അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.അവിഹിതബന്ധങ്ങൾ: അത് ഒരു വ്യക്തിയുടെ ജീവിതത്തിൽ ഉണ്ടാക്കുന്ന മുറിവുകളും വിതയ്ക്കുന്ന നാശവും എത്ര വലുതാണെന്ന് കാലം തെളിയിച്ചുകൊണ്ടിരിക്കുന്ന സത്യമാണ്. ഈ ബന്ധങ്ങളുടെ കെണിയിൽ വീഴുന്നവർ തങ്ങളുടെ തെറ്റുകൾ തിരിച്ചറിയാനോ തിരുത്താനാനോ തയ്യാറാകാത്തത് നിരവധി ജീവിതങ്ങളെയും കുടുംബങ്ങളെയും കൊലപാതകങ്ങളിലേക്കും നയിക്കുന്നു.
എന്നാൽ, ഒരു വഴിവിട്ട ബന്ധത്തിന്റെ പേരിൽ, ലോകം എന്തെന്നറിയാത്ത ഒരു പിഞ്ചുകുഞ്ഞിന്റെ ജീവൻ ഇല്ലാതായി എന്ന് പറഞ്ഞാൽ ആർക്കെങ്കിലും വിശ്വസിക്കാനാകുമോ? അതെ, മനസ്സാക്ഷിയെ മരവിപ്പിച്ച അത്തരമൊരു സംഭവം 2010-ൽ ചെന്നൈയിൽ അരങ്ങേറിയിട്ടുണ്ട്.
അതിരുവിട്ട പ്രണയവും അവിഹിത ബന്ധവും ചേർന്ന് നെയ്തെടുത്ത പ്രതികാരത്തിന്റെ കഥയിൽ, യാതൊരു തെറ്റും ചെയ്യാത്ത ഒരു പാവം ബാലൻ ക്രൂരമായി കൊല്ലപ്പെടേണ്ടി വന്നു. മാതാപിതാക്കൾ വരുത്തിയ തെറ്റുകൾക്ക് മകൻ അതിദാരുണമായ ശിക്ഷ അനുഭവിക്കേണ്ടി വന്ന ആ സംഭവം, ലോകം എത്രത്തോളം പൈശാചികവും ക്രൂരവുമാണ് എന്ന് നമ്മെ ഓർമ്മിപ്പിക്കുന്നു. സ്നേഹബന്ധങ്ങളിലെ തകർച്ച ഒരു പിഞ്ചു ജീവനെ എങ്ങനെ ഇല്ലാതാക്കി എന്നതിൻ്റെ ഭീകരമായ നേർക്കാഴ്ചയായിരുന്നു ആ കേസ്.
നാഗപട്ടണം ബസ് സ്റ്റാൻഡ്, 2010 ജൂലൈ 18. പതിവായി ജനത്തിരക്കിൽ മുങ്ങിയിരുന്ന ആ പരിസരത്ത്, എല്ലാവരുടെയും ശ്രദ്ധ പതിഞ്ഞത് ഒരു കുപ്പത്തൊട്ടിയുടെ അരികിൽ ഉപേക്ഷിച്ച നിലയിൽ കണ്ട സ്യൂട്ട്കേസിലായിരുന്നു. ഈച്ചകൾ വട്ടമിട്ട് പറക്കുന്നു, അതോടൊപ്പം അസഹനീയമായ ദുർഗന്ധവും. ഭയവും ആശങ്കയും നിറഞ്ഞ മനസ്സോടെ നാട്ടുകാർ പോലീസിനെ വിവരമറിയിച്ചു.
ബോംബ് സ്ക്വാഡിന്റെ പരിശോധനകൾക്കൊടുവിൽ, പോലീസ് ആ സ്യൂട്ട്കേസ് തുറന്നു. ഉള്ളിലെ കാഴ്ച കണ്ട് പോലീസുകാരുടെ പോലും നെഞ്ചൊന്ന് പിടഞ്ഞു. പ്ലാസ്റ്റിക് കവറിൽ പൊതിഞ്ഞ നിലയിൽ, ആരും തിരിച്ചറിയാത്ത, വെറും നാല് വയസ്സുള്ള ഒരു കുഞ്ഞിന്റെ മൃതശരീരമായിരുന്നു അതിനുള്ളിൽ!
നാഗപട്ടണത്ത് കണ്ടെത്തിയ കുഞ്ഞിന്റെ മൃതദേഹം പോലീസിന് ഒരു വലിയ ചോദ്യചിഹ്നമായി അവശേഷിച്ചു. സിസിടിവി ക്യാമറകൾ പ്രവർത്തനരഹിതമായത് തുമ്പില്ലാതാക്കി. എന്നാൽ, പിറ്റേന്ന് രാവിലെ ചെന്നൈയിൽ നിന്ന് വന്ന ഒരു ഫോൺകോൾ ആ ദുരന്തത്തിന് ഒരു മുഖം നൽകി. രണ്ടു ദിവസം മുൻപ്, ജൂലൈ 17-ന് ചെന്നൈയിൽ നിന്ന് കാണാതായ ആദിത്യൻ എന്ന നാല് വയസ്സുകാരനെക്കുറിച്ചായിരുന്നു അത്.
