അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.പാലക്കാട് നഗരത്തിന്റെ തിരക്കുകളിൽ നിന്നും പത്ത് കിലോമീറ്റർ അകലെ പിരായിരി എന്ന ഗ്രാമത്തിന്റെ ശാന്തതയിൽ ഒരു കൊച്ചു ലോകമുണ്ടായിരുന്നു. അച്ഛനും അമ്മയും മൂത്ത സഹോദരനും അടങ്ങുന്ന ആ വീട്ടിലെ വെളിച്ചമായിരുന്നു അജയ് കുമാർ. നാട്ടുകാർക്കും വീട്ടുകാർക്കും ഒരുപോലെ പ്രിയങ്കരനായ, സൗമ്യനായ ഒരു യുവാവ്. മരിക്കുന്നതിന് തൊട്ടുമുമ്പ് അമ്മയ്ക്ക് ഒരു സാരി വാങ്ങി നൽകുമ്പോഴും, അച്ഛന് അടുത്തത് വാങ്ങിത്തരാമെന്ന് വാക്ക് കൊടുക്കുമ്പോഴും തന്റെ ആയുസ്സ് ഒരു ഇരുമ്പ് സ്പാനറിൽ ഒടുങ്ങുമെന്ന് ആ പാവം കരുതിയിട്ടുണ്ടാകില്ല.
ഓഫീസിലെ ജോലിക്കാര്യത്തിൽ അത്രമേൽ വിശ്വസ്തനായിരുന്ന അജയ്യുടെ ജീവിതത്തിൽ ആരും അറിയാത്ത ഒരു സൗഹൃദമുണ്ടായിരുന്നു. കൂടെ ജോലി ചെയ്തിരുന്ന ഒരു യുവതിയുമായുള്ള ആത്മബന്ധം. എന്നാൽ ഈ സൗഹൃദം യുവതിയുടെ ഭർത്താവായ സുരേഷിനെ വല്ലാതെ അസ്വസ്ഥനാക്കിയിരുന്നു. പലതവണ മുന്നറിയിപ്പുകൾ നൽകിയിട്ടും, യുവതി ജോലി മാറി കൊച്ചിയിലേക്ക് പോയിട്ടും അവർക്കിടയിലെ ഫോൺ വിളികളും സൗഹൃദവും തുടർന്നു. ഈ പക സുരേഷിന്റെ ഉള്ളിൽ ഒരു കനലായി എരിഞ്ഞുകൊണ്ടിരുന്നു.
ആ ശനിയാഴ്ച, ഓഫീസിലെ മീറ്റിംഗിനായി എറണാകുളത്തേക്ക് പോകുന്നുവെന്നും ഞായറാഴ്ച മടങ്ങിയെത്തുമെന്നും അച്ഛനോട് പറഞ്ഞാണ് അജയ് വീടിന്റെ പടികളിറങ്ങിയത്. അത് തന്റെ അവസാന യാത്രയാണെന്ന് അവൻ അറിഞ്ഞിരുന്നില്ല. കൊച്ചി നെട്ടൂരിലെ മാർക്കറ്റ് ജംഗ്ഷന് സമീപമുള്ള, നാട്ടുകാർക്കിടയിൽ അത്ര നല്ല പേരുള്ളതല്ലാത്ത ഒരു ലോഡ്ജിലായിരുന്നു അജയ് അന്ന് താമസിച്ചിരുന്നത്. അവിടെ അജയ്യെയും കാത്ത് മരണം സുരേഷിന്റെ രൂപത്തിൽ നേരത്തെ തന്നെ എത്തിയിരുന്നു.
അർദ്ധരാത്രി ഒന്നരയോടെ ലോഡ്ജിലെത്തിയ സുരേഷ് തന്റെ ക്രൂരമായ പദ്ധതി നടപ്പിലാക്കി. സ്വന്തം ഭാര്യയെ കാറിനുള്ളിൽ പൂട്ടിയിട്ട ശേഷം അയാൾ ലോഡ്ജ് മുറിയിലേക്ക് ഇരച്ചുകയറി. ഉറക്കത്തിലായിരുന്ന അജയ്യെ വലിച്ചിഴച്ച് പുറത്തിറക്കി. കയ്യിൽ കരുതിയിരുന്ന ഇരുമ്പ് സ്പാനർ കൊണ്ട് അജയ്യുടെ തലയ്ക്ക് ആഞ്ഞടിച്ചു. പ്രാണരക്ഷാർത്ഥം ചോരയിൽ കുളിച്ച് സ്റ്റെയർകേസ് വഴി താഴേക്ക് ഓടിയ അജയ്യെ സുരേഷ് വെറുതെ വിട്ടില്ല.
നടുറോഡിലിട്ട് വീണ്ടും തലയ്ക്ക് ആഞ്ഞടിക്കുകയും കഴുത്തിൽ ചവിട്ടിപ്പിടിച്ച് മരണം ഉറപ്പാക്കുകയും ചെയ്തു. ഒടുവിൽ ശബ്ദം കേട്ട് സമീപവാസികൾ ഓടിക്കൂടുമ്പോഴേക്കും അജയ് നിശ്ചലനായിരുന്നു. ആശുപത്രിയിലെത്തിച്ചെങ്കിലും ആ ജീവൻ രക്ഷിക്കാനായില്ല. തലയ്ക്കേറ്റ മാരകമായ മുറിവുകളും രക്തസ്രാവവുമാണ് മരണകാരണമെന്ന് പോസ്റ്റ്മോർട്ടം റിപ്പോർട്ട് പിന്നീട് സ്ഥിരീകരിച്ചു.
പിറ്റേന്ന് പുലർച്ചെ ആ മാതാപിതാക്കളെ തേടിയെത്തിയത് മകന്റെ മരണവാർത്തയായിരുന്നു. തങ്ങളുടെ പൊന്നുമകൻ ഇങ്ങനെ ഒരു ദുരന്തത്തിന് ഇരയായെന്ന് വിശ്വസിക്കാൻ ഇന്നും പിരായിരി എന്ന ഗ്രാമത്തിന് കഴിഞ്ഞിട്ടില്ല. ആ വീട്ടിലെ ഉമ്മറത്ത് അജയ് വാങ്ങി നൽകിയ ആ സാരി ഇന്നും ഒരു നോവായി ബാക്കിയുണ്ട്.
