീയ കേന്ദ്രങ്ങളിൽ വലിയ ചർച്ചകൾക്കും വിവാദങ്ങൾക്കും വഴിവെച്ചിരിക്കുകയാണ്.
