അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.കേരളത്തിലെ സൂക്ഷ്മ, ചെറുകിട, ഇടത്തരം സംരംഭകരുടെ (MSME) ഉൽപ്പന്നങ്ങൾക്ക് അന്താരാഷ്ട്ര വിപണിയിൽ വലിയ സ്വീകാര്യത ഉറപ്പാക്കുക എന്ന ലക്ഷ്യത്തോടെ സംസ്ഥാന വ്യവസായ വകുപ്പ് സംഘടിപ്പിക്കുന്ന ‘ട്രേഡക്സ് കേരള 2026’ അന്താരാഷ്ട്ര ബയർ-സെല്ലർ മീറ്റിന് നാളെ കൊച്ചിയിൽ തുടക്കമാകും. ഫെബ്രുവരി 17, 18 തീയതികളിലായി കൊച്ചി ലെ മെറഡിയൻ ഹോട്ടലിലാണ് ഈ വിപുലമായ സംഗമം നടക്കുന്നത്. ചെറുകിട സംരംഭകർക്ക് ഇടനിലക്കാരില്ലാതെ ആഗോള വിപണിയിലേക്ക് നേരിട്ട് പ്രവേശനം ഒരുക്കുന്നതിനായി വ്യവസായ വകുപ്പ് ആദ്യമായാണ് ഇത്തരമൊരു രാജ്യാന്തര മീറ്റ് സംഘടിപ്പിക്കുന്നത്.
വ്യവസായ വാണിജ്യ ഡയറക്ടറേറ്റും ഫെഡറേഷൻ ഓഫ് ഇന്ത്യൻ എക്സ്പോർട്ട് ഓർഗനൈസേഷനും (FIEO) സംയുക്തമായാണ് പരിപാടി ഒരുക്കുന്നത്. ഇരുപതിലധികം വിദേശ രാജ്യങ്ങളിൽ നിന്നായി മുപ്പതിലധികം പ്രമുഖ ബയർമാർ മീറ്റിൽ പങ്കെടുക്കും. കേരളത്തിന്റെ വിവിധ ഭാഗങ്ങളിൽ നിന്നുള്ള നാനൂറോളം എംഎസ്എംഇ സംരംഭകർ തങ്ങളുടെ വൈവിധ്യമാർന്ന ഉൽപ്പന്നങ്ങൾ ഇവിടെ പ്രദർശിപ്പിക്കും. കാർഷിക ഉൽപ്പന്നങ്ങൾ, സുഗന്ധവ്യഞ്ജനങ്ങൾ, തേയില, കാപ്പി, കയർ, കൈത്തറി, റബ്ബർ, ഇലക്ട്രോണിക്സ് തുടങ്ങി കേരളത്തിന്റെ തനതായ ഒട്ടേറെ മേഖലകളിൽ നിന്നുള്ള ഉൽപ്പന്നങ്ങൾക്ക് ഇതിലൂടെ വിദേശ വിപണി കണ്ടെത്താനാകും.
വ്യവസായ, കയർ വകുപ്പ് മന്ത്രി പി. രാജീവ് സമ്മേളനം ഉദ്ഘാടനം ചെയ്യും. കെ. ബാബു എംഎൽഎ അധ്യക്ഷനാകുന്ന ചടങ്ങിൽ ഹൈബി ഈഡൻ എംപി, മരട് നഗരസഭാ അധ്യക്ഷ അജിത നന്ദകുമാർ എന്നിവർ മുഖ്യാതിഥികളായി എത്തും. വ്യവസായ വകുപ്പ് അഡീഷണൽ ചീഫ് സെക്രട്ടറി എ.പി.എം. മുഹമ്മദ് ഹനീഷ് മുഖ്യപ്രഭാഷണം നടത്തും. വ്യവസായ-വാണിജ്യ ഡയറക്ടർ പി. വിഷ്ണുരാജ് ഐഎഎസ് ഉൾപ്പെടെയുള്ള ഉന്നത ഉദ്യോഗസ്ഥരും പ്രമുഖരും ചടങ്ങിൽ സംബന്ധിക്കും.
സംസ്ഥാനത്തിന്റെ തനത് ഉൽപ്പന്നങ്ങൾക്ക് ഗുണമേന്മയുടെയും സുസ്ഥിരതയുടെയും മുദ്ര ചാർത്തുന്ന ‘കേരള ബ്രാൻഡ്’ (നന്മ) പദ്ധതിയുടെ ഭാഗമായാണ് ഈ ആഗോള സംഗമം ഒരുക്കിയിരിക്കുന്നത്. വനിതാ സംരംഭകർ ഉൾപ്പെടെയുള്ളവർക്ക് വിദേശ വ്യാപാരികളുമായി നേരിട്ട് ചർച്ചകൾ നടത്താനും പുതിയ ബിസിനസ് കരാറുകളിൽ ഏർപ്പെടാനും ഈ വേദി അവസരമൊരുക്കും. ബിസിനസ് ചർച്ചകൾക്ക് പുറമെ, ഉൽപ്പന്നങ്ങളുടെ ബ്രാൻഡിംഗ്, പാക്കേജിംഗ്, കയറ്റുമതി മാനദണ്ഡങ്ങൾ എന്നിവയിൽ സംരംഭകർക്ക് വിദഗ്ധ മാർഗനിർദേശങ്ങൾ നൽകാൻ ടെക്നിക്കൽ സർവീസ് പ്രൊവൈഡർമാരുടെ സേവനവും മീറ്റിൽ ലഭ്യമായിരിക്കും.
