അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.അമൃത വിശ്വവിദ്യാപീഠത്തിന്റെ വിവിധ കാമ്പസുകളിലെ വിദ്യാർത്ഥികൾക്കായുള്ള ബിരുദസമർപ്പണ ചടങ്ങ് കൊച്ചി അമൃത കാമ്പസിൽ വെച്ച് നടന്നു. അമൃതപുരി, കൊച്ചി, ചെന്നൈ, എട്ടിമട, ബാംഗ്ലൂർ, മൈസൂർ എന്നീ കാമ്പസുകളിലെ ആയിരത്തിലധികം വിദ്യാർത്ഥികളാണ് രണ്ട് ദിവസം നീണ്ടുനിന്ന ചടങ്ങിൽ ബിരുദങ്ങൾ ഏറ്റുവാങ്ങിയത്.
ഡെന്റസ്ട്രി, മെഡിസിൻ, ആയുർവേദം, നഴ്സിംഗ്, ശിൽപ്പകല, ആർട്സ് ഹ്യുമാനിറ്റിസ് ആൻഡ് കൊമേഴ്സ്, അലൈഡ് ഹെൽത്ത് സയൻസസ്, എഞ്ചിനീയറിംഗ് തുടങ്ങിയ വിഭാഗങ്ങളിലെ ബിരുദ, ബിരുദാനന്തര, ഗവേഷക വിദ്യാർത്ഥികൾക്കാണ് ബിരുദങ്ങൾ സമർപ്പിച്ചത്. വിവിധ മേഖലകളിൽ റാങ്ക് നേടിയ വിദ്യാർത്ഥികൾക്ക് മെഡലുകളും സമ്മാനിച്ചു.
മാതാ അമൃതാനന്ദമയി മഠം ജനറൽ സെക്രട്ടറി സ്വാമി പൂർണാമൃതാനന്ദപുരി അനുഗ്രഹ പ്രഭാഷണം നടത്തി. അമൃത വിശ്വവിദ്യാപീഠം ചാൻസലർ മാതാ അമൃതാനന്ദമയി ദേവിയുടെ വിദ്യാർത്ഥികൾക്കുള്ള സന്ദേശവും ചടങ്ങിൽ വായിച്ചു.
“അറിവ് സ്വായത്തമാക്കുന്നതിന് പരിധിയില്ലെന്നും, നമുക്കുള്ളിലുള്ള കഴിവിനെ തിരിച്ചറിയുക എന്നതാണ് വിദ്യാഭ്യാസത്തിന്റെ ലക്ഷ്യം” എന്നും മാതാ അമൃതാനന്ദമയി ദേവി വിദ്യാർത്ഥികളെ ഓർമ്മിപ്പിച്ചു. കേരള യൂണിവേഴ്സിറ്റി കൺട്രോളർ ഓഫ് എക്സാമിനേഷൻ ഡോ. എസ്. അനിൽ കുമാർ ആയിരുന്നു ബിരുദ സമർപ്പണ ചടങ്ങിലെ മുഖ്യാതിഥി.
അമൃത വിശ്വവിദ്യാപീഠം രജിസ്ട്രാർ ഡോ. പി. അജിത് കുമാർ, കൺട്രോളർ ഓഫ് എക്സാമിനേഷൻ ഡോ. കൃഷ്ണകുമാർ പി., റിസർച്ച് വിഭാഗം മേധാവിയും ഡീനുമായ ഡോ. ഡി.എം.വാസുദേവൻ, അമൃത സ്കൂൾ ഓഫ് ആയുർവേദ ഡീൻ സ്വാമി ശങ്കരാമൃതാനന്ദപുരി, അമൃത സ്കൂൾ ഓഫ് ആർട്സ് ഡീൻ ഡോ. യു. കൃഷ്ണകുമാർ, അമൃത സ്കൂൾ ഓഫ് അലൈഡ് ഹെൽത്ത് സയൻസസ് ചീഫ് പ്രോഗ്രാം ഓഫീസർ ഡോ. എംവി തമ്പി എന്നിവർ വിശിഷ്ടാതിഥികളായിരുന്നു.
ചടങ്ങിൽ അമൃത സ്കൂൾ ഓഫ് മെഡിസിൻ പ്രിൻസിപ്പൽ ഡോ. ഗിരീഷ് കുമാർ കെ.പി., അമൃത സ്കൂൾ ഓഫ് ഡെന്റിസ്ട്രി പ്രിൻസിപ്പൽ ഡോ. ബാലഗോപാൽ വർമ ആർ., വൈസ് പ്രിൻസിപ്പൽ ഡോ. എസ് രാകേഷ്, അമൃത കോളേജ് ഓഫ് നഴ്സിംഗ് പ്രിൻസിപ്പൽ ഡോ. കെ.ടി. മോളി, വൈസ് പ്രിൻസിപ്പൽ ഡോ. അനില കെ.പി. ഡോ. ശോഭാ സുബ്രമണ്യൻ, ഡോ. സുനിൽ കുമാർ എന്നിവരും സംസാരിച്ചു.
