അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.തല ഇല്ലെങ്കില് വാലിനെന്തു പ്രസക്തി. ഇതുവരെയും എല്.ഡി.എഫ് പറഞ്ഞിരുന്നതും, പിടിച്ചു നിന്നതും തലസ്ഥാനം അടക്കി ഭരിക്കുന്നു എന്ന പേരിലാണ്. അതൊരു അഹങ്കാരം തന്നെയായിരുന്നു. ബവര്ഗീയ രാഷ്ട്രീയ പാര്ട്ടി എന്ന ലേബല് ഒട്ടിച്ചു വിട്ട ബി.ജെ.പിയെ, ഹിന്ദു വര്ഗീയതയെ കേരളത്തിലേ അടുപ്പിക്കില്ലെന്ന് പറഞ്ഞാണ് ഇടതുപക്ഷം ഇതുവരെ പിടിച്ചു നിന്നത്. ആദ്യം പറഞ്ഞു, നിയമസഭയില് കാലു കുത്തിക്കില്ലെന്ന്. അത് ഒ. രാജഗോപാലിലൂടെ നേമത്ത് സാധിച്ചു. പിന്നെപ്പറഞ്ഞു പാര്ലമെന്റില് എത്തിക്കില്ലെന്ന്. അത് സുരേഷ്ഗോപിയിലൂടെ തൃശൂരില് നടന്നു. പിന്നെപ്പറഞ്ഞു തിരുവനന്തപുരം കോര്പ്പേറഷനില് അടുപ്പിക്കില്ലെന്ന്.
കഴിഞ്ഞ ടേമില് ബി.ജെ.പി പ്രതിപക്ഷമായിരുന്നു. എന്നാല്, ഇത്തവണ എല്.ഡി.എഫിന്റെ തല തെറിപ്പിച്ചാണ് സ്ഥാനം പിടിച്ചെടുത്തത്. തലസ്ഥാന നഗരത്തിന്റെ അധിപനായി ഇനി ബി.ജെ.പി മേയര് ഇരിക്കും. 50 സീറ്റുകള് നേടിയാണ് ബി.ജെ.പിയുടെ ആധികാരിക വിജയം. എല്.ഡി.എഫിന് 29 സീറ്റും യു.ഡി.എഫിന് 19 സീറ്റും സ്വതന്ത്രര് രണ്ടുപേരുമാണ് വിജയിച്ചിരിക്കുന്നത്. ഒരു വാര്ഡില് സ്ഥാനാര്ത്ഥിയുടെ മരണത്തെ തുടര്ന്ന് തെരഞ്ഞെടുപ്പ് മാറ്റിവെച്ചിരുന്നു. നിലവില് ബി.ജെ.പി ഒറ്റകക്ഷിയായി ഭൂരിപക്ഷം ഉറപ്പിച്ചിട്ടുണ്ട്. എന്നാല്, എല്.ഡി.എഫും യുഡി.എഫും സ്വതന്ത്രരും ചേര്ന്നാല് 50 സീറ്റാകും. അപ്പോള്, ഭൂരിപക്ഷം ആര്ക്കും ഇല്ലാതാകും.
ഇവിടെ എല്.ഡി.എഫും യു.ഡി.എഫും ഒരുമിക്കുമോ എന്നതാണ് പ്രശ്നം. ബി.ജെ.പിയെ അധികാരത്തില് ഇരുത്താതിരിക്കാന് ഇടതു വലത് ധാരണകള് ഉണ്ടായാല്, സ്വതന്ത്രര് എവിടെ നില്ക്കും എന്നതിനെ ആസ്രയിച്ചായിരിക്കും ഭരണം. ബി.ജെ.പിക്ക് ഒരു സ്വതന്ത്രന്റെ പിന്തുണ കിട്ടിയാല് കോര്പ്പേറന് ഭരിക്കാം. എന്നാല്, സ്വതന്ത്രരും മറുപക്ഷത്തേക്കു പോയാല് ബി.ജെ.പിയുടെ ഭരണമോഹം തുലാസിലാകും. അപ്പോള് വിഴിഞ്ഞം വാര്ഡിലെ തെരഞ്ഞെടുപ്പായിരിക്കും കോര്പ്പറേഷന് ഭരണം ഉറപ്പിക്കുക. നിലവില് ബി.ജെ.പിക്ക് തന്നെയാകും ഭരണം. കാരണം, ഇടതു വലതു സഖ്യം കേരളത്തിലുണ്ടാകില്ല എന്നുറപ്പാണ്. കാരണം, കേന്ദ്രത്തില് അവര് ഇന്ഡ്യ മുന്നണിയിലണെങ്കിലും കേരളത്തില് പ്രതിപക്ഷവും ഭരണ പക്ഷവുമാണ്.
