കടലക്കറി രുചികരമാക്കാൻ ഈ മസാലക്കൂട്ട് മാത്രം മതി

കടല കറി പണ്ടത്തെ അതേ രുചിയിൽ തന്നെ തയ്യാറാക്കാൻ നിങ്ങൾക്ക് പറ്റുന്നുണ്ടോ?. വറുത്തരച്ചെടുത്ത തേങ്ങയും വേവിച്ച കടലയും മസാല കൂട്ടുകളും ചേർന്ന കറി കണ്ടാൽ തന്നെ കൊതി തോന്നും. മണത്തിലും രുചിയിലും ഈ കടല കറി എന്നു വേറിട്ടു നിൽക്കുന്നു.

ചേരുവകൾ

ചുവന്നുള്ളി
വറ്റൽമുളക്
കറിവേപ്പില
മഞ്ഞൾപ്പൊടി
മുളകുപൊടി
മല്ലിപ്പൊടി
കടല
എണ്ണ
സവാള
ഇഞ്ചി
വെളുത്തുള്ളി
പച്ചമുളക്
തക്കാളി
ഉപ്പ്

തയ്യാറാക്കുന്ന വിധം

ഒന്നര കപ്പ് കടല, വെള്ളത്തിൽ കുതിർത്തു വച്ചത് വേവിച്ചെടുക്കാം.ഒരു പാൻ അടുപ്പിൽ വച്ച് അര കപ്പ് തേങ്ങ ചിരകിയതു ചേർത്ത് വറുക്കുക. തേങ്ങയുടെ നിറം മാറി വരുമ്പോൾ 10 ചുവന്നുള്ളി, മൂന്നോ നാലോ വറ്റൽമുളക്, കുറച്ച് കറിവേപ്പില എന്നിവ ചേർത്തു വറുക്കാം. ഇവ വറുത്തെടുക്കുന്നതിനൊപ്പം അര ടീസ്പൂൺ മഞ്ഞൾപ്പൊടി, ഒരു ടീസ്പൂൺ മുളകുപൊടി, ഒരു ടീസ്പൂൺ മല്ലിപ്പൊടി, വേവിച്ചെടുത്ത കടലയിൽ നിന്ന് കുറച്ച് എന്നിവ ചേർത്ത് നന്നായി വറുക്കാം. കുറച്ച വെള്ളം ഒഴിച്ച് ഇവ അരച്ച് മാറ്റി വയ്ക്കാം. അടി കട്ടിയുള്ള ഒരു പാത്രം അടുപ്പിൽ വച്ച് രണ്ടോ മൂന്നോ ടേബിൾസ്പൂൺ വെളിച്ചെണ്ണ ഒഴിച്ചു ചൂടാക്കാം. ഇടത്തരം വലിപ്പമുള്ള സവാള ചെറുതായി അരിഞ്ഞതു ചേർത്ത് വഴറ്റാം. സവാളയുടെ നിറം മാറി വരുമ്പോൾ ഇഞ്ചിയും വെളുത്തുള്ളിയും ചതച്ചത് ഒരു ടേബിൾസ്പൂൺ, രണ്ട് പച്ചമുളക് ചെറുതായി അരിഞ്ഞത്, കുറച്ച് കറിവേപ്പില എന്നിവ ചേർത്തിളക്കി യോജിപ്പിക്കാം. ഇടത്തരം വലിപ്പമുള്ള രണ്ട് തക്കാളി ചെറിയ കഷ്ണങ്ങളാക്കിയതും ചേർത്ത് ഒപ്പം വഴറ്റാം. മാറ്റി വച്ചിരിക്കുന്ന അരപ്പിനൊപ്പം , വേവിച്ച കടല വെള്ളത്തോടൊപ്പം ചേർത്തിളക്കി യോജിപ്പിക്കാം. ആവശ്യത്തിന് ഉപ്പ് കൂടി ചേർത്ത് അടച്ചു വച്ച് ഇടത്തരം തീയിൽ അഞ്ച് മുതൽ പത്ത് മിനിറ്റു വരെ വേവിക്കുക. ഇളക്കിയെടുത്ത് ചൂടോടെ കഴിച്ചു നോക്കൂ.