കോട്ടയം സ്വദേശികളായ ജയകുമാറിന്റെയും ആനന്ദവല്ലിയുടെയും ഇളയ മകനായിരുന്നു അവൻ. മകന്റെ ഫോട്ടോ കണ്ട ജയകുമാറും ആനന്ദവല്ലിയും തങ്ങളുടെ പൊന്നോമനയാണ് സ്യൂട്ട്കേസിനുള്ളിൽ എന്നറിഞ്ഞ് തകർന്നുപോയി. ചെന്നൈയിൽ നിന്ന് 304 കിലോമീറ്റർ അകലെയുള്ള നാഗപട്ടണത്ത് എങ്ങനെ ഈ മൃതദേഹം എത്തി? ഈ ക്രൂരകൃത്യത്തിന് പിന്നിൽ ആരാണ്?
സ്യൂട്ട്കേസ് വിശദമായി പരിശോധിച്ച പോലീസിന് അതിനുള്ളിൽ നിന്ന് ലഭിച്ച ഒരേയൊരു തെളിവ് ഒരു സ്ത്രീയുടെ നീണ്ട മുടിയിഴയായിരുന്നു. അന്വേഷണം നീണ്ടത് ജയകുമാറിന്റെ കുടുംബവുമായി വർഷങ്ങളായി അടുപ്പമുണ്ടായിരുന്ന പൂവരശി എന്ന യുവതിയിലേക്ക്.
ജൂലൈ 17-ന് രാവിലെ വീട്ടിലെത്തിയ പൂവരശി, സ്നേഹം നടിച്ച് ആദിത്യനെ കൂട്ടിക്കൊണ്ടുപോവുകയായിരുന്നു. പിന്നീട് അവൾ നാടകം കളിച്ചു: ബോധംകെട്ടു വീണു, ആരോ കുട്ടിയെ തട്ടിക്കൊണ്ടുപോയി! എന്നാൽ, സ്യൂട്ട്കേസിലെ മുടിയിഴയും, പൂവരശി താമസിച്ചിരുന്ന ഹോസ്റ്റലിലെ വാച്ച്മാന്റെ നിർണായക മൊഴിയും കാര്യങ്ങൾ മാറ്റിമറിച്ചു. ഭാരമുള്ള സ്യൂട്ട്കേസുമായി അവൾ പുറത്തേക്ക് പോകുന്നത് വാച്ച്മാൻ കണ്ടിരുന്നു.
ഒടുവിൽ, പോലീസിന്റെ ചോദ്യം ചെയ്യലിന് മുന്നിൽ പൂവരശിയുടെ പ്രതികാരത്തിന്റെ ഭീകരമായ സത്യം പുറത്തുവന്നു. ജയകുമാറുമായി അവൾക്ക് പ്രണയബന്ധമുണ്ടായിരുന്നു. ഈ ബന്ധത്തിൽ രണ്ടു തവണ ഗർഭിണിയായെങ്കിലും ജയകുമാർ നിർബന്ധിച്ച് ഗർഭച്ഛിദ്രം നടത്തി.
ഭാര്യയെ ഉപേക്ഷിച്ച് തന്നെ സ്വീകരിക്കാൻ ജയകുമാർ തയ്യാറാകാതിരുന്നതിന് കാരണം, തനിക്ക് മക്കൾ ഉള്ളതിനാലാണെന്ന് അയാൾ പറഞ്ഞിരുന്നു. ആ വാക്കുകൾ പൂവരശിക്ക് മുന്നിൽ വിതച്ചത് പകയുടെ വിത്തുകളായിരുന്നു. ആദിത്യനാണ് തങ്ങളുടെ ബന്ധത്തിന് തടസ്സമെന്ന് അവൾ വിശ്വസിച്ചു.
മകനോടുള്ള സ്നേഹം കാരണം തന്നെ ഉപേക്ഷിച്ച ജയകുമാറിനോട് പ്രതികാരം ചെയ്യാൻ അവൾ കണ്ടെത്തിയ വഴി ഏറ്റവും ക്രൂരമായിരുന്നു. ജൂലൈ 17-ന് കുഞ്ഞിനെ ഹോസ്റ്റലിൽ കൊണ്ടുപോയ ശേഷം, ആരും അറിയാതെ, ഒരു സീറ്റ് ബെൽറ്റ് ഉപയോഗിച്ച് കഴുത്ത് ഞെരിച്ച് അവൾ ആ പിഞ്ചുകുഞ്ഞിന്റെ ജീവൻ കവർന്നു.
മൃതദേഹം സ്യൂട്ട്കേസിലാക്കി, 304 കിലോമീറ്റർ അകലെയുള്ള നാഗപട്ടണത്ത് ഉപേക്ഷിച്ച്, തിരികെയെത്തി ഒന്നും അറിയാത്തപോലെ അഭിനയിച്ചു. കോടതിയിൽ പൂവരശിക്ക് ജീവപര്യന്തം ശിക്ഷ ലഭിച്ചു.
വഴിവിട്ട പ്രണയത്തിന്റെ പേരിൽ ഒരു സ്ത്രീയുടെ മനസ്സിൽ രൂപപ്പെട്ട പകയ്ക്ക്, സ്വന്തം പിതാവിന്റെ തെറ്റുകൾക്ക്, നിസ്സഹായനായ ആദിത്യൻ നൽകേണ്ടി വന്നത് അവന്റെ വിലപ്പെട്ട ജീവനായിരുന്നു. ഈ ദുരന്തം ഇന്നും മനുഷ്യബന്ധങ്ങളിലെ ചതിയുടെ ആഴം നമ്മെ ഓർമ്മിപ്പിക്കുന്നു.