ബി.ജെ.പിക്ക് കേരളത്തില് അധികാരത്തിന്റെ വാതില് തുറന്നിടുന്നതും ഈ വ്യത്യസ്ത രാഷ്ട്രീയ നിലപാടു കൊണ്ടു തന്നെയാണ്. എത്രയോ കാലമായി തിരുവനന്തപുരം കോര്പ്പറേഷന് എല്.ഡി.എഫ് കുത്തകയാക്കി വെച്ചിരിക്കുന്നു. ഒടുവില് എത്തിയ ബാലസംഘം നേതാവ് ആര്യാ രാജേന്ദ്രന്റെ കാലം വരെയും. ജനങ്ങളെ കളിയാക്കുന്നതു പോലെയായിരുന്നു ബാലസംഘം കുട്ടിയെ തലസ്ഥാനത്തിന്റെ മേയറാക്കിയത്. അത് ഇടതുപക്ഷത്തിനേറ്റ തിരിച്ചടിയുടെ വലിയ കാരണം കൂടിയാണ്. ഭരണസിരാ കേന്ദ്രമിരിക്കുന്ന തലസ്ഥാന നഗരത്തെ നിയന്ത്രിക്കാന് ഒരു കൊച്ചുകുട്ടിയെ ഏല്പ്പിച്ചിട്ട്, കേരളം ഭരിക്കാനിരുന്ന വലിയ നേതാക്കള് ചെയ്തത് ജനങ്ങളെ കളിയാക്കിയതു തന്നെയാണ്.
അത് ജനങ്ങള് അംഗീകരിച്ചില്ല. ചെയ്തതെല്ലാം വലിയ കാര്യമാണെന്ന് കൊട്ടി ഘോഷിച്ചപ്പോഴും ജനം മനസ്സില് ഉറപ്പിച്ചത്, കനത്ത തിരിച്ചടി കൊടുക്കണമെന്നായിരുന്നു. അത് നടപ്പാക്കി. സര്ക്കാരിനും, ഇടതുപക്ഷത്തിനും അത് കാണിച്ചു കൊടുത്തു. ഇനിയും പഠിക്കാന് തയ്യാറായില്ലെങ്കില് നിയമസഭാ തെരഞ്ഞെടുപ്പിലും ഇത് പ്രകടമാകും. എന്തായാലും ഒരുകാര്യം ഉറപ്പായി. സൈബര് പോരാളികള് പറയുന്നതു പോലെ ചുവപ്പ് നരച്ചാല് കാവിയാകും. കാവിയില് നിറം കൂട്ടിയാല് ചുവപ്പുമാകും. അതു തന്നെയാണ് തിരുവനന്തപുരം കോര്പ്പറേഷനിലും ഉണ്ടായിരിക്കുന്നത്. ഇതുവരെ തുവന്നു തുടുത്തു നിന്ന കോര്പ്പേറന് നരച്ചിരിക്കുന്നു. നരച്ചു നരച്ച് അത് കാവിയായി മാറിക്കഴിഞ്ഞു. ഇനിയതു ചുവക്കാന് കാലങ്ങളെടുത്തേക്കും.
CONTENT HIGH LIGHTS; ‘Head’ dropped and ‘position’ lost?: The red flag turned grey and the saffron flag rose; What will happen in the capital?
